شيرين مؤكدةً ما قيل على لسان حسام حبيب في التسريبات: “أخويا فعلًا باعني”

كتب: ياسر خالد

ردت الفنانة شيرين عبد الوهاب على أزمة التسريبات الصوتية الأخيرة الخاصة بزوجها السابق الفنان حسام حبيب، والتي تحدث خلالها عن شقيقها محمد عبد الوهاب.

وعلقت شيرين على الأمر في تسجيل صوتي مع الإعلامي عمرو أديب قام بعرضه، خلال حلقة الأمس من برنامجه الحكاية المذاع عبر قناة mbc مصر.

شيرين عبد الوهاب: “كلام حسام مظبوط جدًا”

وكشفت شيرين صحة ما قاله حسام حبيب عن محمد عبد الوهاب في التسريبات، قائلةً: “أنا فوجئت طبعًا باللي حصل على السوشيال ميديا بين محمد عبد الوهاب وبين حسام حبيب، وأنا حبيت أؤكد إن كلام حسام مظبوط جدًا جدًا وإن أخويا فعلًا باعني”.

كما أوضحت كيفية تسريب التصريح الذي قاله حسام، كاشفةً: “والتصريح اللي نزل ده نزل من محامي محمد شاعر، اللي هو مستولي على السوشيال ميديا بتاعتي وبتوكيل أنا كنت عاملاه له، بتوكيل عام قديم مضاه له ورقة أو عقد بتخليه يحصل على السوشيال ميديا بتاعتي، موقعين بتاريخ قديم”.

شيرين عبد الوهاب: “فيه أغاني حلوة جدًا”

وأضافت: “كل اللي قاله حسام مظبوط، أنا مابحبش أتكلم عن مشاكلي الشخصية يمكن علشان ماشغلش حد، والناس ماتقعدش تقول إحنا ماورناش غير شيرين ومشاكل شيرين”.

وكشفت شيرين عن تحضيرها لأغانٍ جديدة، قائلةً: “بس اللي لازم تفهموه إن فيه أغاني حلوة جدًا جدًا جدًا توما عاملها وعزيز الشافعي ومدين، فيه شوية حاجات بتخلص عشان تصريحات وأوراق وكده علشان المشاكل اللي مع الشركة المنتجة اللي تخصني”.

شيرين عبد الوهاب: “فيه حد بشخصه قاصد يقعدني في البيت”

وأشارت إلى أن هنا شخص بعينه يقصد أن يجلسها في البيت، موضحةً: “اللي هي كمان فيه حد بشخصه قاصد يقعدني في البيت، فبنخلص الحاجات دي والأغاني هتنزل وهتعجبكم جدًا جدًا”.

وتابعت: “وعايزاكم ماتصدقوش أي حاجة من محمد عبد الوهاب، وبإذن الله الأغاني لما تنزل تعجبكم، بس مشكور إنه بيرد بالنيابة عن أهلي، هو اللي بيقول الحقيقة مش أهلي”.

شيرين عبد الوهاب عن قضايا روتانا ضدها: “أنا واثقة في نزاهة قضاء بلدي”

ولفتت: “وكمان عايزة أقول إن برغم إن المحكمة حكمت القضاء المصري بإن عقدي انتهى مع روتانا، هما لسه رافعين قضايا عليا وموقفين الدنيا كلها، بس أنا واثقة في نزاهة قضاء بلدي”.

وأكملت: “أنا آسف إني ممكن أكون بشغلكم بأخبار بس أنا اضطريت لده، لأني الحقيقة صحيت من النوم لقيت السوشيال ميديا مقلوبة، يعني أنا ماليش دخل في اللي بيحصل ده”.

وواصلت: “صدقوني أنا مش عايزة أضايقكم بأي اخبار عني لا حلوة ولا وحشة، علشان إن كل واحد فيكم أكيد عنده همومه وعنده مشاكل، فمفيش في الدنيا غير شيرين يعني، ده اللي بيتقال وإحنا ماعندناش غير شيرين كل شوية شيرين شيرين”.

شيرين عبد الوهاب: “ماتصدقوش غير البيانات اللي بتنزل من مكتب الأستاذ ياسر قنطوش”

ولفتت: “صدقوني أنا مش قصدي ده دليل إني كنت ساكتة طول الفترة اللي فاتت مابتكلمش في أي تصريحات ولا أي حاجة، بس عمومًا أنتم أهلي، وفعلًا أثبتوا لي إنكم أهلي وسندي بتردوا غيبتي وبتقفوا لي”.

وأتمت شيرين: “وكمان بعد إذنكم فيه بيان رسمي هينزل من مكتبي مكتب أستاذ ياسر قنطوش هيكون فيه كلام أوضح وأي حاجة حصلت، ويا ريت ماتصدقوش غير البيانات اللي بتنزل من مكتب الأستاذ ياسر قنطوش، دي بتبقى تصريح مني شخصيًا، غير كده دي إشاعات وأكاذيب ماتصدقوهاش، وأنتم عارفين مين هو اللي بيقول الحقيقة مش أهلي”.

آخر أعمال شيرين عبد الوهاب

من ناحية أخرى، كانت آخر أعمال شيرين أغنية “الدهب” التي طرحتها في فبراير الماضي، وهي من كلمات تامر حسين، ألحان مدين وتوزيع توما.

كما كانت قد طرحت قبلها أغنية “المترو”، وتحديدًا في أكتوبر من عام 2022، وهي من كلمات أمير طعيمة، ألحان عمرو مصطفى، توزيع نابلسي وتسجيل، ميكس وماستر طارق مدكور.

إلى جانب قيام شيرين عبد الوهاب بغناء تتر مسلسل “لحم غزال” للفنانة غادة عبد الرازق، والذي عرض في رمضان لعام 2021، وحمل التتر عنوان “وشي الحقيقي”.

ويذكر أن “وشي الحقيقي” من كلمات بدوي جمعة، ألحان محمد رحيم، توزيع أمير سمير، تسجيل SADO، ميكس وماستر خالد سند.

Views: 4