حوار: ياسر خالد
*مش شرط علشان تبقى بطل عالم وواخد 100 بطولة عالم تبقى مدرب شاطر
*مش قلقان أتحصر في الأدوار التاريخية لأنها مابتتعملش كتير
*بحب إسلام جمال من أيام نور عيني وأنا من جمهوره
*منتظر السجل الأسود مع خالد سليم والعمل خلص 50% منه
*دوري في السجل الأسود مساحته كبيرة وهيبين أدواتي
*شخصيتي في السجل الأسود بادئة من أول حلقة لحد الحلقة الـ30
يشارك الفنان الشاب محمد الشحات مبروك في مسلسل “الحشاشين”، الذي يُعرض خلال الماراثون الرمضاني لهذا العام.
حيث يجسد خلال العمل شخصية الحارس الذي يغدر بملك شاه، الذي يلعب دوره الفنان إسلام جمال، ويقوم بتقديم الطعام المسموم الذي يودي بحياته.
وقد كان لموقع “القائد نيوز” مع محمد الشحات مبروك هذا الحوار الشيق والممتع، والذي تحدث في الجزء الأول منه عن شخصيته في المسلسل.
وخلال الجزء الثاني من الحوار نستكمل الحديث مع الفنان محمد الشحات مبروك عن كواليس مشاركته في الحشاشين.
كما يتحدث لنا عن مشواره الفني والرياضي، إلى جانب أعماله الفنية الجديدة، فإلى نص الجزء الثاني من الحوار..
لكنك كان من الممكن أن تفعل مثل والدك، فتكون رياضيًا وبطلًا لكمال الأكسام.. فلماذا لم تفكر بالأمر؟
ما هو أنا واخد حتة الرياضة كتدريب ماخدتهاش كبطولة، هقولك ليه، أنا خُفت من المقارنة، لأني مش هتقارن بحد واحد بطولة ولا بطولتين تلاتة، ده أنا هتقارن بـ الشحات مبروك، اللي خد 11 بطولة عالم.
فأنا لو خدت خمس بطولات هبهرك؟، مش هبقى مبهر عادي ما هو برضو عادي خد 11، خدت الـ11، طيب ما هو انت كده كده ابنه ما هو طبيعي مش هيبقى فيه حاجة مميزة، يعني هتظلم هبقى بلعب وبتمرن وده الطبيعي، هيقولك ما هو ده الطبيعي ما هو ابن الشحات مبروك، عايزه يطلع إيه يعني؟، ما هو أكيد هيطلع بطل، كأني مولود بالعضلات دي.
فحسيت إني هتظلم شوية في الحتة دي هتبقى المقارنة قاسية أوي، ودي اللي محمد إمام لما دخل المقارنة دي وبقى يمثل زي الزعيم عادل إمام، هو دخل مقارنة قوية جدًا والراجل في حرب لا يُحسد عليها، لأنه طول الوقت بيتقارن بـ عادل إمام وهيفضل طول عمره بيتقارن بـ عادل إمام، فأنا مش عايز أبقى كده أنا مش عايز أتقارن بـ الشحات مبروك مش هعرف، المقارنة هتبقى صعبة جدًا.
لكنه من المؤكد قال لك “نفسي أشوفك بطل زيي”.. أليس كذلك؟
لأ، بالعكس ده هو رافض تمامًا ووالدتي رافضة تمامًا وإخواتي رافضين تمامًا، بالعكس ده أنا اللي كنت عايز في بداياتي، يعني أنا اللي دخلت بطولة الجمهورية وأنا عندي 16 سنة وخدت تاني جمهورية، وبعد كده بطلت لأنهم رفضوا.
فقررت خلاص إني همرن هبقى مدرب، وهفتح جيم وهبقى مدرب وهاخد الموضوع بيزنس، يعني هشتغل على الموضوع إنه بيزنس وبحب التدريب جدًا على فكرة وشاطر في التدريب وبحبه جدًا، الشغل بتاعي البيزنس بتاعي اللي بيأكلني عيش.
قلت لي “أنا شاطر جدًا في التدريب”.. فهل من الممكن أن يكون لاعبًا ماهرًا لكنه ليس مدربًا ماهرًا؟
آه، طبعًا أنت عندك أبطال كتير جدًا ماينفعوش يبقوا مدربين، هو مش شرط علشان تبقى بطل عالم وواخد 100 بطولة عالم تبقى مدرب شاطر، التدريب مالوش علاقة بالبطولة، أنت كبطل بيبقى عندك معلومات تخصك أنت كبطل، لكن المدرب بيبقى عنده معلومات تخص الأبطال كلهم.
