سيطرت حالة من الحزن واليأس على الفنان خالد عليش، في الفترة الماضية، بسبب عدم رؤية ابنته عقب انفصاله وزواجه من زوجة أخرى، وقدم خالد العديد من القضايا ضد طليقته لعدم رضائها على رؤية أبنته، و كشف اليوم، الأربعاء الفنان والمذيع خالد عليش عن كواليس الحكم في قضية رؤية ابنته.
حيث أنه نشر التفاصيل من خلال حسابه الرسمي على “الفيس بوك”، كاتباً: “النهاردة انا خدت حكم تاريخي يارب يتنفذ علي خير، وتاريخي لأنه أحسن حكم ممكن أخده في ظل ظروف قانون الأسرة السيئ لحين تعديله و اللي طلع الحكم قاضي مش واحد صاحبنا ف ده معناه ان الراجل قرأ وفهم و بيدي لكل واحد حقه لكن جه الوقت اللي أقول فيه اللي جوايا”.
وأضاف: ” حسبي الله و نعم الوكيل أنا خصيم لكل واحد أو واحدة حتى يوم الحساب ساعدوا بشكل مباشر أو غير مباشر إني ما أشوفش بنتي بطريقة إنسانية، كل حد كبير أو صغير جريت وراه بالمكالمات عشان أشوف أي حلول ودية، حتى الحركات و الجروبات النسوية اللي بيدافعوا عن الست وخلاص، أي حد بيكتب تعليق وهو مش فاهم حاجة، فاض بيا الكيل والعمر بيعدي واستحملت الكثير من الاتهامات الباطلة و علاقتي ببنتي بتبوظ يوم بعد يوم”.
وتابع خالد عليش: ” وأنا ملتزم بكافة الالتزامات المادية ناحيتها من أول يوم كامل وزيادة كمان عن المستوى المادي و الاجتماعي اللي عايشين فيه ومع ذلك استحملت كتير وماردتش، أنا لا حول لي ولا قوة حاولت مع كل الحلول الرسمية و غير الرسمية، تعبت من اللف في دوائر مغلقة، تعبت من نظرة والدي ووالدتي المريضة اللي نفسهم يشوفو حفيدتهم ومش قادر أعملهم ده، انا اوحش رجل في العالم و لكن ما استحقش إني ما يكونش عندي فرصة أتكلم وأخرج معاها وأفسحها عشان علاقتي بيها تبقي كويسة محدش يقولي أنت السبب عشان سيبت ماماتها أنا ووالدتها كان في بينا عشرة طيبة وأيام كتير حلوة ولكن لم يحالفنا التوفيق في النهاية وكل شئ نصيب والانفصال كان برغبتها قبل رغبتي”.
وواصل خالد عليش: “محدش يقولي ما أنت كنت زوج وحش و .. وأنا يمكن مكنتش أحسن زوج برغم إني عملت اللي عليا كتير واجتهدت كتير عشان أسعد الطرف التاني ولكن ده مش معناه إني إنسان وحش و مستحقش فرصة تانية ومستحقش أشوف بنتي محدش يقولي ما أنت مبسوط و اتجوزت تاني أنا فعلا الحمدلله زي الفل ومبسوط إني أخدت فرصة تانية ربنا يكرمني فيها وأكون إنسان أفضل و استمتعت ب حق ربنا سبحانه و تعالي و المجتمع إداهوني إني أتجوز تاني بعد انفصالي رسمياً بأكتر من سنة بس مش معنى كده إني أرمي طفلي مع أمه و مطلوب مني أنساه محدش يقولي ما أنت كنت بتشوفها”.
وأضاف خالد عليش: ” أنا فعلا مع بداية الانفصال كنت بشوفها ساعات قليلة في الأسبوع بس مع أي تصرف ما يعجبش ماماتها تقولي أصل البنت مش فاضية عندها عيد ميلاد عندها تمرين ووسط شروط كتير منها متتصورش معاها و تنزل ليها صور متوديهاش عند أهلك تيجي عيد الميلاد لوحدك بدون باباك أو ماماتك حسيت في الوقت ده إني لازم أستخدم التعاقد اللي بيني و بينها اللي بيقول إني أخد البنت يوم في الأسبوع و لكن القانون أداني حق الرؤية الطبيعي الغير إنساني لطفل فضلت 5 شهور في مساومات إني معملش تنفيذ لحكم الرؤية حفاظاً على البنت و لكن ماماتها صممت و بعد التنفيذ كان مهانة و مذلة للطفلة و ليا بعدها مبقتش أروح و بعت إنذار رسمي ليها بكده و مازلت في الإجراءات القانونية الجديدة بعد فشل المحاولات الودية اللي الحمدلله النهاردة خدت فيها حكم منطقي و مناسب”.
وتابع عليش: “محدش يقولي ما أنت ما بتصرفش عليها و مبهدل ماماتها في المحاكم برغم إن مش ده الموضوع بس الحمدلله الفلوس اللي الأم طلبتها كنفقة و مصاريف بتوصل كل أول شهر بدون أي محاكم من أول يوم حصل بينا انفصال رسمي بدون محكمة بعقد اتفاق بينا و لو حصل دخول محاكم في أول الخلاف ف الأم اللي بدأته وده بالتواريخ مش بالكلام موضوع إن في مصاريف زيادة بتطلب بشكل مبالغ فيه دي قصة تانية فيها نقاش و حوارات كتير و مع ذلك قولت أنا عندي إستعداد لأي زيادة غير منطقية بس نقعد و نتناقش محدش يقولي روح شوفها عند جدتها عشان أنا مش هعرف يبقى في علاقة طيبة بيني و بين بنتي و أنا قاعد معاها ساعة عند جدتها و هما قاعدين جنبي و قعدتي تبقى كلها مذلة و مهانة، محدش يقولي إنت بتتظاهر إنك عايز تشوف بنتك لكن أنت مش فارق معاك الابهات هنا اللي هيحسو قد إيه دي حاجة مؤلمة و أنا مش محتاج أعمل ده وطول الوقت طلبت من أي حد قريب منهم إن إحنا ننزل و نقعد و نوصل لحل وسط أنا مش طالب فيه غير إني أخد بنتي يوم في الأسبوع أخرجها و أرجعها”.
واختتم عليش كلامه: “أنا نفسي اخس بحضن بنتي بقالي أكتر من سنة ومقعدش أتكلم في مشاكل حصلت من سنين أنا أوحش رجل في العالم بس حقي أخد فرصة عشان تكون في علاقة كويسة بيني و بين بنتي حسبي الله و نعم الوكيل شكراً للمحامي و ربنا يكملها بخير شكراً ميريهان زوجتي إنك مستحملة كل ده و في ضهري و مؤمنة بيا”.
Views: 9
مساحة إعلانية
مساحة إعلانية