أمال ماهر عن علاقتها بتركي الشيخ “كان عندنا نجاحات كتير، وان شاء الله تحصل نجاحات قادمة”

حلت الفنانة أمال ماهر منذ ساعات قليلة ضيفة على برنامج الحكاية مع الإعلامي عمرو أديب، لطمأنية جمهورها على حالتها الصحية والفنية.

وتحدثت في اللقاء عن أخر أغنياتها “عندي صاحبة” وقالت: لأول مرة أعمل مواضيع عن الصحاب، اتعمل قبل كده بس مفيش صديقة غنت لصديقتها، خصتها بأغنية، محدش غنى لصاحبة عمره “الصديقة”.

وأوضحت رأيها في فكرة إنتاج ألبوم كامل قائلة: حاليا مبقاش في البومات، بقت أغنية اغنية، لان المستمع مبقاش قادر يتقبل ان انت تنزل البوم كامل، يعني يادوب غنوة عشان الناس تاخد بالها، لكن ان انت تنزل البوم كامل يبقى انت بتظلم باقي الاغاني. 

وعن تأخرها في انتاج أعمال نخصها قالت “الناس بقت بتركز على الكلمة، مبقاش في تركيز على اللحن قد ما في تركيز على الكلمات اللي في الاغنية، والموقف اللي فيها، وده خلى الفنان بيدور على حاجة مميزة، مش صعب إنك تلاقي كلام كويس، بس الصعب إنك حاجة مميزة تليق بيك. 

اما عن متابعتها لأعمالها قالت “انا بمجرد ما بخلص اغنيتي مبسمعهاش تاني، ومش بتابع الاغنية من خلال الارقام، اي حد دلوقتي ممكن يعمل أرقام، انا بتابع نجاح الاغنية بتاعتي من التأثير في الشارع. 

وعن حالتها الصحية والمرتبطة بالإشاعات التي انطلقت عنها مؤخرًا صرحت بعدة تصريحات منها

انا بخير وطمنت الناس ولسه بطمنهم، ويمكن تعبي كان مأجل ان انا اطلع للناس اقولهم ان انا كويسة، وده اللي خلى الاشاعة تنتشر.

انا قليلة الظهور على الميديا، وكنت عايزه اطلع اطمن الناس لكن كان باين عليا التعب، بسبب إني كنت في تالت مرة كورونا، وانا كمان مناعتي ضعيفة، فكان عندي شبه اختناق لان نفسي مكانش بيطلع، فلو كنت طلعت الناس كانت هتفتكر ان في حاجة بجد.

الناس بتجري ورا اي اشاعة، خصوصا لو فيها اوفر واثارة، وفي اشاعات كتير بتحصل في الوسط الفني مبتكبرش كده، فالموضوع اخد أكبر من حجمه.

انا الموضوع وصل معايا لدرجة إني بكلم قرايبي وصحابي في التليفون ومش مصدقين ان انا بكلمهم، وأصحاب ابني كانوا بيقولوا احنا مش مصدقينك لما كان بيقولهم ان انا كويسة. 

كنت بسأل نفسي اشمعنى انا اللي كنت مضطرة اطلع أقول انا بخير، ما في ناس كتير بتتعب وتختفي في مصر ومحدش بياخد باله منهم، والموضوع كان بيضايق أهلي اللي عايشين معايا في بيت واحد، لكني كنت فاهمه ان ده نابع من حب الناس ليا.

وبسؤالها عن التصرف الذي سوف تقوم به في حالة حدوث أمر آخر مثل هذا، قالت مازحة “لو حصلت حاجة زي دي تاني هبقى اسيب فيديو قبلها احتياطي”.

وفي نهاية اللقاء أعربت عن فخرها بما يحدث في موسم الرياض باعتبار المملكة جزء من الوطن العربي، وقابلية الموافقة على عرض تواجدها في المواسم القادمة.

وأوضحت طبيعة علاقتها بالمستشار تركي الشيخ التي لا يشوبها القلق، ولن تقف عائق امام تواجدها في موسم الرياض قائلة “كان عندنا علاقة فنية ونجاحات كتير، وان شاء الله تحصل نجاحات قادمة بإذن الله”.

وجاءت ردود الأفعال على اللقاء مخيبة للأمال، حيث اعتقد البعض ان هناك اتفاق بينها وبين تركي الشيخ اما لتجميل صورته في المجتمع المصري، او لتبرير مشاركتها في موسم الرياض.

في حين رأي البعض ان ردودها غير مقنعة وحركة يديها مهزوزة مما يجعلها متوترة بسبب محاولة اخفاء شيء ما.

أما الاعتراض الاكبر فكان عن استضافة “صوت مصر” أمال ماهر دون اتاحة الفرصة لها لتغني خلال الفقرة.

يذكر ان امال ماهر كانت قد تعرضت مؤخرًا لموجة من الاشاعات حول اختطافها وتعذيبها تحت هاشتاج “أنقذوا أمال ماهر”، خصوصا بعد خلافها مع المستشار تركي الشيخ، الذي تسبب في حذف جميع اغانيها من على قناة اليوتيوب الخاصة بها. 

Views: 13