تصريحات وحوارات خاصةفن

ريم رؤوف لـ”القائد نيوز”: “هاني خليفة من المخرجين اللي حلمي أشتغل معاهم”

حوار: ياسر خالد

*شرف ليا إن هاني خليفة يختارني في مسلسل من إخراجه
*جهاد حسام الدين ممثلة شاطرة جدًا وفيه كيميا حلوة ما بينا
*اشتغلت في الوحدة التانية مع محمود عبد التواب “توبة” وكان نفسي ألتقي بـ هاني خليفة
*شفت صوت وصورة لـ”توبة” وإحنا كسبنا مخرج عظيم
*تابعت أشغال شقة ولحظة غضب وبدون سابق إنذار في رمضان وبعد رمضان هشوف كل المسلسلات
*نفسي أشتغل مع يحيى الفخراني وكنت أتمنى أشتغل مع أحمد زكي وعادل أدهم وسناء جميل وخالد صالح

فنانة موهوبة بكل ما تحمله الكلمة من معنى، قدمت العديد من الأدوار الصعبة البعيدة عنها تمامًا، والتي قدمتها بمنتهى البراعة والإتقان.

ريم رؤوف
ريم رؤوف

تنوعت أدوارها في الدراما والسينما بين الخير والشر، الكوميديا والتراجيديا، وفي كل مرة تثبت أنها صاحبة موهبة حقيقية، فهي تتغلغل داخل الشخصية وتتوحد معها لتقدمها في أفضل شكل.

تنتمي إلى مدرسة السهل الممتنع، فتستطيع أن تقدم مختلف الأدوار بمنتهى البساطة والسلاسة، لأنها تقوم بالتحضير للشخصية بشكل جيد وتقوم بدراستها بعناية شديدة.

ودائمًا ما يكون للشخصيات التي تجسدها تأثير لدى المشاهدين، كما أنها تكون علامةً في مشوارها الفني الذي يضم مجموعةً من الأدوار القوية.

ريم رؤوف
ريم رؤوف

وخلال رمضان الماضي، شاركت في مسلسل بدون سابق إنذار مع الفنان آسر ياسين والفنانة عائشة بن أحمد، والذي عرض خلال النصف الثاني من رمضان.

إذ جسدت في العمل شخصية حنان شقيقة نهى، التي لعبت دورها الفنانة جهاد حسام الدين، والتي تقف بجانبها وتحاول التخفيف عنها، بعد انفصالها عن زوجها، الذي لعب دوره الفنان أحمد خالد صالح، حيث كانت عونًا وسندًا لشقيقتها.

إنها الفنانة المتألقة ريم رؤوف، والتي كان لموقع “القائد نيوز” معها هذا الحوار الممتع والشيق عن دورها في بدون سابق إنذار، فإلى نص الحوار…

ريم رؤوف
ريم رؤوف

هل ترين أن المسلسل كئيب بعض الشيء؟

كئيب شوية آه، وفيه بتقول مش كئيب إحنا مبسوطين.

وهل المخرج هاني خليفة هو من اختاركِ للدور؟

آه، هاني خليفة خلى الكاستينج دايركتور يكلمني خالد صفوت، وقاله قلها لو توافق تمثل الدور، لأنه صغير طبعًا، فأصلًا كنا متكلمين قبل كده، وقالي يا ريم طبعًا والدور بينادي صاحبه وأنتي ممثلة هايلة.

ريم رؤوف في مشهد من بدون سابق إنذار
ريم رؤوف في مشهد من بدون سابق إنذار

فالمهم لقيت خالد بيكلمني، فهو بيقولي الأستاذ هاني، ودي حاجة حلوة أوي وده هو شايفك في حتة تانية، فقلتله قله أنا لو قالي عايزك تيجي تقولي صباح الخير أنا موافقة.
ده أستاذ هاني خليفة، ده واحد من المخرجين في القايمة بتاعتي إني حلمي أشتغل معاهم، هو وأستاذة كاملة أبو ذكري، حلم بيتحقق هقول لأ؟، أستاذ هاني خليفة ده تاريخ.
ده راجل اشتغل مع أحمد زكي مساعد مخرج في أرض الخوف، ومخرج سهر الليالي، فده شرف ليا إنه يفكر فيا ده شرف ليا.

أنتِ تحبين التمثيل مع عائشة بن أحمد.. حدثيني عن ذلك.

والله ده حظي الحلو، هي ست لطيفة وممثلة كويسة جدًا.

