يفتح كابتن أحمد فوزي حارس مرمى النادي الاهلي الأسبق قلبه لموقع القائد سبورت ويتحدث عن فرص النادي الأهلي في الحصول على برونزية كأس العالم للأندية ، و مايحتاجه الأهلي من تدعيمات وضرورة إستمرار كيروش وفرص مصر والسنغال في التأهل للمونديال ويوجه ، كلمة إلى هؤلاء.
1 _ في البداية ما رأي كابتن أحمد فوزي في تجربة النادي الأهلي اللعب بالناشئين في كأس الرابطة ؟
مشاركة الأهلي بالناشئين في كأس الرابطة كان أحسن حاجة وأمتع حاجة وعرفت الجماهير الأهلاوية بالناشئين إللي إمكانيتهم كويسة وممكن ناس منهم تحترف وممكن ناس تلعب فريق أول و ما يكون عليها ضغوط وهما أولى بفرقتهم من الناس إللي بتيجي من بره وأعتقد تجربة مميزة أبرزت لنا لاعيبة زي مصطفي شوبير ومحمد أشرف ومغربي ومانو وغيرهم كتير مش عاوز أنسى حد.
2- رأي حضرتك في المستوى اللي قدمه مصطفى شوبير وحمزة علاء في كأس الرابطة وتقييمك ل علي لطفي في مباراتي كأس العالم للأندية.
أولا شوبير عمل تلات ماتشات ولاأروع وكان من أحسن الناس ومن مكاسب البطولة دي وكنت أتمنى إنه يكمل، لأن هو حارس جيد جداً وعنده ثبات إنفعالي غير طبيعي حاجة كدا الله أكبر ربنا يحفظه ويبارك فيه حمزة برضوا المباراة إللي لعبها كان كويس جداً وأدى أداء عالي وحتى الهدف إللي دخل فيه من ضربة جزاء ف أعتقد إن الإتنين أثبتوا إن حراسة مرمى الأهلي بخير وأنا كتبت على صفحتي إن حراسة مرمى الأهلي في أمان وربنا يكرمهم ويوفقهم إن شاء الله.
علي لطفي في مباراة مونتيري في الشوط الأول كان كويس جداً أعتقد كان فيه شوية رهبه و ده طبيعي وفي الشوط الثاني كسب ثقة وكان كويس جداً جداً ودافع عن مرماه ببساله.
المباراة التانيه أنا شايف إن الكورتين إللي راحوا دخلوا وهو يتحمل جزء كبير في الكورة الثانية ، ولكن الأولى صعبة مع إن التعامل معاها كان ممكن يكون أحسن ، لكن في الحالتين هو ميسألش غير عن الهدف الثاني بس وفي العموم هو حارس جيد وكلنا عارفين كده.
3 _ مين الحارس اللي كابتن فوزي يتمنى يشوفه في الأهلي وإمكانياته تؤهله لوجوده بالنادي الأهلي
أنا قولت وبقول وبعيد حتى من أول ماشوفته من 3 سنين قولت إن محمود جاد من الحراس إللي أتمنى يكونوا متواجوين في النادي الأهلي لأنه حارس جيد جداً وأعتقد إنه مع شوية تمارين وشغل مع مستر يانكون هيبقى حاجه تانيه ناهيك إن مصطفى شوبير زي ماقولت من الحراس الجيدين فهو لو جه ع الأقل لسه صغير وتقدر تشكله زي ما إنت عاوز دي وجهة نظري هو أو محمد صبحي ينفعوا يلعبوا في النادي الأهلي ع المدى البعيد.
4 _ أكيد كابتن أحمد شاف مباراتي الأهلي في كاس العالم للأندية رأيك في المباراتين وإيه أسباب خسارة الأهلي من بالميراس.
أكيد شوفت المباراتين، أعتقد إن في المباراتين التكتيك بتاعنا واحد بإستثناء الشوط الثاني من مباراة بالميراس وعلشان كده مسكنا كورة وكنا أحسن، أنا شايف إن النادي الأهلي بعرف يتعامل جداً مع المباريات الكبيرة بيعرف يقف بيعرف يستقبل الفرق ويلعب في ضهرها ع الهجمة المرتدة و دي بتحصل كتير، شوفنا لما إحنا مخوفناش ولعبنا كورة وصلنا ووصلنا أكتر منهم بكتير و ده دليل إن طريقة3/4/3مش لازم تتلعب في كل الأوقات آم ممكن أفكر فيها في ماتش إتنين تلاته عشرة إنما مش في كل الأوقات لأن إحنا طبيعتنا بنحب نلعب الكورة السريعه السهلة و التيكي تاكا وبنحب الاستحواذ وكل ده مش موجود في3/4/3لكن طبعا كل واحد وليه وجهة نظر والمدير الفني بيبقى شايف أكتر من إللي بره إنما مع كل ده أقدر أقولك إن موسيماني كل الآراء إللي بتقول إنه لازم يمشي أنا شايف إنها آراء غير مجدية آه هو عنده أخطاء لكن نسبة نجاحه كبيرة أوي ياجماعة إحنا زعلانين منه علشان وصل قبل نهائي كأس عالم انتوا بتتكلموا في إيه.
