شخصية قادرة على التحول من عمل لآخر قد شخصيتين بعيدة كل البعد في الموسم الرمضاني لهذا العام 2024 له بصمة خاصة في كل عمل يشارك به الفنان محمد التاجي صاحب الأعمال الكبيرة مثل العتاولة وجودر وغيرهم في حوار خاص للقائد نيوز ولكم نص الحوار
مسلسل العتاولة كان ليه شعبية ورد فعل حلو من الجمهور هل تتابع ردود الأفعال؟
طبعًا بتابع ردود الأفعال وبشوف كل اللي بيتكتب عن المسلسل وسعيد بردود الأفعال لأنه مسلسل مختلف وكان فيه نجوم كبار كلهم قاموا بأدوارهم بكل حب.
شخصية محمد التاجي في العتاولة كانت مفاجأة للجمهور لإنها مختلفة عن المعتاد إزاي عملت الدور دا؟
شخصية محمد التاجي الفنية مختلفه عن كل شخصية بيقدمها ماينفعش أقول إن دي الشخصية المختلفة أو العمل دا عملت الدور دا إزاي جالي واتبعتلي وكلمت المخرج وركزت في الشخصية وقرأتها واضافت لمساتي الخاصه للشخصية بعد الرجوع للمخرج وشخصية فوزي أنا شوفتها في حياتي وقابلت ناس بالكراكتر دا قبل كده.
قدمت على شخصية فوزي الراجل الكبير اللي عايش دور المراهقة فكرت ترفض الدور ولا قبلت على طول؟
قبلت على طول لإنها شخصية مستفزة وتثير الحالة الفنية فأكيد لو جت لأي فنان استحالة يعتزر عنها وأنا كل مابقدم شخصية مختلفة عن كراكتر حياتي الشخصية بيبقي ليها رونق خاص عندي.
تحب تقول ايه للراجل اللي في سن فوزى اللي بيجروا ورا بنات قد عيالهم ويقللوا من شخصيتهم في نظر اللي حواليهم بسبب هذا التصرف؟
والله أحب اقوله إنت شوفت النتيجة كانت ايه وممكن اية يكون جزاء هذا التصرف لإن مافيش بنت عاقلة وفي سن صغير هتعيش مع راجل قد أبوها أو أكبر الا إذا كان ليها أغراض خاصه عايزة تحققها من ورا مش هنقول بقى حب أو مش حب.
شايف عيسي الوزان وسترة العترة هما سبب نجاح المسلسل؟
لا طبعًا نجاح العمل مش مقتصر على حد بإسمه لإن أبطال العمل كلهم ساهموا في هذا النجاح وبرضو أحمد السقا وطارق لطفي والعظيم صلاح عبدالله اللي قدموا أدوارهم بسلاسة واتقان ومي كساب وزينه وميمي جمال وكل الزملا واللي اهم القائد اللي بيقود المجموعة كلها المخرج أحمد خالد فاماينفعش نقول نجاح العمل قايم على شخص او شخصين بس.
مي كساب قدمت الدور أكتر من ممتاز حسيت بتعاطف معاها كأب على اللي مرت بيه في المسلسل؟
طبعا مي كساب كانت من ضمن اللي فوقوا فوزي لنفسه ومن اول صدمات فوزي كانت احوال بنته وتحولها للحاله اللي كانت فيها ونكرانها انه اب ليها لإن هو كان عبد لنزواته الشخصية ورغباته ولم يرعي بنته الراعية الواجبه على أي أب تجاه ابنائه وكان لازم يكون ليها أب وأم ويعوضها عن فقدانها لأمها.
شايف نصار كان طريقة صح وخضر كان المفروض يسمع كلامه من الأول؟
الجانب الخير هو اللي كان منتصر على نصار ولكن لو خضر كان سمع كلامه ومشي في طريق الخير من الأول مكانش هيبقي فيه درامه أو أحداث تتقدم في هذا العمل.
شاركت في مسلسل جودر وهو الأكثر جدلًا من اول حلقه اتعرضت ليه احكيلنا عن تعاملت مع الفنان ياسر جلال وازاي كانت اجواء المسلسل؟
أجواء المسلسل كانت إيجابية جدًا وياسر جلال بيعرف يتعامل مع النجوم اللي معاه كويس وبيقدر الكل ودا مش أول تعامل بيني وبينه اتعاملت معاه من زمان هو رامز لإنهم ولاد صديقي الشخصي جلال توفيق وأول مسلسل لياسر ورامز كان إنتاج رياض العريان أبو طارق العريان وأنا بعتبر ياسر ورامز أخواتي الصغيرين أو أولادي علشان كده شهادتي في ياسر مجروحة.
شخصية الوزير قمر الزمان جهزتلها إزاي والأجواء بتاعة تجهيز الشخصية هل كانت فيها مشقة وتعب عليك؟
بداية تصوير المسلسل كانت معايا أنا وياسر جلال وياسمين رئيس لإن عيله شهريار وشهرزاد كانوا مجتعمين فكانت أجواء جميلة وحلوة ومكانش فيه أي تعب أو مشقة في الشخصية لإن كل التيم كان بيتعاون مع بعض.
في قائمة معموله مؤخراً عن أعلى أجور للفنانين وفي ناس وصل أجورهم في الأعمال إلى 40 مليون جنية شايف إن دا حقه؟ ولا باقي الفريق بيبقي مظلوم علشان دا البطل وهو اللي بيحدد؟
هل اللي كتب القايمة دا قدر يطلع على كل دفاتر شركات الإنتاج المختلفة علشان يقدر يقول دا بياخد كام ودا بياخد كام ولا الكلام دا من وحي خياله مقدرش أقول رأي لإن مافيش مايدل على صحة هذه المعلومة
شايف أن في عنصرية وتفرقة بين نجوم الشباك أو الصف الأول وبين المجتهدين اللي مش بياخدوا حقهم أو فرصتهم؟
نجوم الشباك هما اللي بيجيبوا الجمهور هما اللي بيجيبوا الإعلانات للعمل فأنا شايف مافيش تفرقة بين نجم شباك أو نجم شاب إن في يوم من الأيام النجم الشاب دا هيبقي نجم شباك وأكيد مش هيبقى ظالم حد بعده.
في الوقت الحالي بقي نجوم المهرجانات الشعبية بتمثل وتدخل المجال زي كزبرة وعنبة وغيرهم رأيك إن دا بيضيع هيبة الفن المصري؟
أولاً أنا معرفش مين عنبة وكزبرة دول ومعرفش مغنين المهرجانات الشعبية أصلًا وأنا شايف أن طلما معاهم إذن من نقابة الممثلين بتاعتنا يبقي أنا رأي مالهوش لازمة لإني مستحيل يدخلوا مجال التمثيل من نفسهم كده مافيش مخرج هيغامر المغامرة دي زي أنا مثلًا ماينفعش أروح أغني من نفسي.
Visits: 3
مساحة إعلانية
مساحة إعلانية