بقلم : دينا حسن محمود
أيام زمان كان في طائرة من ورق معها أحلام طفل صغير.. من صنع يديه يضع فيها أماني المستقبل.. وحرية التحليق في سماء عالية بألوان قوس قزح تجلب معها البهجة والسرور كلما ارتفعت وارتفعت.
أيام زمان كان في مظروف يعنى خطاب وكارت هدايا بنود به بعض لو كنا مسافرين.. ونعبر عن محبتنا.. ونفتكر بعض في الفرح والحزن مع بوكيه ورد جميل.
أيام زمان كان في فرحة لكل مناسبة أول يوم دراسة أول مولود أول مرتب.. رمضان كان له أغاني ومسحراتي وفانوس بشمعة.. وعيد يأتي مع فلوس جديدة وملابس جديدة تنام جنبنا على المخدة.
أيام زمان كان في مكتبة نقرأ فيها كتاب.. وممكن نرسم ونلون..
أيام زمان كان اللي عايز ينجح ويذاكر كان بيدور على عمود نور ولمبة جاز.. وكان بيبقى من المتفوقين.
أيام زمان كان في جيران بتود بعض.. من غير تطفل وازعاج.. ومعاك ايه وجببت دي بكام…. كانوا أقرب من الأهل لو كنت فرحان أو كنت زعلان.
أيام زمان كان الأكل يعني لمة… ليها معاد لو على سفرة أو طبلية.. وعزائم حلوة في بيت الأجداد بتلم العيلة في يوم جمعة.
أيام زمان كان في الصاحب الجدع اللي في ضهرك وكأن معاك 100 راجل.. وابن البلد اللي لوشافك في أزمة ميعرفكش يقوم يقف لك.. ولو وقعت يساعدك ويجري بيك على مستشفى…
أيام زمان كان الراديو عادة .. حفلة أم كلثوم … وأبلة فضيلة… وكلمتين وبس… والتلفزيون اختراع جديد .. وفلم أبيض وأسود .. وبرنامج يجمعنا ونستناه.
زمان كان في بساطة …. بس كان في نجاح له طعم تاني كانت الناس بتحب بعض من غير غرض ناس عارفة قيمة بعض وخايفة على بعض عايشين اليوم بيومه ومش شايلين هم بكرة … ناس عارفة يعنى ايه عقيدة ولمة.. عارفة إن البيت المصنع الأول للإنسان..
التكنولوجيا سهلت حاجات كتير في الحياة..
بس يمكن فقدنا الإبداع والإيمان بفكر.. يمكن فقدنا اللمة… ويمكن تكون عملت فوارق وصنفتنا … ويمكن كل إما الحياة بقت أسهل من غير جهد…. كل إما فقدنا الشغف للمعرفة والعطاء.
Visits: 46
مساحة إعلانية
مساحة إعلانية