حوار: ياسر خالد
*ماكياج “المداح” كان صعب ومن حسن حظي ماكنش فيه لينسز كان جرافيك
*مبسوطة إن الجمهور اتعلق بشخصيات “أعلى نسبة مشاهدة” وفهموا رسالته
*رحمة موجودة في حياة كل واحد فينا بس مابنبقاش واخدين بالنا منها
*الكيميا بيني وبين ليلى أحمد زاهر لذيذة وهي جميلة جدًا في الحقيقة
فنانة شابة تتمتع بقدر عالٍ من الموهوبة والحضور، بدأت من خلال مسلسل “هذا المساء” ثم توالت بعدها أعمالها الفنية التي تألقت من خلالها، مؤكدةً أنها صاحبة قدرات تمثيلية كبيرة.
فأثبتت عملًا تلو الآخر أنها تمتلك موهبةً حقيقيةً تمكنها من تقديم مختلف الأدوار، سواء أكانت كوميديةً أو تراجيديةً، إذ أن لديها حس فني عالٍ يؤهلها من لعب جميع الشخصيات.
إنها الفنانة الشابة عهد عبد المنعم، التي تشارك خلال شهر رمضان الحالي بمسلسل “المداح 4“، بجانب مشاركتها بمسلسل “أعلى نسبة مشاهدة”، الذي عُرض في النصف الأول من رمضان.
وقد كان لموقع “القائد نيوز” هذا الحوار الممتع والشيق مع عهد عبد المنعم حول مشاركتها في كلا العملين، فإلى نص الحوار…
تشاركين بعملين في رمضان أعلى نسبة مشاهدة والمداح 4.. ألم يكن ذلك إرهاقًا عليكِ؟
ماكنش إرهاق أوي، لأن كان فيه أيام بسيطة قبل ما أبدأ أعلى نسبة مشاهدة.
وبماذا شعرتِ عندما عُرض عليكِ المداح 4 وعلمتِ أنكِ ستظهرين فيه كروح؟
تحسمت جدًا أولًا لأني هشتغل في المداح، وثانيًا لأني كنت عارفة إن الدور مهم ومؤثر وهتكون بداية قوية للمسلسل، وفعلًا طلعنا تريند من أول حلقة.
هل ماكياج المداح كان صعبًا؟ وكذلك وضع اللينسز عند انقلاب عين الشخصية؟
مكياج المداح كان فعلًا صعب وكل شوية بيروح ونعيد عليه، بس الأصعب إننا كنا بنصور في الشمس في أسوان، وبالمناسبة حابة أشكر الماكييرة هبة راضي لأنها تعبت معايا جدًا.
بالنسبة للينسز، من حسن حظي الحمد لله إنه ماكنش فيه لينسز كان جرافيك.
هل قابلتكم ظواهر غريبة أثناء تصوير المداح؟
فعلًا قابلنا ظاهرة غريبة، لما كنا واقفين قدام الباب واتفتح على مصراعيه، الباب اتفتح لوحده بجد وكلنا اتخضينا ووقفنا تصوير.
وساعتها افتكرت كل الكلام، اللي كان بيتقال إن حصلت حاجات غريبة في الأجزاء اللي فاتت.
كيف ترين النجاح الساحق لأعلى نسبة مشاهدة؟
مبسوطة جدًا إن المسلسل حقق النجاح ده، ومبسوطة أكتر إن الجمهور اتعلق بشخصياته وفرحوا وبكوا معاهم وإنهم فهموا رسالة العمل.
وحقيقي الكرو كله تعب جدًا من أصغر حد لأكبر حد، والشغل كان بيسير على قدم و ساق، عشان العمل يطلع بالجمال ده.
رحمة تركيبة غريبة جدًا، فهي شريرة و”بتقوم نسمة على شيماء” لكنها لا تريد لـ شيماء أن تتأذى.. كيف ترين هذا التناقض؟
مش شايفة إن رحمة متناقضة، رحمة موجودة في حياة كل واحد فينا بس مابنبقاش واخدين بالنا منها، فيه ناس كل همهم إنهم يوقوعوا الناس في بعض بس من غير ما يبان انهم السبب، بيحبوا بس إن الناس مايبقوش بخير، لكن مش لدرجة إن يحصلهم مصايب كبيرة.
هل قمتِ بالنزول إلى أحياء شعبية حتى تعرفي طريقة كلام الفتيات هناك قبل ما تقدمين رحمة؟
إحنا كنا في الحطابة فده لوحده كان مرجع ليا، وكنت بتعامل مع كل الناس وأكيد مر عليا شخصيات كتير زي شخصية رحمة، فاكتسبت منهم الطريقة.
حدثيني عن الكيميا بينكِ وبين الفناتة ليلى زاهر خصوصًا أن أغلب مشاهدكِ معها؟
الكيميا بيني وبين ليلى لذيذة جدًا، كنا بنراجع المشاهد مع بعض كتير جدًا وكنا بنساعد بعض، وكنت بضيف حاجات للمشاهد وهي بتضيف حاجات.
والحمد لله الجمهور حب علاقتهم ببعض، وليلى شخصية جميلة جدًا في الحقيقة ولذيذة.
هل ترين أن بعد أعلى نسبة مشاهدة أن بعض الناس من الممكن أن يتعاطفوا مع مودة الأدهم وحنين حسام مثلما تعاطفوا مع شيماء؟
ممكن، لكن المسلسل هنا بيوعي الناس إنه ممكن تكون مش قاصد تعمل حاجه غلط، لكن السوشيال ميديا توصل في النهاية للسجن لو اُستخدمت من غير وعي كفاية زي شيماء.
هل ترين أن التيك توك خاصةً والسوشيال ميديا عامةً لابد أن يكون عليها رقابة؟
آه، شايفة إنه لازم يكون عليها رقابة، لأن حقيقي التواصل الاجتماعي سلاح ذو حدين، وللأسف الناس بقوا بيستخدموا بالطريقة الأسواء مش الأحسن.
هل تأخذ السوشيال ميديا وقتًا كبيرًا في حياتكِ؟
آه، بتاخد وقت لكن مش كبير للدرجة، لأني بحاول أهتم بحاجات تانية وأطور من نفسي، أقرأ كتب أو روايات و بذاكر، فبحاول أخليها للتسلية بس.
Visits: 14
مساحة إعلانية
مساحة إعلانية