الدور يختلف عن أدواركِ السابقة.. كيف ترين ذلك؟

الدور بالنسبة لي، يعني أنا دايمًا الأدوار اللي كنت باخدها فيها تمثيل جامد أوي، اللي هو صعيدية، ست غلبانة، خادم للشيطان وعندي 70 سنة وبصغر فيه، كلها أدوار مركبة وفيها تحدي، الدور ده دور هادي.

ريم رؤوف في شخصية سميرة في عُملة نادرة
ريم رؤوف في شخصية سميرة في عُملة نادرة
ريم رؤوف في شخصية أطياف في روحي فيك
ريم رؤوف في شخصية أطياف في روحي فيك
ريم رؤوف في شخصية أطياف في روحي فيك
ريم رؤوف في شخصية أطياف في روحي فيك

شعرت أنكِ كنتِ مرتاحةً في المشهد مع جهاد حسام الدين.. حدثيني عن ذلك.

أيوه، هي ممثلة شاطرة جدًا وفيه كيميا ما بيني وما بينها كبيرة جدًا، وشخصية لطيفة جدًا وممثلة كويسة جدًا.

ريم رؤوف وجهاد حسام الدين في مشهد من بدون سابق إنذار
ريم رؤوف وجهاد حسام الدين في مشهد من بدون سابق إنذار

وهل كنتِ تضيفين شيئًا على المشاهد فأشعر أنكما لم تكونا ملتزمتين بالسيناريو بشكل كبير فتقولان ما يوصل معنى المشهد؟

بالعكس دي بقى اللي بيهتموا بالكلمة، اللي مكتوبة في السكريبت، ولو هنغير لازم بنقول هنغير كذا، ده أصعب حاجة إنك تحفظ بالحرف.
قبل كده كان ممكن الواحد يطلع حاجات كده ارتجال، لكن لأ ده دول ملتزمين جدًا بالسكريبت، علشان كده صعب الموضوع صعب مش سهل.

وهل عملتِ في الوحدة الثانية أم مع هاني خليفة؟

لأ، كنت في الوحدة التانية، كان نفسي ألتقي بـ هاني خليفة كمان، بس اشتغلت مع أستاذ محمود عبد التواب “توبة”، وهو هايل طبعًا ومخرج حظي كويس إني أشتغل معاه.

محمود عبد التواب "توبة"
محمود عبد التواب “توبة”

وهل رأيتِ صوت وصورة قبل أن تعملي معه؟

آه طبعًا، بتاع حنان مطاوع كسر الدنيا، وكان متهيألي ده أول حاجة يخرجها، وهو مخرج عظيم طبعًا، إحنا كسبنا مخرج عظيم.

محمود عبد التواب "توبة" وحنان مطاوع في كواليس صوت وصورة
محمود عبد التواب “توبة” وحنان مطاوع في كواليس صوت وصورة

أنتِ سعيدة بالعمل مع كرو المسلسل خلف الكاميرا.. حدثيني عن ذلك.

آه طبعًا مبسوطة، ده شرف ليا أشتغل مع مخرج عظيم ومخرج صاعد وواعد، دي حاجة شرف ليا طبعًا.

هاني خليفة
هاني خليفة

وهل شاهدتِ بين السطور الذي شاركت فيه جهاد حسام الدين قبل رمضان؟

لأ، للأسف ماشفتوش بس بيقولوا حلو أوي، وجهاد شاطرة أوي طبيعية.

ريم رؤوف وجهاد حسام الدين في مشهد من بدون سابق إنذار
ريم رؤوف وجهاد حسام الدين في مشهد من بدون سابق إنذار

وهل تأخذين فكرةً عن الأدوار التي سبق أن قدمها الممثلين الذين يعملون معكِ أو ان تتابعي أعمال لهم قبل العمل معهم حتى تعرفي كيف ستسير الأمور بينكم أثناء التمثيل؟

لأ خالص بصراحة، يعني لو حد ماعرفوش بدخل أعمل بحث هو عمل إيه قبل كده، لكن مابتفرجش أصل الشخصية اللي بيعملها الممثل مختلفة.
يعني دينا غير آية غير حنان غير إيمان غير سماح، فهي هتمثل دي شخصية ودي شخصية ودي شخصية، مادام هي ممثلة كويسة فهتمثل كله كويس.

لكن ألا تأخذين فكرةً كيف يكون أسلوب تمثيلها؟

لأ للأسف، بس ببقى عايزة أعرف هي مثلت إيه قبل كده، عشان لما نتكلم أفتح حوار معاها، علشان مابقاش ممكن أحرجها أو أحرج نفسي، لأ أبقى فاهمة هي عملت إيه قبل كده.

