رانيا كمال: “المداح والكبير أوي ناجحين جماهيريًا والناس بتطالب بأجزاء جديدة ليهم”

كتب: ياسر خالد

هي رواية وناقدة صاحبة رأي سديد، تمتلك رؤية متميزة تستطيع من خلالها أن ترصد عناصر التميز والإبداع وكذلك جوانب القصور في العمل الفني.

فتزن الأمور بميزان حساس، حتى تكوّن فكرةً كاملةً عن العمل الفني، فتشيد بالعناصر الإيجابية فيه، كما تلقي الضوء على جوانب القصور حتى يتم تلافيها في الأعمال المقبلة.

إنها الناقدة والروائية رانيا كمال، والتي تحدث في تصريحات لموقع “القائد نيوز” عن رؤيتها النقدية عن الأعمال، التي تم تقديم أجزاء جديدة منها خلال شهر رمضان المبارك مثل المداح والكبير أوي.

رانيا كمال: “أغلب شركات الإنتاج بقت بتلعب على المسلسل الربحان”

وقالت رانيا: “اللي استنتجته إن أغلب شركات الإنتاج بقت بتلعب على المسلسل الربحان، المسلسل اللي بيكسب، بيتباع، اللي بتدور عليه القنوات”.

وأضافت: “الكبير والمداح المسلسلات دي سمعت كتير جدًا في أجزائها الأولى، والناس بقت بتستناها بشغف، ودايمًا عندهم فضول علشان يشوفوها”.

رانيا كمال: “القنوات بتدور على الحاجة اللي الناس بتحبها”

وأردفت رانيا: “يعني مثلًا المداح إحنا شعب فضولي في أمور السحر والشعوذة، ودايمًا عايزين نعرف إيه اللي هيحصل وبندور ورا الموضوع ده، وهتلاقي ناس بتقول أنا حصل معايا كده بالظبط، فالناس بتحب ده والقنوات بتدور على الحاجة اللي الناس بتحبها”.

وتابعت: “بالنسبة لـ الكبير، أنت لو لقيت أي حد بيقول أنا عايز أفصل وعايز أتفرج على حاجة تضحكني، أنا عايز أضحك، هتلاقيه من ضمن المسلسلات اللي بيروحلها الكبير”.

 

رانيا كمال: “المسلسلات دي لو مش ناجحة مافيش حد هيكرر التجربة تاني”

وأكملت رانيا: “فهي ليها ناسها برضو وليها النجاح بتاعها، ماحدش يقدر يتكلم في حاجة زي كده، لأن المسلسلات دي لو مش ناجحة، مافيش حد هيكرر التجربة تاني، هيروحوا يدوروا على حاجة جديدة”.

وعما إذا كان تقديم أعمال جديدة أفضل من تقديم أجزاء جديدة، قالت: “أنا معاك في إن الجديد بيبقى أحلى طبعًا، بس مش مضمون، أنت هتدور على حاجة يا هتطلع حلوة يا هتطلع وحشة، في نفس الوقت أنت في كارت ربحان معاك دلوقتي”.

رانيا كمال: “الناس بيدوروا على مسلسلات الأجزاء وبيستنوها”

وأتمت الناقدة والروائية رانيا كمال: “أنا عن نفسي بفضل يبقى فيه حاجة جديدة وحلوة، ورق حلو، ممثلين حلوين، لكن كل اللي أقدر أقولهلك في المسلسلات دي المداح ناجح جماهيريًا، الكبير أوي ناجح جماهيريًا، الناس بيدوروا عليها وبيستنوها وبتطالب بأجزاء جديدة ليهم كمان”.

Visits: 21