إذًا فأنت كلاعب تفكر على حسب وزنك وكم ستحمل.. أليس كذلك؟
بالظبط أنت بتبقى جمعت اللي يخصك أنت كلاعب، أنت بتاكل إيه، بتشرب إيه، خلاص أنت عارف جسمك، بتخس بسرعة، بتتخن بسرعة، بتاكل إيه ومابتاكلش إيه، إيه العيوب اللي عندك، إيه المميزات اللي عندك، فتشتغل عليها، مع الخبرة سنة بسنة بسنة، بتجمع خبرة بتخصك أنت كإنسان.
لكن مايبقاش عندك خبرة تخص كل الناس، المدرب بقى بيبقى عنده خبرة تخص كل الناس، بيبقى عندي 3، 4 لاعيبة مثلًا بمرنهم مختلفين عن بعض، واحد قصير وواحد طويل، واحد تخين وواحد رفيع.
إذًا فالمدرب نكون لديه رؤية شاملة.. أليس كذلك؟
رؤية شاملة بالظبط، زي بالظبط المخرج والممثل، المخرج ده المدرب والممثل ده البطل، هي زيها بالظبط، المخرج بيبقى مقوم عمل كامل، شوف بيبقى فيه كرو أد إيه؟، حطه قدام الكاميرا وقوله قول جملتين تلاتة مايعرفش، سبحان الله.
قدمت التاريخي الفانتازي في الكنز.. أليس كذلك؟
هي القصة حاجة كده فانتازيا مش تاريخية يعني، بس كانت في شكل تاريخي، بس هي قصة خيالية يعني، حاجة كده أسطورية يعني.
ثم قدمت الحشاشين وهو أيضًا تاريخي.. أليس كذلك؟
بالظبط كده، وبرضو عملت الحشاشين نفس الشكل بتاع اللبس، يعتبر نفس الحقبة الزمنية، يعتبر مش نفس التوقيت بس نفس الشكل.
ألم تقلق أن يتم حصرك في هذه الأدوار “هاتوا محمد علشان الأدوار التاريخية” أو مثلًا العام القادم يتم تقديم “ألف ليلة وليلة” فـ”هاتوا محمد في الفانتازي”؟
لأ، مش قلقان لأنها مابتتعملش كتير، مش قلقان أتحصر في حاجة، لأن ماعندكش كل سنة مسلسل تاريخي بتعمله، فيلم كل سنة، كل فين وفين لما بيتعمل مسلسل تاريخي، مش قلقان لأنها مش كتير أصلًا.
لكن العام الماضي كان هناك مسلسل “الإمام الشافعي”، فهذه الأعمال بدأت تعود، الفترة الخاصة بالإمام الشافعي، الفترة الخاصة بالحشاشين، الفترة، الفترة الخاصة بالكنز.. ألا يقلقك أن تحصر في هذه الأدوار؟
لأ، مش قلقان بالعكس، طيب ما أنا كنت عامل الاختيار حاجة بعيد خالص عن التاريخي، أنا كنت عامل في الاختيار حد من الرجالة اللي واقفة في الشارع في فض اشتباك رابعة وحاجات كده، فحاجة بعيد خالص عن التاريخي، يعني شاب صايع، فلأ مش قلقان خالص.
بس ممكن شكلي يكون بيديهم كده، علشان الطول والدقن، أو زي ما قلتلك أنا بجري ورا الحاجات الفنية أوي، فبسعى لها يعني، لكن إني أتراكوَر، طيب يا ريت أتراكوَر في حاجة زي كده، مش حاجة وحشة يعني.
وهل شاهدت الأعمال التي قدمها الكاتب عبد الرحيم كمال في حقب زمنية قديمة مثل الخواجة عبد القادر أو جزيرة غمام؟
الحاجات دي كنت متابعها طبعًا، أنا متابع أستاذ عبد الرحيم كده كده، بس للأسف ماكنتش متابع جيد ليها، بس أنا طبعًا عارف الأعمال دي وأعمال ناجحة جدًا وأعمال فنية حقيقية يعني.
