سلمى أبو ضيف: “أعلى نسبة مشاهدة حطني في حتة تانية خالص”

كتب: ياسر خالد

حل أبطال وصناع مسلسل “أعلى نسبة مشاهدة” ضيوفًا مع الإعلامي شريف عامر، خلال حلقة الأمس من برنامج “يحدث في مصر” المذاع عبر قناة “mbc مصر”.

حيث كان في ضيافة البرنامج كل من الفنانات سلمى أبو ضيف، ليلى زاهر، فرح يوسف وانتصار، الفنان محمد محمود، المؤلفة سمر طاهر والمخرجة ياسمين أحمد كامل.

جاء ذلك بعد النجاح الكبير الذي حققه العمل، خلال الماراثون الرمضاني الماضي، تفاعل عدد كبير من الجمهور معه.

وخلال الحلقة تحدثت سلمى أبو ضيف عن تجسيدها لشخصية شيماء، موضحةً أن بعض المصطلحات الخاصة بشيماء مازالت ملازمة لها.

سلمى أبو ضيف: “شيماء ونسمة ماكنوش عايزين يوصلوا لكل ده والظروف اللي حطتهم كده”

وقالت سلمى: “لسه فيه شوية كلام زي دون وأقسم بالله”، لافتةً: “المحهد دي ممكن يعني متداول طبيعي”، مضيفةً: “بس لسه فيه شوية كلام لسه على لساني”.

وأضافت أن “أعلى نسبة مشاهدة” يعتبر نقطة تحول في مشوارها الفني، قائلةً: “هو تقريبًا حطني في حتة تانية خالص”.

وتابعت: “الناس شافوني بشكل مختلف، تقريبًا أول ما الناس شافوني في المسلسل في الأول اتخضوا، قالوا إيه ده؟، البنت دايمًا بتعمل أدوار معينة”.

وأكملت: “فأول ما شافوني بالشكل ده وصدقوا في الآخر، فأنا حاسة فعلًا زي ما حضرتك قلت نقطة تحول في العمل بتاعي، تحول وظيفي خالص كأني لسه أول سنة بمثل تقريبًا، فالحمد لله”.

سلمى أبو ضيف: “أحلى حاجة في أعلى نسبة مشاهدة إن كان معانا الـ15 حلقة”

كما تحدثت سلمى عن مشهد الحلقة الـ11 من المسلسل، الذي شهد المشادة بين شيماء وشقيقتها نسمة، والذي كانت نسخته المطبوعة غير واضحة.

وعن ذلك قالت: “المسلسل كان أحلى حاجة فيه الحمد لله إننا معانا الـ15 حلقة، دي مابتحصلش، فالحمد لله كان معانا الـ15 حلقة”.

وأردفت: “الخناقة بتاعتنا في البروفا كانت في الحلقة الـ11، الحلقة الـ11 عندي كلها في الورقة كانت ممسوحة خالص، فكنا بنستخدم التليفونات”.

وعما إذا كانت ترى أن شيماء مضطهدة أم مسئولة عن مشاكلها، قالت سلمى: “هقول لحضرتك على حاجة، أنا بالنسبة لي وجهة نظر شيماء، شيماء ماكنتش عاوزة توصل لكل ده، هي بجد الظروف، ولا حتى نسمة، نسمة كمان برضو، الظروف هي حطتهم كده”.

سلمى أبو ضيف: “إحنا عملنا معايشة والورق وتوجيه الأستاذة ياسمين كانوا مساعدين جدًا”

وحول طريقة الكلام، قالت: “إحنا طريقة الكلام كنا محتاجين نشتغل عليها بشكل كبير، فأستاذة ياسمين وهي بتعاين الأماكن شافت مي، بنت من الحطابة، قالتلهم أنا عايزة أتواصل معاها”.

واستكملت سلمى حول كيفية أنها أصبحت شيماء، قائلةً: “إحنا عملنا معايشة، الورق كان مساعد جدًا، توجيه الأستاذة ياسمين كان مساعد جدًا”.

مضيفةً: “اللبس أول ما لبسناه بالوردة، اللبس اللي حصل ده كله بجد ساعد الشخصية بجد، والعيلة أول ما قعدت مع بعضها واتكونت وكلنا شفنا بعض، فيه حاجة حصلت فيه حاجة اتغيرت”.

