بسمة دويدار لـ”القائد نيوز”: “الترند السلبي بيطلع على كلمة غير مقصودة وباخد خطواتي للتمثيل”

حوار: أحمد سالم

الفنانة بسمة دويدار، نجمة مسلسل أعلى نسبة مشاهدة، الذي عرض في النصف الأول من رمضان، ومقدمة محتوى على السوشيال ميديابس، في حوار خاص عبر موقع القائد نيوز:

كيف بدأتي رحلتك في عالم صناعة محتوى الفيديو على منصات التواصل الاجتماعي؟

من حوالي 3 سنين في 2021 أول فيديو عملته، وعملت على الأكونت بتاعي على الفيسبوك، يعني مكنش لسه عندي بيدج ولا حاجة، وأول فيديو وأول فيديو لقيته جاب حوالي 300 ألف ڤيو أو كدا، بصراحة كنت هطنش يعني عادي وفيديو وخلاص، بص صحابي هم اللي فضلوا يقولولي طيب ما تكملي ممكن تقدمي محتوى أو كدا، وبعد أميرة البيلي وإبراهيم فرج، بدأت إن أنا أعمل معاهم فيديوز عندهم وعندي، ومن وقتها بقى لحد دلوقتي.

هل سنرى الفنانة بسمة دويدار في فيلم من أفلام العيد وفي رمضان القادم؟

لسه والله يعني ممضتش على حاجة أو كدا، فالله أعلم يعني، ودعواتكم إن شاء الله.

كيف تقومين بانتقاء الأفكار والمواضيع التي تقدمينها في فيديوهاتك؟

الأفكار ساعات بكون أنا اللي بفكر فيها، وكتير صحابي هم بردو بيفكروا معايا، وبردو كنا ساعات بنستعين بحد سكريبت رايتر، هو اللي يبقى كاتب الفيديو أصلًا، من الأول للآخر، وحتى لو أنا اللي كاتبة الحاجة أو كاتبة السكربيت بتاعها أخد رأي كذا حد فيها، إن كانت محتاجة تعديل أو مراجعة أو كدا.

هل تواجهين تحديات في مجال صناعة المحتوى على السوشيال صميديا؟ وكيف تتعاملين معها؟

التحدي الوحيد أو يعني الحاجة الوحيدة اللي ممكن أعتبرها تحدي، هو إن أنا أعمل فيديو ويعني يعجب الناس، أكتر حاجة بتبقى شاغلة تفكيري وأنا بعمل الفيديو ببقى مقتنعة بيها فسواء تلقت انتقاد أو لأ ممكن يتطور منها، أو يعني تتلقى الإعجاب.

 

إزاي بتتجنبي إن فيديوهاتك تبقى تريند سلبي زي ما حصل في مسلسل أعلى نسبة مشاهدة؟

مفيش حاجة معينة تقدر تحميك من الترند السلبي، أنا بحس إن التريند السلبي بيطلع على كلمة غير مقصودة، وتطلع تريند ولكن في العموم يعني بحاول دائمًا أقدم الحاجات اللي هي قريبة مني، أو اللي مقتنعة بيها فسواء لاقت الانتقادات، فممكن أطور منها أو لاقت الإعجاب فأستمر عليها.

 

هل تعتبرين أن لديك مسؤولية تجاه جمهورك عند تقديم المحتوى عبر منصات التواصل الاجتماعي؟ وكيف تتعاملين مع هذه المسؤولية؟

أنا بحس إن هي مسئولية بتتفرض عليك تلقائي، من أول ما بتكون مشهور، علشان تصرفاتك وكلامك كله بيكون على الملأ، بس في الآخر الشخص المشهور دا غير معصوم من الخطأ، مش لازم كل أفكاره تكون صح بنسبة 100 في المية، فأنا بحس إن لازم الإنسان بيكون بيكون وعيه من الحاجات الحقيقية اللي هو بيمر بيها، ويكون بيمرر كل الحاجات اللي يشوفها على السوشيال ميديا على دماغه ميسلمش بيها كمسلمات.

ما هو النصيحة التي تقدمينها للأشخاص الذين يرغبون في البدء في مجال صناعة محتوى الفيديو عبر وسائل التواصل الاجتماعي؟

هي نصيحة واحدة إن أنت متحاولش إنك تقلد حد خالص وخليك بشخصيتك، وطبيعتك تمامًا، متحاولش أنك تألف حاجة مش حقيقة علشان يعجب بيك الناس، شايف مثلًا الشخص الفلاني دا ناجح جدًا، وعنده جمهور كتير، فمش تقلد طريقته أو هو بيتكلم إزاي أو كدا، خليك مصدق أنك عندك حاجة مختلفة، لما تقدمها هتلاقيلها جمهور، لأن جمهور السوشيال ميديا كبير جدًا، وأزواقه مختلفة جدًا، فخليك على طبيعتك.

 

هل تعتبرين أن منصات التواصل الاجتماعي تلعب دورًا في تغيير وجهات نظر المجتمع، وكيف ترى دورك في هذا السياق؟

اه شايفة دا، ولو هقول حصل تغير في وجهات نظر المجتمع على السوشيال ميديا، فمثلاً نظرة المجتمع للدكاترة زمان غير دلوقتي، زمان ممكن الناس مثلاً كانت تتكسف إن هي تقول إنها يتروح لدكتور نفساني، لكن دلوقتي بقى في تقبل للفكرة، وبشوف الناس إن هي عندها وعي أكبر لاحتياجاتها النفسية، ويقدروا أكتر أنهم يعبروا عن نفسهم.

 

ما هو الهدف الرئيسي الذي تسعى لتحقيقه من خلال نشاطك على منصات التواصل الاجتماعي؟  

بالنسبالي أنا أن السوشيال ميديا كانت أول مكان أقدر إن الناس تشوفني، وأتعرض لأكبر كمية من الجمهور، مفيش مثلاً مسرح هيكفي مليون شخص مثلاً، لكن على السوشيال ميديا ممكن يشوفه مليون شخص، يعني مثلاً التواصل اللي بين أي حد بيقدم محتوى والجمهور، تقريباً دي أكتر حاجة كنت محتاجاها، لأن أنا كنت بمثل على فكرة من وأنا صغيرة، ودلوقتي حالياً آه باخد خطواتي في التمثيل، لكن السوشيال ميديا من 3 سنين كدا عرفتني على جمهور أكبر، فلو هيكون ليا هدف من وراها يبقى الناس تشوفني أكتر واتعرض بجمهور أكتر وآراء أكتر.

هل تعتبرين أن منصات التواصل الاجتماعي تلعب دورًا في تغيير وجهات نظر المجتمع، وكيف ترى دورك في هذا السياق؟

اللي ناوية أعمله في المستقبل إن أنا أكون بقدم محتوى بشكل مستمر، لأن أحياناً بسبب ظروف الوقت وكدا والدراسة كمان، بقدم محتوى على فترات متباعدة، فبصراحة عايزة الفترة الجاية أقدم محتوى بشكل مستمر، وهواياتي التانية بجانب التمثيل أنا بحب الرسم.

Views: 30