ريم رؤوف وجهاد حسام الدين في مشهد من بدون سابق إنذار
ريم رؤوف وجهاد حسام الدين في مشهد من بدون سابق إنذار
جهاد حسام الدين وريم رؤوف في مشهد من بدون سابق إنذار
جهاد حسام الدين وريم رؤوف في مشهد من بدون سابق إنذار

علشان أفتح كلام لطيف، لأن أنا دايمًا بحب أفتح كلام مع الممثلين ونبقى قاعدين في جو لطيف، أدوب التلج أفتح محادثة لطيفة.
ولو المسلسل حلو وأنا شفته قبل كده ودورها عجبني بقول، لأن دايمًا بقول الحاجة الحلوة، لو حاجة وحشة بسكت، أنا بحب أتواصل مع الناس بشكل لطيف.

لكنكِ لا تحبين أن تقولي لأحد أن هناك عمل سيئ له.. أليس كذلك؟

لأ، وليه لازمتها إيه؟، ليه أضايق حد ولا أحكم على حد، وبعدين بتبقى الناس أصلًا حكمت، فلأ ماضايقش حد بالعكس.

وماذا تابعتِ خلال رمضان؟

كنت أتابع أشغال شقة في وقت فراغي كوميدي جدًا، تابعت لحظة غضب بنتي خلتني أتفرج عليه علشان ده مسلسل حلو، اتفرجت عليه ولقيته مسلسل حلو جدًا فاتبسطت، وطبعًا بدون سابق إنذار كل حلقة بتنزل بتفرج.

ريم رؤوف
ريم رؤوف

ألم تتابعي عتبات البهجة لـ يحيى الفخراني؟

لأ للأسف، بعد رمضان ما خلص هتفرج طبعًا على كل حاجة مش هسيب مسلسل، بس في رمضان صراحةً يعني كنت مش فاضية أوي، ورمضان وقته قليل، فلأ بعد رمضان أكيد هتفرج، يحيى الفخراني نفسي أشتغل معاه كمان، ده يحيى الفخراني، مبدع طبعًا.

على ذكر المبدعين، منذ فترة مرت الذكرى الـ19 لوفاة أحمد زكي، وأنا أعلم أنكِ تحبين أداءه كثيرًا.. حدثيني عن أحمد زكي.

ده المثل الأعلى بالنسبة لي.

لو كان مازال على قيد الحياة.. هل كنتِ ترغبين أن تعملي معه؟

كنت بتمنى أشتغل معاه، ده أنا بحسد الناس اللي اشتغلوا معاه حتى كمساعدين مخرجين، أنا بحسد المخرج هاني خليفة إنه اشتغل معاه، كان حلم من أحلامي إني أشتغل معاه، كان حلمي أشوفه بس، ده أحمد زكي، أحمد زكي واحد بس، أحمد زكي لا يكرر.

ريم رؤوف
ريم رؤوف

ومن أيضًا بخلاف أحمد زكي كنتي ترغبين في العمل معه؟

عادل أدهم، عادل أدهم، عادل أدهم، عادل أدهم، ممكن أقعد أقولك عادل أدهم كتير جدًا، سناء جميل طبعًا، خالد صالح الله يرحمه طبعًا، كنت عاشقة لأدائه وأخدت معاه صورة، كان ممثل هايل وإنسان لطيف جدًا، الله يرحمه.

أنتِ تحبين الأدوار التي فيها الطابع الشعبي قليلًا، مثل الصندوق وفاتن أمل حربي، فأنتِ تحبين هذه الأدوار اللطيفة.. أليس كذلك؟

لأ، أنا بحب كل حاجة، أنا بحب الأدوار الصعبة، والمرة دي بجربني في اللي هي الأدوار الهادية الطبيعية، علشان بلعبها فمبسوطة بيها.

لكن في الصندوق الدور كان هادئًا، فشقيقكِ في العمل كان يتعبك، لكن الدور كان هادئًا.. أليس كذلك؟

آه كان مجنني، آه يعني برضو بيعتبر الصندوق هادي دي حقيقة، واسمها حنان برضو بالصدفة، مش عارفة دايمًا بيجيلي اسم حنان ليه.

ريم رؤوف في شخصية حنان في الصندوق
ريم رؤوف في شخصية حنان في الصندوق

Views: 8

مساحة إعلانية

مساحة إعلانية

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

مساحة إعلانية

زر الذهاب إلى الأعلى

أنت تستخدم إضافة Adblock

بنعتذر عن المضايقة، لكنك بتستخدم إضافة adblock اللي بتمنعك من تصفح الموقع في الوقت الحالي، برجاء اغلاقها واعادة المحاولة