وأردفت: “فيه حاجات كانت بتعجبني خدناها من مي، هي أصلًا عامةً كاراكتر شخصية قوية جدًا، أنا معجبة بيها جدًا بصراحة بجد، لأنها هي في الحطابة، بس بتدرس لأولاد الحارة اللي هناك، بتساعدهم”.

مشيرةً: “هي شخصية اجتماعية جدًا وشخصيتها قوية، فأنا كنت معجبة بيها جدًا، وبتوصلك المعلومة بطريقة حلوة جدًا”.

وضرب سلمى مثالًا، قائلةً: “فمثلًا حضرتك كنت بتقولي تعليق على الأداء، فقالت مثلًا البنات الشعبية لو هتكلمي اللي قدامك، اتعاملي معاه كأنه ولا سامع ولا شايف”.

متابعةً: “فتشرحي الكلمة اللي أنتي هتقوليها بإيديكي”، لافتةً: “هي بتوصل المعلومة بطريقة تحفة الصراحة”.

سلمى أبو ضيف: “أول ما قعدنا مع بعضينا كلنا باللبس بالأماكن اللي كانت أستاذة ياسمين مختاراها دخلنا في الحالة كلها”

مضيفةً: “وزي ما قلت حضرت إحنا أول ما قعدنا مع بعضينا كلنا باللبس بالأماكن، اللي كانت أستاذة ياسمين مختاراها بجد دخلتك في الحالة كلها”.

وهل إذا كانت طريقة اختيار سلمى لأدوارها ستختلف، قالت: “يعني لأ، زي ما بعمل دايمًا ورق كويس، مخرج كويس، شركة إنتاج كويسة”.

وبخصوص كون المسلسل أول بطولة لها، قالت: “آه الحمد لله، يعني كان بطولتنا كلنا مع بعضينا، واتوفقت إني أشتغل مع أستاذة ياسمين بصراحة والله العظيم”.

وأشارت: “هي اديتني فرصة هي والأستاذة سمر وشركة الإنتاج بجد الحمد لله، الحمد لله إن الموضوع حصل كده”.

سلمى أبو ضيف: “أنا ضد العنف المنزلي”

مواصلةً: “أنا فعلًا دايمًا ببص على فكرة الشخصية اللي متقدمالي شخصية حلوة، مع مخرج كويس وشركة إنتاج كويسة وورق كويس هيضيفلي حاجة”.

مكملةً: “هل أنا أبقى مستمتعة وأنا بقدم الحاجة دي ولا لأ؟، لأني هقعد كان شهر بصور كذا يوم، فلازم أنا أبقى حابة الشخصية دي، بغض النظر أنا عملت دور فيه مساحة أكبر أو لأ، المساحة مش حاسة إنها هتبقى المشكلة بالنسبة لي”.

ووجهت سلمى سؤالًا لكل المتواجدين في الستوديو، قائلةً: “هل مفروض لما حد يغلط يتضرب؟”، مشيرةً: “أنا مش عايزة أقول غير حاجة واحدة أنا ضد العنف المنزلي”.

وأتمت: “أنا بس علشان ماحدش يفهمني غلط، أنا مع إن لو حد عمل حاجة غلط يتعاقب، بس مش بالضرب، يعني أنا لو عملت حاجة غلط ماتضربش”.

أبطال “أعلى نسبة مشاهدة”

يشار إلى أن “أعلى نسبة مشاهدة” من بطولة سلمى أبو ضيف، ليلى زاهر، انتصار، محمد محمود، إنعام سالوسة، إسلام إبراهيم، أحمد فهيم، فرح يوسف وجلا هشام.

وكذلك محمد حاتم، إلهام صفي الدين، أمجد الحجار، أحمد الرافعي، عهد عبد المنعم، عمر زهران، همسة إمام، سلمى زكي، عنبر، شايما الشريف، نجلاء يونس وغيرهم.

إلى جانب عدد من الفنانين الذين ظهروا كضيوف شرف في العمل، ومن بينهم أحمد بدير، ماجدة منير وهند عبد الحليم.

يذكر أن المسلسل من فكرة وإخراج ياسمين أحمد كامل، تأليف سمر طاهر وإنتاج “E Producers” للمنتجين عبد الله أبو الفتوح ومحمد عبد الصمد.

Views: 1