لكن هل شاهدتها حتى تكون لديك خلفية عن أسلوب أستاذ عبد الرحيم كمال في الكتابة عند تقديمك لشخصيتك في الحشاشين؟
أنا كان المرجع الوحيد بالنسبة لي أستاذ بيتر ميمي وأستاذ عبد الرحيم كمال، أنا اشتغلت معاه الكنز فكان مرجعي برضو.
لكنك لم ترَ عملًا سابقًا للكاتب عبد الرحيم كمال قبل تصويرك للحشاشين.. أليس كذلك؟
العمل السابق ليه بالنسبة لي كان الكنز، فأنا عارف ويعتبر بنفس اللبس، بنفس الشكل بتاع الحقبة، اللي أنا اشتغلت فيها أصلًا.
يبدو أنك أحببت هذه الفترة كثيرًا وستايل أزيائها.. هل هذا صحيح؟
الحظ هو اللي حاببني أبقى فيها، النصيب يعني.
وكيف جاءت حالة الانسجام بينك وبين الفنان إسلام جمال؟
إسلام جمال عامةً أنا بحبه جدًا من زمان من أيام فيلم نور عيني، أنا كنت صغير أوي، ساعة ما الفيلم نزل أنا كنت تقريبًا في ابتدائي أو إعدادي، فأنا من جمهوره من وأنا طفل، وكانت أول مرة أقابله في المسلسل ده، فأنا بالنسبة لي أنا رايح لنجم أنا بحبه أمثل معاه، فكان الموضوع بالنسبة لي حلو أوي، إني رايح أقف قدام حد أنا أصلًا بحبه من زمان.
والراجل الحمد لله طلع لذيذ جدًا على الحقيقة، لأنك كـfan لحد لما بتشوفه في الحقيقة بتبقى خايف تتعامل معاه ليطلع رخم، فيهزلك الصورة اللي أنت كنت بانيها جواك، فأنا بتعامل معاه كحد من جمهوره، يعني أنا كنت خايف أروح أسلم عليه، فيحرجني فاتكسف فاتضايق منه، فطول السنين دي أنا بحبك فأنت أحرجتني ليه؟.
بس لأ بالعكس الراجل طلع لذيذ جدًا، وهو اللي جه سلم عليا، وهو اللي جه قعد معايا وقالي أنت بجد ابن الشحات مبروك، طيب سلملي على والدك جدًا أنا fan ليه من زمان، فطمني وخلاني آخد ثقة كده في نفسي وخلى الموضوع بينا زمالة يعني.
على ذكر الرياضة، أريد أن آخذك بعيدًا كمال الأجسام لسألك.. هل أنت أهلاوي أم زملكاوي؟
أنا كده كده أهلاوي، بس الفكرة إني غير متابع للكورة نهائي ومش بحب الكورة خالص، يعني للأسف مابحبهاش بس أنا أهلاوي، بس بحس إن الناس مديين الكورة حجم أكبر من حجمها، أنا مش عارف ليه؟.
يعني إحنا عندنا رياضات كتير بجد في مصر، إحنا عندنا كمال أجسام إحنا كل سنة بنجيب كأس عالم، والناس مش باصلها، إحنا عندنا كرة اليد كل سنة بنجيب بطولة عالم، برضو الناس مش باصلها، عندنا أبطال في السباحة، عندنا السكواش، ناس مهمة جدًا في السكواش وأبطال عالم، يعتبر من أوائل الناس في العالم في السكواش في مصر، وماحدش باصص ليها.
عندك بقى رياضات كتير أوي ماحدش باصصلها، وإحنا مميزين فيها، طيب أنتو ليه باصين للكورة اللي إحنا مش مميزين فيها؟.
قد يكون ذلك بسبب أنها اللعبة الأكثر شعبيةً في العالم.. أليس كذلك؟
طيب ما أنت عندك الرياضات دي واخدة حقها بره، مع إنهم مميزين في الكورة أكتر مننا، بس باصين لرياضات تانية، طيب إحنا ليه باصين للحاجة الوحيدة اللي إحنا مش مميزين فيها؟، أنا ماعنديش مشكلة إننا نبص للكورة، بس نبص لغيرها برضو، ماتبقاش هي لوحدها يعني، فدي حاجة بتخليني مش أنفسن منها، بتخليني أبقى متضايق شوية، اللي هو طيب فيه إيه يا جماعة؟، الناس التانيين برضو بيتعبوا وبيتمرنوا وبتشقى وبترفع علم مصر، ادوهم حقهم بس.
