تتمتع بقدرات فنية عالية تؤهلها من تقديم مختلف الأدوار، سواء الكوميدية أو التراجيدية، فتستطيع أن ترسم الإبتسامة على وجه المشاهدين بنفس قدرتها على جعلهم يبكون.
وهي فنانة ذات موهبة فنية خاصة جداً، تستطيع أن تقدم أدوار الخير مثلما تستطيع أن تقدم أدوار الشر وبنفس البراعة، فهي تتلون بين مختلف الأدوار لأنها فنانة متميزة ذات موهبة حقيقية.
إنها الفنانة الموهوبة مروة عيد، والتي تشارك في مسلسل كوبرا مع الفنان محمد إمام، الذي سيتم عرضه ابتداءً من اليوم ضمن أعمال النصف الثاني من شهر رمضان المبارك، وتقدم من خلاله شخصية زوزو.
وقد كان لموقع “القائد نيوز” مع مروة عيد هذا الحوار الممتع والشيق، حول شخصية زوزو في كوبرا.
من هي زوزو في كوبرا؟
زوزو هي فتاة شعبية، وأضافت ضاحكة: خايفة أتكلم أو أقول حاجة أحرق الدور.
وهل هذه المرة الأولى التي تقدمين فيها دوراً شعبياً؟
آه، أول مرة، يعني مرة عملت مع دكتور شريف صبري حلقة كانت في فيس أبوك سيت كوم، كان حلقة فيها دور شعبي من زمان أوي، بس دور حقيقي في مسلسل دي أول مرة.
وهل سعيدة بالتعاون مع الفنان محمد إمام؟
آه، مبسوطة.
ومع مَن مِن الفنانين ستكون أغلب مشاهدكِ؟
دوري كله مع أحمد فتحي ودنيا ماهر.
عندما طرح البوستر الأول للعمل كان يضم الأبطال الرجال، حتى أن بعض الناس ظنوا أنه لا يضم بطلات نساء، فما الفكرة في طرح بوستر يضم الأبطال الرجال فقط؟
أجابت ضاحكة: لأ فيه بنات، بس هتلاقي حتى البوسترات بتاعت البنات نازلة من فترة قريبة قبل رمضان بحوالي أسبوعين، أنا عايزة أقولك إني كنت لسه منضمة للمسلسل مؤخراً يعني مش من بدري، والدور جالي الحمد لله فجأة، هو 15 حلقة وأنا متواجدة فيهم، وأنا كنت لسه منضمة مؤخراً فماكنتش أعرف أي تفاصيل حتى لما صورت، وكان لسه قدامي الدور بتاعي كله.
أنتِ متواجدة في الـ15 حلقة كلهم؟
آه، يعني مثلاً لحد الـ13.
ليس مثل صوت وصورة، فكنتِ بمثابة ضيفة شرف فيه، أليس كذلك؟
لأ، صوت وصورة كان 30 أصلاً، وكنت آه ضيفة شرف فيه، لكن ده يعتبر دور كبير مع أحمد فتحي.
تجربة جديدة تماماً في المسلسل يحتوي على مشاهد أكشن، فكيف ترين ذلك؟
هو أكشن كوميدي.
وهذه المرة الأولى التي تقدمين فيها عملاً بهذا الشكل، هل هذا صحيح؟
آه، وأنا مبسوطة جداً بالتجربة، أنا أصلاً أستاذ أحمد شفيق طبعاً اشتغلت معاه كذا مرة، وأنا بحبه جداً ومخرج لطيف جداً، كأنه صديقنا وأخونا، وأول تجربة ليا مع أحمد فتحي ودنيا ماهر اتنين لذاذ ولطاف جداً، وشعبي كمان، الحاجات لطيفة الحمد لله.
هل أنتِ قلقة من أن المسلسل سيتم عرضه على قناة واحدة؟
لأ، مش قلقانة، أنا سعيدة جداً ومبسوطة جداً إني في مسلسل لمحمد إمام، أنا كان نفسي أشتغل في حاجة هو بيعملها.
هل وصلتكِ ردود أفعال مختلفة على صوت وصورة بعد عرضه مرة ثانية مؤخراً خاصةً أن العرض الأول للعمل كان في بداية أزمة فلسطين؟
هو فيه ردود أفعال جاتلي بس من الشارع، وأنا ماشية بشتري حاجة رايحة في مكان، حد يقولي أيوه أنتي، قاعدة في مكان ولا قاعدة في النادي، فحد يسلم عليا يقولي منك لله أنتي شريرة، الموضوع كان أروق بس حتى والله مع أزمة فلسطين كان الموضوع متشاف برضو، جالي ردود أفعال كتيرة أوي الحمد لله.
أنتِ تحبين الكوميديا، فحتى في صوت وصورة كانت الشخصية فيها بعض الكوميديا، أليس كذلك؟
فيها لمحة كده، أنا نفسي أعمل كوميدي بس هتيجي واحدة واحدة، بدي لمحة في النص من اللي أنا بعمله، إن شاء الله يبقى الدور ده لطيف.
تقومين بعمل ناقلات من الكوميديا وخفة الظل إلى التراجيديا والبكاء، ألا تكون هذه الناقلات صعبة عليكي أو مرهقة نفسياً عليكي؟
لأ خالص، الحمد لله، أنا بالنسبة لي أنا بحب ده، يعني أنا ممثلة، يا جماعة شكلوني زي ما الدور عايز، أنا أحب ده جداً ماعنديش أي أزمة في ده، بس اللي هو بصراحة أنا مابخترش، أنا لسه في إطار اللي هو يارب يجيلي دور كويس فأعمله، على حسب الدور اللي بيجيلي أنا بعمله فدي بقى اختيارات ربنا، مش اللي هو قاعدة بيجيلي ورق كتير فبختار منه، يعني أنا لسه مش في المرحلة دي بصراحة.
كان هناك عمل معروضاً عليكي للعرض على إحدى المنصات الإلكترونية، فهل ستشاركين في هذا العمل؟
للأسف ماتوفقتش فيها ماتفقتش يعني، كان دور في مسلسل دينا الشربيني وإياد نصار بس ماتوفقتش، يعني ماتفقناش في الفلوس للأسف.
وهل تشعرين أن كوبرا عوضك عن عدم مشاركتك في هذا المسلسل؟
آه، فكرة إني مع محمد إمام طبعاً، وإنه حاجة في رمضان، دي كانت حاجة نفسي فيها بقالي فترة، يعني دائماً بيجيلي الشغل في الأوف سيزون قليل أوي في رمضان، بس أنا شايفة اختيارات ربنا أفضل دايماً.
Visits: 36
مساحة إعلانية
مساحة إعلانية