5_ ما رأيك في الضغوط الإعلاميه اللي بتمارس ضد موسيماني وهل حضرتك كنت مع أو ضد ظهوره في التحليل في ام بي سي مصر ومع أو ضد التجديد له و إستمرار.
موضوع التحليل ده هو حر فيه أنا ماليش رأي.. الرأي والقرار لمجلس إدارة النادي الأهلي إنما أنا ماليش رأي في الموضوع ده دي بتاعته
أما بالنسبة للضغوط الإعلاميه إللي بتمارس ضده أنا شايف إن في تحامل كبير عليه والناس مش عاوزه تهدى عليه مش عارف ليه..
6_ هل الأهلي يستطيع التتويج ببرونزية العالم للأندية ولا الأمور صعبه؟
وبالنسبة للتتويج ببرونزية العالم طبعاً الأهلي يستطيع إحنا خدناها قبل كده مرتين ونستطيع جداً ناخدها بس المباراة أمام الهلال السعودي هتكون أصعب من المباراة إللي فاتت بأمانه.
7 _ تتوقع مين يحرز لقب كأس العالم للأندية
أتوقع فوز تشيلسي بكأس العالم للأندية بنسبة 90٪
8_ في ظل الإصابات اللي ضربت النادي الأهلي …ومنها صليبي وهتطول.. إيه التدعيمات إللي محتاجها الأهلي ؟
بالنسبة للتدعيمات إللي محتاجها الأهلي هقول «أهل مكة أدرى بشعابها» ولكن أنا هتكلم عن إللي أنا شايفه، بقالنا 60 سنة بنقول عاوزين باك ليفت وأنا شايف إن محمد أشرف ممكن يتصعد ويبقى موجود علطول وبقالنا كتير بنقول عاوزين باك رايت أساسي لأن إحنا مبنجبش حد مع محمد هاني خاصة بعد إصابة أكرم توفيق ولازم واحد في نص الملعب زيادة مع الثلاثة الأساسيين.
لازم نجيب سترايكر يكون سترايكر رأس حربه يعني رأس حربة ها كلمة رأس حربة مش واحد يكون بيلعب ع الطرف وإحنا ندخله جوه علشان يبقى رأس حربة محمد شريف كده وبيرسي تاو كده على فكرة أصلاً أطراف وإحنا إللي دخلناهم جوه علشان يلعبوا رأس حربة وأجادوا فيها، طاهر محمد طاهر كمان عمل نفس الكلام لأزم نجيب رأس حربة صريح ونجيب وينج رايت من اللاعيبة الكبيرة إللي بنشوفها
9_ هل يستطيع الأهلي إستعادة لقب الدوري والمنافسة على دوري الأبطال وتحقيق اللقب وتوقعاتك لمجموعة الأهلي ؟
طبعاً يستطيع الأهلي إستعادة لقب الدوري، الغير طبيعي إن الأهلي مياخدش الدوري تاني دي تبقى كارثة بالنسبة لدوري الأبطال ربنا ييسر الحال إن شاء الله الأهلي قادر.. الأهلي قادر.
أنا قولت من الأول إن مجموعة الأهلي مجموعه قوية خاصة لو فرق السودان هتلعب في السودان وأعتقد إن الهلال خلاص هايلعب في السودان وأعتقد كمان المريخ هايحصله الموضوع صعب لكن الأهلي معودنا بيبقى معاه فرقه من السودان كل سنه وبياخد البطولة.. السنادي معاه فريقين هناخد البطولة مرتين ولا إيه الحكايه.
10_ رأيك في مستوى منتخب مصر في الكان وكنت تتوقع الوصول للنهائي؟
لم يكن أشد المتفائلين يتوقع إننا نوصل للنهائي، و وصلنا النهائي وعملنا حاجه كويسة والحمد لله ع الإنجاز وإننا طلعنا تاني.
11 _ هل أستحقت السنغال اللقب؟
أكيد السنغال أستحقت اللقب عن جدارة وبصراحة يستحقوا من أول البطولة فرقة محترمة بكل معاني الكلمة فرقة جامدة جداً ماشاء الله.
