هيثم سعيد للقائد نيوز : “النادي الأهلي بيتجامل وبيتخاف منه” 

حوار الصحفي : أحمد سالم 

يستعد ناديا الأهلي والزمالك للنهائي، قارة أفريقيا بمواجهة نادي الأهلي لنادي الترجي التونسي، في نهائي دوري أبطال أفريقيا، ومواجهة الزمالك، ونهضة بركان المغربي، في نهائي الكونفيدرالية الأفريقية.

المحلل الرياضي هيثم سعيد، البالغ من العمر 37 عام، الشهير بتشجيعه للزمالك، في حوار خاص مع القائد نيوز :

إيه النقاط اللي الزمالك المفروض يطورها لتلاشي عقبات نهائي الكونفيدرالية؟ 

التأمين الدفاعي وطبعاً الماتش الأولاني ممكن يدينا تارجت 60 %؛ لأن الزمالك محتاج يسجل هدف للتتويج بالبطولة، بس الأهم أنك ميجيش فيك هدف، فالأهم أنك تأمن دفاعك، عشان عندنا مشاكل كثيرة أوي بين حسام عبد المجيد، وبين المثلوثي، وعمر جابر، وأحمد فتوح، وعواد، لو حد فيهم مش في حالته بتبقى مشكلة كبيرة، في المباراة الأولى الهدفين أخطاء دفاعية فردية، سواء حسام عبد المجيد، في ضربة الجزاء، أو عواد لأنه مش بياخد خطوة تحت العارضة عشان يقدر يتلاشى الموقف اللي حصل في الهدفين، فأنا شايف إن جوميز لازم يركز في المنطقة الدفاعية جداً، لأن لو دخل فيك هدف الموقف يتصعب ساعتها تحتاج 3 أهداف، فتأمن المنطقة الدفاعية وبعدها تأمن المكان بتاع زيزو ومصطفى شلبي اللي الحمد لله رجعلك، والجزيري، وأحمد حمدي، ومحمد شحاته، وانا شايف إن من بداية المباراة لازم يبدأ بمحمد شحاته، ودونجا، وأحمد حمدي، عشان الناس دي تقدر تديك أريحية في نص الملعب، وتقدر تشتغل عليهم في نص الملعب.

توقعك لتشكيل الزمالك ضد نهضة البركان؟ 

حراسة المرمى : محمد عواد

خط الدفاع : فتوح، حسام عبد المجيد، حمزة المثلوثي، عمر جابر.

خط الوسط : محمد شحاته، دونجا.

خط الوسط الهجومي : مصطفى شلبي، أحمد حمدي / أوباما ، زيزو.

خط الهجوم : الجزيري.

نسبة فوز الزمالك بكأس الكونفيدرالية ونسبة فوز الأهلي بكأس أفريقيا قد ايه من وجهة نظرك؟

نسبة فوز الزمالك 60 أو 65 ٪ وده عشان مباراة الأولى اللي اتلعبت، في نتيجة تبين لك إن الزمالك عايز إيه من الماتش لأن الماتش لو خلص 1 : 0 للزمالك خلاص الزمالك يعتبر خد البطولة، بالنسبة للأهلي منضمنش حاجة لحد دلوقتي بس هي بنسبة 50 : 50، لأن الترجي بقاله فترة فايق ولعب ماتشات كبيرة في دوري أبطال إفريقيا، كانت البداية معاه سيئة لغاية ما جاب المدرب الجديد، اللي بدأ ينشط الفرقة بتاعته، وعاملين مباريات كثير كلين شيت، ودفاعهم كويس جداً، ونتيجة النهاردة هي اللي تحدد سواء الكفة تميل للأهلي أو تميل للترجي.

من هم أفضل لاعبين بالنسبالك في الزمالك والأهلي الآن وعبر التاريخ؟ 

بالنسبة للزمالك : عبد الحليم علي، حازم إمام، محمد عبد الشافي، شيكابالا، حسام وإبراهيم حسن، مدحت عبد الهادي.

بالنسبة للأهلي : حسام وإبراهيم حسن لأنهم عامل مشترك بين الأهلي والزمالك، الحضري، عماد متعب، وائل جمعة، محمد أبو تريكة، أحمد فتحي، محمد عبد الوهاب، حسام غالي، محمد بركات.

