“وراء كل محنة منحة”.. زياد رحال من محارب للسرطان لصاحب أكاديمية لتدريب الكلاب

من رحم المعاناة يولد الأمل، زياد طارق أو زياد رحال شاب مصري مواليد عام 1999 حاصل على بكالريوس سياحة وفنادق عام 2016، تحول من محارب لمرض السرطان إلى صاحب أكاديمية لتدريب الكلاب تدعى “رحال أكاديمي” وأصبح أحد مشاهير السوشيال ميديا، وكشف زياد طارق عن مشواره ومعاناته مع مرض السرطان وبداياته في مجال تدريب الكلاب حتى أصبح صاحب أكاديمية.

وتحدث زياد عن ذاته وعن حبه للكلاب، وقال: “أنا أسمي زياد طارق والشهرة زياد رحال

بدأت في مجال تدريب الكلاب كان بعد معاناة من قصة كبيرة ليها علاقة بمرضي وكنت بتعالج في 57357 وكان الكانسر جايلي في الغدد اللمفاوية وكان مرحلة تالتة وكانت الدكاترة مبلغة والدي أن أنا هتوفى والحمد لله بعد معاناة كبيرة من المرض والدكاترة ربنا كرم وصحتي بقت أحسن”.

وتابع: “والدي كان من الشخصيات الصعبة جدًا وكان قافل عليا ولكن الموضوع بدأ معايا من الصفر من وأنا في ثانوية عامة وحصل خلافات ما بيني وما بين والدي وبدأت السيشنات بتاعتي وكانت أول سيشن بـ 15 ج وبعد كده ابتديت اتنقل من عميل لعميل وكان عندي خبرة شوية في حاجة إسمها network markting لأني كنت اشتغلت فيها فترة قبل علطول ما أبدأ في موضوع تدريب الكلاب”. 

وأضاف: “وكان بادئ معايا حبي لتدريب الكلاب من وأنا صغير وحبي للحيوانات بشكل عام لكن كنت بخاف منها وده خلاني أصر أن أنا أبقى مدرب وابتدي إني أكون فاهم الكلاب دي بتعمل إيه أو فاهم اللغة بتاعتها عشان مبقاش خايف واستغليت فكرة الـ network markting في طريقة تسويقي للشغل أن أنا أعرف أوقف الناس اللي ماشية في الشارع بالكلاب عشان أفتح مجال للكلام معاهم واعرفهم أن أنا مدرب بالكارنيه اللي معايا”.

وعند بدايته على مواقع السوشيال ميديا، قال: “إبتدا الموضوع معايا يتطور إن نزلت إعلان وبعدين إبتديت اشتغل على الموضوع واتعرفت في الإسكندرية وكان أول مكان اشتغلت فيه كان مزرعة كبيرة وحصل مابيني وبينهم خلاف لأن بعدها علطول اتواصلت مع أيمن مصطفى بتاع برنامج حياة كريمة كان منزل ستوري للكلب بتاعه وبعتله رسالة ومكنش في دماغي إنه يرد عليا ولكن بالفعل رد عليا ومن هنا أول بدايتي في السوشيال ميديا لأن أنا مكنتش حاطط في دماغي إنه يعملي أي ستوري أو حاجة ومكنش عندي صفحات ولا ليا فيديوهات أول مابعتله رد عليا وقالي خلاص هنظبط ميعاد وبالفعل روحتله وصورني فيديو عنده ومكنتش أعرف إنه هينزلي حاجة ومن هنا بدأ أول رقم ليا على السوشيال ميديا بسبب وبفضل أستاذ أيمن مصطفى إني يجيلي 865 واحد اليوم ده وبعد كده ابتديت أعمل فيديوهات على السوشيال ميديا لحد ما وصلت لنقطة أن أنا بقى عندي رحال أكاديمي والحمد لله ليا مشاهدات برا مصر وجوا مصر وطلعت في لقاءات تلفزيونية وبقى عندي تيم عمل كامل من خدمة عملاء لإدارة لمدربين وبقيت بلوجر بعمل إعلانات غير أن أنا خريج سياحة وفنادق وعندي باند مزيكا”.

Views: 110