حوار/ بسملة محمد
بعد غياب النجمة علا غانم عن الساحة الفنية لأكثر من 6 أعوام، عادت بقوتها إلى السينما من خلال مشاركتها في فيلم “أولاد حريم كريم”، الذي يعد الجزء الثاني من فيلم “حريم كريم” الذي عرض منذ 2005.
ولهذا كان لنا معها حوار خاص للحديث عن مشاركتها في أولاد حريم كريم، وعن سبب غيابها لأعوام كثيرة، وعن أعمالها القادمة أيضاً سواء الدرامية أو السينمائية، وجاء الحوار كالآتي:
* علا غانم رفضت أعمال كثيرة في الفترة الماضية.. فما الذي جذبها للمشاركة في أولاد حريم كريم ؟
اللي شجعني ألعب الدور في الجزء الثاني أولا لأنه مكتوب بشكل أحلى وعموماً الجزء الثاني من الفيلم كله مكتوب حلو وجيدا جدا ومقدرش أرفض، لأن الفيلم ده كله شلة لو الشلة دي كلها مكنتش موجوده يبقى هيفقد معناه، وكنت حبه أكون موجوده مع الأسرة الجميلة دي، خاصة أن مفيش حاجة عجبتني قبل كده أرجع بيها بعد غياب 6 سنين، فالدور كان مكتوب حلو أوي وفيه كل حاجه حب وضحك وهزار وكنت هزعل جدا لو مكنتش شاركت فيه.
* لم يكن يتوقع الجمهور إقامة جزء ثاني من فيلم حريم كريم.. فمن أين جاءت الفكرة بعد 18 سنة ؟
اللي أقترح ده الأستاذ علي إدريس المخرج، وكان بيحكي القصة وكل ما يحكيها لحد كان بيلاقي استحسان وكمان سأل الجمهور قبل أي حاجه وكله كان بيقول الله حلو هنستناه، فبالتالي بدأت الأستاذة زينب عزيز المؤلفة الكتابة في الجزء الثاني وبدأ الأستاذ علي إدريس يكلم نجوم الفيلم لحد لما قدر يجمعنا كلنا.
* ظهور جيل جديد في الفيلم لم يحدث قلق ؟
بالعكس إحنا بنقدم جيل جديد وأنا هكون أم لولد إسمه “كريم كريم”، ومعاه شباب تاني كتير بس أنا متحيزة لأبني لدرجة أن فريق العمل كله كان بيقولي الحمدالله أنك مش عندك ولد في الواقع، ومقدمين حوالي 3 أولاد و بنتين وبإذن الله هيعجبوا الجمهور ونكون فتحة خير عليهم بإذن الله.
* هل قصة الفيلم ما زالت مستمرة وتسمح بوجود جزء ثالث ؟
الحقيقة الجزء الثالث هيكون متوقف على نجاح الجزء الثاني اللي هيتعرض في نهاية الشهر يوم 30 أغسطس، واللي اتكتب واللي اتعمل فيلم أكثر من رائع وبالنسبة أنه هيطلع للنور فأنا واثقه في أستاذ علي لأنه قائد المسيرة بتاعتنا ولو نجح فأحتمال نعمل جزء ثالث بعد 18 سنة تاني كده.
* غياب بعض النجوم الأساسية في الفيلم لم يؤثر على الجزء الثاني في شيئ ؟
لا لأن مفيش حد أساسي غاب عن الفيلم كلنا موجود مفيش غير ياسمين عبد العزيز اللي مش موجوده لأن دورها انتهى في الجزء الأول لما أطلقت من مصطفى قمر، والثاني أستاذ طلعت زكريا الله يرحمه وده أقدار مش بتاعتنا وبيحل مكانه الأستاذ عمرو عبد الجليل طليقي في الفيلم وأبو أبني، والثالث أستاذ إدوارد لأنه متعلق بدور ياسمين لأنه كان إبن خالتها في الفيلم وكل عيلة ياسمين اختفت تماماً من العمل.
* إذن الأخبار التي انتشرت حول وجود خلاف بين مصطفى قمر و ياسمين عبد العزيز ما هي إلا شائعات فقط ؟
آه لأن مفيش فعلاً حاجه حصلت تخلي فيه خلاف مكنش فيه دور لياسمين في الفيلم ومصطفى عرض عليها ورفضت لا خالص مكنش في حاجة لياسمين واتلغت.
* هل أحداث فيلم أولاد حريم كريم مستكملة لأحداث فيلم حريم كريم أم مختلفة تماماً ؟
لا هو كل الأدوار بتكمل الجزء الأول أولهم أن مصطفى هيتجوز ويخلف بنت وأنا هيكون عندي ولد وكذا حد هيخلف وهنكون بنجوزهم كمان، ومفيش شخصية جديدة، وفي الواقع في فرق 18 سنة بين الجزئين، ولكن في الفيلم في فرق 25 سنة.
* أي السبب وراء غياب علا غانم عن الساحة الفنية لأكثر من 6 أعوام ؟
في الحقيقة أنا قررت إني أدي لنفسي إجازة مفتوحة لغاية لما كل حاجه توحشني من جديد ويبقى عندي طاقة أقدر أجدد بيها نشاطي الفني أو النص التاني من المشوار.
* هل في عمل قادم ل علا غانم بجانب أولاد حريم كريم ؟
في أعمال كتير معروضة عليا خاصة لرمضان 2024 وفي عمل سينمائي واحد، ولكن مقرتش الورق ولا قررت لحد دلوقتي، وأن شاء الله ربنا يوفقني ويختارلي الإختيار الأحسن.
Visits: 112
مساحة إعلانية
مساحة إعلانية