إيه هي النصائح اللي تقدمها للزمالك الفترة القادمة؟ 

أهم نصيحة أقدمها إننا نقفل على الفرق كلها، وجميع الألعاب، ونعيد ترتيب البيت من تاني كويس، بالنسبة لفريق كورة القدم محتاجين اهتمام على مستوى جميع الأعمار، ومحتاج تدعم وتجيب لاعيبة، فبقدم النصيحة لمجلس الإدارة، أما الإدارة الفنية بتتغير كل فترة، وعلى حسب إنجازاتها يعني ممكن جوميز لو خد الكونفيدرالية يكمل، لو مخدش الكونفدرالية ممكن يمشي، فأنت متقدرش تقدم نصيحة لمدير الفني وخصوصاً، في الزمالك عكس الأهلي لأن كل سنة أو سنتين بيغيروا مدير فني.

تتمني الزمالك يدعم صفوفه بمين من اللاعيبة لو القيد اتفتح؟

الزمالك محتاج 7 لاعيبة حارس مرمى وفي الدوري المصري قناعتي الشخصية بسام وحارس بيراميدز أحمد ميهوب مع أحمد نادر السيد ، 2 مساكين لأن الونش مصاب، محتاج فرود كويس جداً، محتاج ديفيندر رقم 6 كويس جدا، باك ليفت برغم وجود فتوح لأنك محتاج حد يكون بديل لفتوح، عشان يبقى قلقان على المركز بتاعه لأن اللاعب المصري طول ما هو مستريح بيلعب باستهتار ، باك رايت.

شايف شيكابالا يكمل ولا يعتزل؟

لو خدنا الكونفدرالية شيكابالا يرفع الكأس، ويكمل الموسم، ويعلن اعتزاله، لو مخدنهاش لو هو قادر يكمل موسم كمان والإدارة شايفه أنه قادر يساعد الفريق، ودوره مهم، ويبقي ليه تأثير يبقى خلاص يكمل، لكن لو خدنا الكونفيدرالية بنصحه بالاعتزال؛ لأن أحسن وقت تعتزل فيه وأنت بترفع الكأس.

زعلان من إمام عاشور بسبب انتقاله للأهلي؟

إمام عاشور من الجانب الفني هو أحسن رقم 8 في مصر، فأكيد زعلان بسبب نقطتين، أول نقطة لأن أمام لاعب جيد جداً، أضاف لقوام بتاع النادي الأهلي، لما تشوف النادي الأهلي أول حد بتدور عليه أمام عاشور، ثاني حاجه أضعفت الاسكواد بتاعي لما إمام سافر الدنمارك، وربنا موفقوش لأي أسباب ما، ورجع على الزمالك يبقى بقى مع زيزو، وفتوح، وعبد الله السعيد، وأحمد حمدي، وناصر ماه،ر والجزيري، وكان مع وجود عبد الله السعيد يفرق جداً، كان هو اللي يبني الهجمة من ورا، وكانوا يعملوا ثنائية جامدة جداً، وقوة نص النادي الأهلي 50 ٪ منها إمام عاشور.

شايف إن نادي الزمالك بيتعرض لظلم تحكيمي واضح لصالح نادي معين وإن الدنيا كلها بتحارب الزمالك ولا كلام بيقوله الجماهير بيصبروا نفسهم بيه لما الزمالك بيتعرض للخسارة؟

في تحفيل كبير بين جماهير الأهلي والزمالك، وبرضو الإسماعيلي والمصري، يعني مثلا ماتش فيوتشر وبيراميدز، تلاقي جماهير الأهلي بتقول إن الدوري موجه لبيراميدز، وإن الدولة عايزة بيراميدز ياخد الدوري، والنادي الأهلي بيتجامل وبيتخاف منه، وبيتخاف من الجمهور بتاعه، الدولة بتعملهم حساب، بس في نقط معينة توضحلك في عين الاعتبار إن النادي الأهلي رقم واحد، والدولة بتزيل أي عواقب قدام الأهلي، وده قرارات إدارية، والظلم التحكيمي التحكيم سيء على الجميع، سواء الأهلي أو الزمالك أو الإسماعيلي أو المصري أو فيوتشر وبيراميدز، وكل الفرق، ولو حلو بيبقى حلو على كل الفرق، يعني مؤشر التحكيم ده سواء حلو أو وحش بيبقي على كل الفرق مش الأهلي والزمالك بس.

