حوار/ بسملة محمد
جذبت الفنانة التونسية ساندي علي، الأنظار حولها بعد أن أبدعت في دور البنت الإسكندرانية الشعبية الشقية “نسمة” التي تقع في حب “إبراهيم” أحمد السعدني ولكن إبراهيم يحب “نبيلة” هنا الزاهد.
وبعد عرض أربع حلقات فقط من مسلسل “سيب وأنا أسيب” كثرت الأقاويل حول شخصية “نسمة” التي تجسدها الفنانة ساندي علي، وانشغلت العقول بمقولة واحده وهي “نسمة هتقدر تفوز بقلب إبراهيم ولا نبيلة هتمنعها”.
وبعد ذلك النجاح الذي حققته الفنانة ساندي علي في المسلسل الأكثر مشاهدة على منصة شاهد الرقمية “سيب وأنا أسيب”، حرص موقع القائد نيوز على أن يجري معها حوار خاص للحديث عن دورها في العمل، وجاء الحوار كالآتي:
* من الذي رشح ساندي لدور نسمة في سيب وأنا أسيب ؟
المخرج أستاذ وائل إحسان هو اللي رشحني لدور نسمة وأول ما بعتلي الورق وقصة الفيلم عجبتني جدا لأني بحب المسلسلات الكوميدية جداً فأنبسط أوي بالدور، وانجذبت للدور لأنه دور “شقي” جداً ومختلف تماماً عن كل ما قدمته قبل كده.
* هل في النهاية نسمة هتقدر توصل ل قلب إبراهيم ولا لا ؟
كله هيظهر في النهاية مقدرش أقول حاجه بس في مفاجأة قوية جداً في النهاية.
* هل دور نسمة “البنت الشعبية الشقية” كان سهل على ساندي ؟
لا كان صعب أوي عليا لأني بعمل دور بنت إسكندرانية شقية في حارة شعبية فكان صعب أوي لأنه دور جديد عليا.
* ماذا عن كواليس العمل مع هنا الزاهد وأحمد السعدني ؟
أحمد السعدني مش أول مرة أشتغل معاه دي تاني مرة فكانت كواليسنا حلوة جدا، وبالنسبالي هنا الزاهد هي اللي جديدة أول مرة أشتغل معاها بس هي بنوتة كيوت أوي باربي وبيبي في نفسها كده كانت قمر بصراحة، فكانت الكواليس فعلاً حلوة أوي معاهم وكنا بنصور في بيروت قعدنا شهرين هناك بس كلنا كنا جروب حلو كنا مبسوطين جداً وبنحب بعض جداً، فالعمل كان حلو أوي.
* إذن ساندي مستعدة أن تتعاون مع هنا والسعدني مرة أخرى ؟
أكيد طبعاً طبعاً أه هنبسط أوي لأنه من أكتر اللوكيشن القريب لقلبي في كذا عمل اشتركت فيه بس ده أقربهم لقلبي.
* لماذا ساندي علي مقلة في الظهور إلى حد ما ؟
دي حقيقة فعلاً والجملة دي بتضايقني لأني بشتغل مش مقللة أنا كل سنة بعمل عمل بس المشكلة أن الناس ربطاني بالأفلام انا بقالي سبع سنين موقفه أفلام عشان قلة الأفلام بس أنا مركزة ومكثفة في أعمال الدراما بس الناس مش متعودة عليا في التلفزيون فحسيت إني لو معملتش عمل على شاهد مكنتش هظهر أوي لأن في ناس كتير اوي بتتفرج على شاهد ونتفلكس، ولكن الأعمال مع الأسف مش بتتشاف زي زمان، وقبل مسلسل سيب وأنا أسيب كنت عامله مسلسل في رمضان 2022 مع حسن الرداد بس متشافش من الناس وكان بيتذاع على قناة الحياة.
* ساندي شاركت في الدراما المصرية و الدراما التونسية فأيهما أفضل وأي الاختلاف بينهم ؟
في اختلاف كبير جداً طبعاً ومفيش حاجه إسمها الأفضل بس الدراما المصرية لا يعلى عليها لأن مصر أساس الوطن العربي كله وأنا اتربيت على الدراما المصرية وبالنسبالي الدراما المصرية هي “هوليود الشرق”، الدراما التونسية بعيدة جداً عن المصرية في العادات والتقاليد و الطعم والحياة عموماً مختلفة تماماً، وكان صعب عليا أوي التمثيل في تونس عكس مصر عشان الدراما التونسية بالنسبالي جديدة وطريقة تمثيل جديدة، وكل واحده فيهم وليها حلاوتها.
* هل بعد سيب وأنا أسيب تشارك ساندي في عمل آخر قريباً؟
في حاجات جديدة من ضمنهم مسرح وتلفزيون بس لسه مستقرتش على حاجه لسه ممضتش على أي عمل فيهم.
Visits: 72
مساحة إعلانية
مساحة إعلانية