حوار/ بسملة محمد
تحدث الفنان القدير محمد التاجي، عن دوره في مسلسل “ألف ليلة وليلة” الذي يعرض ضمن السباق الرمضاني لعام 2024، وهو من بطولة النجم ياسر جلال والنجمة ياسمين رئيس.
وذلك عقب النجاح الذي حققه الفنان محمد التاجي في آخر ثلاث أعمال له وهم “الأجهر و الصندوق و اللعبة 4″، التي تم عرضهم في الفترة القليلة الماضية بعضهم كان في رمضان 2023 والآخر عقب إنتهاء الموسم الرمضاني.
لذالك حرص موقع القائد نيوز على أن يجري معه حواراً صحفياً للحديث عن دوره في ألف ليلة وليلة و عن رأيه في الدراما المصرية في الوقت الحالي، وجاء الحوار كالآتي:
* ما هو دور محمد التاجي في مسلسل “ألف ليلة وليلة” ؟
أجسد شخصية “قمر الزمان” رئيس وزراء شهريار، ووالد شهرزاد التي تجسدها النجمة ياسمين رئيس.
* ماذا عن تعاونك مع ياسر جلال و ياسمين رئيس؟
ياسمين وياسر دول “ولادي” مش أول مرة اشتغل معاهم، أنا اشتغلت مع ياسمين في مسلسل “ملوك الجدعنة” اللي اتعرض في رمضان 2021 وكنت عامل دور والدها بردو، وياسر أنا اشتغلت معاه من أيام ما كان طالب في المعهد هو وأخوه رامز، فهما ولادي بحكم أن والد ياسر كان صديقي جدا و بحكم أني عملت دور والد ياسمين مرتين.
* في تصريحات صحفية ل محمد التاجي وجدنا أنك ترى الدراما حالياً ظالمة للممثلين ف لماذا؟
لأن الدراما دلوقتي بتعتمد على نظام “الورش” والورش أثبتت أن مش كلها سليمة وفيها مواهب لأن الورش لازم يكون ليها قائد فاهم يعني أي كتابة ويعني أي سيناريو، وده مش موجود في الورش وده بيسيئ للعمل، وكمان مش عندنا مؤلفين كويسين فموضوع الورشة ده كلام فارغ مش بعترف بيه.
* إذن ما الذي تحتاجه الدراما المصرية لكي تعود إلى قوتها مرة أخرى؟
الدراما محتاجة مخرجين أقوياء وسيناريست أقوى، لأن مع الأسف العنصرين دول مبقوش موجودين كتير لكن في بعض المخرجين حالياً كويسين من الوجوه الجديدة تبشر بالخير، لكن السيناريوهات يعني ربنا يلهم الجميع ويعملوا شيئ كويس.
*لماذا محمد التاجي كان يرفض أن أحد يعلم بأن جده هو عبد الوارث عسر ؟
لأنه كان رافض إني أطلع على كتفه، وأن اللي عاوز يشغلني عشان موهبتي مش عشان أنا حفيده فعشان كده مكنتش بقول.
* عندما يكبر الفنان في السن تكثر الإشاعات حوله.. فكيف يتعامل محمد التاجي مع الشائعات ؟
أنا الحمدالله مش بيطلع عليا شائعات كتير لو مثلا طلع عليا شائعة الموت ف الأعمار بيد الله، غير كده مفيش شيئ في حياتي يخليني مثل “اللبانة على الألسن”.
* ما السبب الذي يجعل محمد التاجي يكرر التعاون مثلما فعل مع مصطفى شعبان و ياسمين رئيس وياسر جلال؟
في الحقيقة إني بشعر بالراحة وده أهم شيئ أن الشخص يحس بالراحة مع الممثل اللي معاه وتجربتي مع مصطفى شعبان كانت سليمة جدا واشتغلت معاه في عملين هم “ملوك الجدعنة و دايما عامر”، ومصطفى شعبان من الممثلين الأقوياء جداً ومن مميزاته الشعور بالراحة في التعامل معاه.
* هل من الممكن أن محمد التاجي يفكر في إعتزال الفن ؟
لا أفكر أبدا في الاعتزال لأني هعتزل ليه ومفكرتش في كدا في يوم من الأيام، لأني مش بقدم حاجة أخجل منها ولا حاجة تغضب ربنا سبحانه وتعالى وده الأهم فمعنديش حاجة تخليني أعتزل الفن.
* هل في أعمال قادمة ل محمد التاجي بجانب مسلسل “ألف ليلة وليلة” ؟
أنا حالياً مركز في تصوير مسلسل ألف ليلة وليلة وهو من إخراج إسلام خيري وسيناريو أنور عبد المغيث، وده من المفارقات حالياً لأنه مؤلف من الجيل القديم اللي بيكتب العمل وبعدين يقدمه، والعمل معانا ال 30 حلقة، وابتدينا في التصوير من بدري عشان هو محتاج تجهيزات وشغل كتير أوي وبننجز فيه الحمدالله وبإذن الله الناس هتشوفه في رمضان 2024.
Visits: 82
مساحة إعلانية
مساحة إعلانية