من الواضح أنك متابع لرياضات مختلفة وليس فقط كمال الأجسام.. هل هذا صحيح؟
لا، مش بس كمال الأجسام، يعني أنا بتابع الرياضات التانية كلها، يعني اتمرنت فترة كيك بوكس واتمرنت فترة سباحة، واتمرنت فترة تجديف وبلعب جيم لحد دلوقتي، يعني أنا بحب الرياضة عامةً بس ماعدا الكورة، عندي مشكلة معاها.
هل تسير بخطة معينة في مشوارك الفني فأنت تريد أن تقدم أعمالًا معينةً فقد لاحظت هذا من خلال كلامك أنك تبحث على الأعمال الفنية جدًا؟
لأ والله، مش حاطط هدف معين، هو أنا كحد لسه ببتدي مشواري الفني أنا فارش قماشتي كلها، أنا بحاول أفرش البضاعة بتاعتي كلها على أد ما أقدر، يعني الكوميديا بتاعتي هفرشها، التراجيدي بتاعي هفرشه، الأكشن بتاعي هفرشه برضو، يعني هفرش والناس بقى هم اللي يختاروا.
كممثل لسه في بداياته ولسه بيبدأ مش هينفع أنا اللي أختار، هيبقى الموضوع ممكن يبقى فيه مخاطرة أوي، بس إني أفرش البضاعة بتاعتي كلها، وأنزل أقعد في الشارع وأفرش حاجتي كلها قصاد الناس والناس يشتروا اللي هما عايزينه، ده الأسهل والأحسن يعني.
ما هو أكثر فيلم أو عمل درامي تحبه لوالدك؟
بحب حاجات كتير والله، يعني ممكن أمريكا شيكا بيكا بحبه جدًا، المرشد بحبه جدًا برضو، لهيب الانتقام فيلم برضو محترم جدًا، الكنز علشان اشتغلنا سوا فيه بحبه جدًا برضو، الأفلام دي لو بصيتلها هتلاقيها العلامات المميزة في مشوار الشحات مبروك.
هل من الممكن أن نراكما في عمل معًا قريبًا؟
آه، إن شاء الله بإذن الله غير الكنز طبعًا إن شاء الله يبقى فيه حاجات تانية كتير، يعني أنا بسعى لده جدًا.
وما هي خطوتك القادمة بعد الحشاشين؟
أنا مصور حاجة كده اسمها السجل الأسود مع خالد سليم والمخرج جميل جميل، مخرج شاطر جدًا مخرج كليبات وإعلانات وأول مرة يخرج عمل درامي، بس مخرج شاطر.
وهل سيكون العمل على منصة أم على شاشة التليفزيون؟
والله ماعرفش، هو المسلسل خلصان منه 50%، بس وقفوا تصوير علشان رمضان وهيكملوا تاني تصويره بعد رمضان إن شاء الله، بس دوري فيه مساحته كبيرة ودور أنا حابه وحابه علشان هيبين شوية أدواتي، لأن المساحة كبيرة شوية، فيعتبر واخد الـ30 حلقة كلهم والشخصية بادئة من أول حلقة لحد الحلقة الـ30، فدور كبير.
وماذا تابعت بخلاف الحشاشين في رمضان؟
أنا متابع العتاولة، كنت متابع أعلى نسبة مشاهدة، كنت متابع أشغال شاقة، متابع المداح، الحاجات دي لذيذة جدًا، يعني أنا متابعها وبصراحة أعمال قوية أوي.
وهل تتمنى العمل مع الفنان أحمد السقا؟
نفسي والله، يعني أمنية حياتي إني أشتغل مع الراجل ده بصراحة، يعني حقيقي أمنية حياتي إني أشتغل مع أحمد السقا إن شاء الله وهتحصل بإذن الله، بس حقيقي من الأمنيات اللي بتمناها في حياتي إني أشتغل مع الراجل ده، فإن شاء الله ساعتها أبقى شغال معاه في دور كويس، يعني ما أشتغلش حاجة بسيطة، أبقى بعمل دور كبير إن شاء الله وأنا بسعى لده حاليًا برضو.
Views: 5
مساحة إعلانية
مساحة إعلانية