انتشرت في الآونة الآخيرة صورة لمطربي المهرجانات “حمو بيكا، حسن شاكوش، عمر كمال” وخلف كل مطرب منهم سيارة خاصة تقدر بملايين الجنيهات وبها أرقام لوحات للسيارة بأسمائهم.
وقد أبدى جمهور الفنانين استياءه من التباهي بالممتلكات في الصورة، وكان من ضمنهم ريهام سعيد التي عبرت عن استيائها من الصورة بكتابة تعليق “لا تعليق”.
ولكنها واجهت موجة من نوعية التعليقات “ما انتوا اللي بتعملولهم سعر باستضافتهم في برامجكم، مش انتي استضافتي حمو بيكا”.
وردت ريهام سعيد خلال برنامجها “هي وصبايا الخير” على قناة “هي” قائلة “أنا بحب حمو بيكا جدا وكنت مع حمو بيكا لما مكانش حد معاه، لما الاثنين اللي جمبه دلوقتي دول مكانوش معاه، لما مكانوش بيردوا عليه”.
وأضافت “وكنت معاه في أزمات كتير جدا زي أزمة النقابة، وأزمة القضية، وبحبه على المستوى الشخصي لإن هو إنسان مهذب الحقيقة”.
أما عن عمر كمال فقالت “عمر كمال فنان كبير، عمر كمال موهبة لا يستهان بيها صوتًا وتلحينًا، عمر كمال قصة على فكرة”.
ولكنها وثقت اعتراضها على الصورة للمرة الثانية قائلة “الصورة دي مينفعش تنزل، ليه أطلع في وقت ممكن يكون في ناس عندهم أزمات مادية اقولهم أنا معايا فلوس كتير أوي خصوصًا إن في ناس ممكن تعتبر مشواركم سهل”.
وأضافت “الفلوس الكتير اوي دي جت في وقت قصير من الغنا مش من الطرب، فليه أطلع أقول لشاب تعب في دراسته وبيشتغل الصبح وبالليل، أنا معايا ده وانت معكش؟!”
وأكملت “يعني لما دكتور يبقى قاعد في نبطشية الساعة 2 بالليل، درس 7 سنين وبيصرف على أهله وبياخدله 2000 ولا 3000 ج في الشهر ويلاقيك طالع ترقص ومتصور وراك عربية بحوالي 16 مليون جنية، وكل ده في سنتين، هيحس بإي؟!”
وأوضحت عدم ارتباط محتوى الكليب بالصورة قائلة “صورة زي دي ممكن تحبط ناس كتير، خصوصًا إن ملهاش علاقة بكليب الأغنية، اي علاقة الاغنية بالعربيات ونمرها؟!”.
وأردفت “كل واحد ربنا يزيده لكن مراعاة شعور الآخرين مهم جدًا، من حقك تفرح باللي انت حققته، لكن متطلعهوش للناس، ليه تخلي واحد يطلع على التيك توك يقطع شهادة التخرج بتاعته؟”.
وتحدثت عن سابقة محمد رمضان لهذه التصرفات قائلة “كان بيطلع يعمل كده وبطل خالص، لأنه لقى الناس بتتضايق، وكانت وجهة نظره إن هو بيشجع الشباب على الطموح، طب مهو تامر حسني بيشجعهم، لكن أنا معرفش عربية تامر حسني أي”.
وتساءلت عن هدفهم من وراء الصورة “انتوا بتحاولوا تقولولنا إن المهرجانات في أربع سنين بتجيب ملايين ملايين الجنيهات، وبتقولولهم احنا احسن منكوا يعني؟!”.
وأشارت إلى أن تلك التصرفات خاطئة ومن شأنها إفقادهم حب جمهورهم لهم، بسبب شعوره بالكبر والتعالي من قبلهم.
الجدير بالذكر أن ريهام سعيد على وشك مواجهة الطبيب اللبناني نادر صعب في قضية كان قد رفعها عليها وهي وقناة “هي” بتهمة التشهير به ونشر معلومات مغلوطة عنه.
Visits: 1
مساحة إعلانية
مساحة إعلانية