كابتن هيثم تتمني السوبر الإفريقي يكون مصري؟ 

اتمناها للترجي بما إني زملكاوي لعدة أسباب، أول سبب إن بطولات الخصم بتاعي متزيدش عن كدا، لما تاخد إفريقيا تزيد، وتقابلني في السوبر، وربنا يوفقك تزيد أكثر، لكن كوطنية أتمنى طبعا الاثنين يكونوا في محفل السوبر الإفريقي ولكن أتمنى الزمالك يتوج بالسوبر طبعا.

إيه رأيك في الكلام اللي قاله فاروق جعفر قبل كدا إن لما بطلب ضربة جزاء بيجيلي ضربة جزاء؟

ترندات عارف إيه اللي كان بيعجبني في مرتضي منصور إنه بيقول الشخص ده قال كذا، بيعجبني إنه بيوجه كلامه للشخص، لكن فاروق جعفر، ومصطفى عبده، وشادي محمد، بيقول أصل أنا حصل معايا كذا، مبيذكرش مين يا إما بيقول حكم أجنبي أصلا مبطل من بدري، عشان محدش يعمل مرجعية عليه، والكلام ده كله ترندات سوشيال ميديا، زي إبراهيم سعيد على شيكابالا، وزي كابتن طارق يحيي.

تقول إيه للاتحاد الكورة انه يطور من الكورة المصرية خصوصا أنه مع مشكلة بتاعت النادي الأهلي عندما أخفوا المستندات وبعد مشاكل نادي الزمالك بتاعت قفل القيد؟

أنا مقدرش أجزم إن اتحاد الكورة أخفى المستندات عشان بطولة إفريقيا تتوجه، لكن على مستوى الدوري ومستوى البطولات المحلية في مصر، في تأثير كبير جداً من اتحاد الكورة، محتاجين يشتغلوا على الملاعب، والإخراج، ونظام الجدول، أنت دلوقتي لما بتشوف الدوري السعودي كان متأخر عنك بمراحل، ومكنش حد بيتابعه، بعيداً عن لاعيبة الأجانب بص على الملاعب، والتصوير، وجدول الدوري، وانتظامه، حتى لو في فريق بيلعب في الدوري السعودي مبيقلوش ان الاتحاد بيلعب في آسيا، ومشرف السعودية مفيش حاجه اسمها مشرف السعودية، ومشرف مصر، والكلام ده، فلازم الدوري المصري يبقي منتظم في كل حاجه من ناحية التصوير والإضاءة والملاعب وانتظام الجداول والتحكيم والمعلقين.

تنصح مجال الإعلام بإيه أن دلوقتي مجال الإعلام يا إما بيتجه ناحية الزمالك يا إما بيتجه ناحية الأهلي مفيش أي حد محايد؟

مفيش أي حاجه اسمها محايد، بس في حاجه اسمها أنت حقاني، أنت بتطلع الصورة زي ما هي، من غير تدليس فيها، وبينقلها بصورة تانية، أنا من ساعة ما اشتغلت على سوشيال ميديا أعلنت إني زملكاوي، وبشجع الزمالك، وبتاثر بالهزيمة، لكن في أغلب الأوقات ومش أقول 100 ٪ لكن 80 ٪ بحاول أكون معتدل، وحقاني في رؤيتي، ونقل المواضيع بطريقة حقانية، لكن أحمد شوبير أهلاوي، وسيف زاهر أهلاوي، حازم إمام زملكاوي، عماد متعب أهلاوي، الناس دي ليها انتماء لكن أنت بتطلع تكلم بلسانك، تتكلم بانتمائك يبقى غلط، لكن الكل ماشي تبع الترند، زي رضا عبد العال، اللي شايفهم محايدين في مجال الإعلام، محمد المحمودي، كريم خطاب، الناس اللي مش صف أول لأن جمهور الأهلي عايز يسند الأهلاوي اللي زيه، والزملكاوي كذلك، وبالنسبة للصف الأول، إبراهيم فايق محايد وهو أهلاوي لكن بيبان من فرحته أو حزنه بس هو أنجحهم في الاعتدال.

Views: 66