12 _ رأيك في مستوى أبو جبل وهل ظلم بعدم أختياره الأفضل في البطولة؟
أبو جبل كان هايل جداً ومن أفضل الناس في البطولةوظلم في عدم أختياره الأفضل في البطولة، هو كان أفضل لاعب في البطولة في آخر تلات مباريات وأكيد هما بيتعاملوا على السبع مباريات إنما بصراحه هو إتظلم في التلات مباريات إللي لعبهم.. دي مباراة السنغال دي لوحدها توديه كأس عالم.. بقوله هارد لك وربنا يكرمك في إللي جاي.
13 _ توقعاتك لمباراتي السنغال في تصفيات كاس العالم؟
مباراة السنغال في تصفيات كأس العالم هتبقى أصعب من إللي إحنا لعبناها في النهائي ولن تحسم إلا مع صفارة الحكم بمباراة الإياب بالسنغال يعني ممكن يكسبونا هنا ونكسبهم هناك والعكس صحيح نكسبهم هنا ويكسبونا هناك وممكن نتعادل هنا وهناك ف متعرفش الدنيا ماشيه إزاي والتوقعات صعبه جداً جداً وعلى حسب حالة كل فريق في الملعب ساعتها.
14_ مع أو ضد إستمرار كارلوس كيروش؟
بعد إللي حصل في البطولة لازم كارلوس كيروش يكمل لازم يكمل ده شئ أساسي.
15 _ كلمة توجهها لكل من محمود الخطيب بعد الهجوم عليه لعدم مشاركة لاعبي الأهلي الدوليين في كأس العالم ومحمد صلاح بعد خسارة اللقب الإفريقي وأكرم توفيق بعد الإصابة بالصليبي في عز التألق وكذلك عمار حمدي ومحمد شريف بعد تبديله عقب نزوله ب 10دقايق في قبل النهائية.
كابتن محمود طلع وخلص الليلة وقال مصلحة مصر أولاً ومنتخب مصر أهم و ده شئ لازم نبقى عارفينه كويس وقدام العالم كله إحنا بنلعب في مصر علشان خاطر المنتخب.
طبعاً النادي الأهلي ليه خصوصياته لكن مفيش حد بيعلى على مصر وغصب عننا قلوبنا كلنا بتبقى مع مصر و ده شئ طبيعي إن الكابتن ميقدرش يعمل أكتر من كده وشكراً ليه إن محصلش مشاكل إنما طبعاًالمسئولين في إتحاد الكورة أعتقد إنهم أخطأوا خطأً كبير جدًا ومينفعش يستمروا في الكلام ده وإنفانتينو أعتذر وموتسيبي أعتذر فخلاص إحنا هنعمل إيه مفيش حاجه في إيدينا.. أنا شايف إن الجمهور ضغط على كابتن محمود وهو مش هيقدر يعمل حاجه.
صلاح إنت أيقونه لكل لاعب مصري ناشئ وكل لاعب موهوب ولازم تشيل الضغوط الملقاة على عاتقك دي إن شاء الله تعوضها وتكسب بطولة أفريقيا الجاية بإذن الله وربنا يكرمك ويوفقك ويحققلك كل حاجة يا إبن الحلال و إبن الأرض الطيبه إبن مصر فعلاً، وأتمنى ربنا يكرمك في بطولة أفريقيا الجايه وتفوز بيها وتبقى نجمها الأول بإذن الله.
أما عن أكرم توفيق شفاك الله وعافاك يا إبني إنت سايب حته كبيرة في قلوب الأهلاوية حته كبيرة جدا بعيد عن الملعب وكل الناس بتحبك وتدعيلك ترجع سليم معافى بإذن الله.
عمار إن شاء الله ربنا بيديلك أختبار لازم تكون واقف على رجليك وتقدر تشتغل وتجتهد وأما ترجع بالسلامه هتكسر الدنيا متعودين منك تبقى مقاتل وإن شاء الله ترجع بالسلامة .
شريف يا إبني الحب ده بتاع ربنايعني إللي يحبك وإللي يكرهك دي بتاعة ربنا سبحانه وتعالى كفاية عليك حب جمهور النادي الأهلي والمحبة إللي كل الناس شايلاهالك في قلوبها.. إنت عندنا في النادي الأهلي في حته تانيه وطول عمرك هدافنا وإن شاء الله هترجع هدافنا في النادي الأهلي وتكسر الدنيا وإن شاء الله هترجع تلعب في المنتخب ولما تلعب وتاخد نص الفرص إللي بياخدها غيرك هتكسر الدنيا وتبقى في حته تانيه إن شاء الله.
Views: 0
مساحة إعلانية
مساحة إعلانية