حوار: ياسر خالد
*لو ليا صديقة بتتعاطى المخدرات أكيد هقول لأهلها وهما هيقدروا يساعدوها أو يدخلوها مصحة
*ريهام حجاج سكرة ومتواضعة جدًا وبتساعد الصغير قبل الكبير ونجمة كبيرة ومجتهدة أوي
*فرحانة أوي إني بمثل قدام ريهام حجاج وهي ممثلتي المفضلة من أيام هبة رجل الغراب
*سامح عبد العزيز عملاق إخراج وهو أبويا الروحي ودايمًا بيدعمني وبيطلع مني الصح
*سعيدة إني اشتغلت مع سامح عبد العزيز مرتين في مسلسل صدفة ورمضان كريم
*أعمالي اللي جاية مفاجأة حابة أفاجئ كل اللي بيحبوني بيها قريب
فنانة شابة موهوبة طموحة، بدأت مشوارها الفني من خلال مسلسل رمضان كريم 2 للمخرج سامح عبد العزيز، والذي عرض في شهر رمضان من العام الماضي وكان جواز مرورها لعالم الفن.
لتشارك في الماراثون الرمضاني لهذا العام بمسلسل صدفة للنجمة ريهام حجاج ومن إخراج سامح عبد العزيز، والذي يعد العمل الثاني يجمعها بالمخرج سامح عبد العزيز.
وهو العمل الذي لفتت أنظار الجمهور إليها من خلاله ونالت العديد من ردود الأفعال عليه، وذلك بتجسيدها لشخصية سالي صديقة فرح، التي تقدمها الفنانة الشابة نور إيهاب.
إنها الفنانة الشابة دنيا صبري، والتي كان لموقع “القائد نيوز” معها هذا الحوار الممتع والشيق حول دورها في صدفة، فإلى نص الحوار…
لو لكِ صديقة تتعاطى المخدرات.. هل ستقولين لأهلها أم ستداري عليها وتخافين أن تغضب منكِ؟
أكيد هقول لأهلها عشان غلط، وهما يقدروا يساعدوها أو يدخلوها مصحة، أهلها هيقدروا يساعدوها أكتر مني.
ألا يمكن أن تداري على صديقتكِ أمام أهلها حتى لا تغضل ثم تبحثين عن طريقة تقولين لهم بها؟
هشوف إيه الصح وهعمله، لو اللي هخبيه شايفاه غلط أو حاجة فيها ضرر هقول علطول مش هيهمني.
ما أصعب مشهد لكِ في المسلسل؟
أصعب مشهد في الحلقة الأولى، علشان عدناه كتير والجو كان تلج أوي.
بماذا شعرتِ عندما قابلتِ أستاذة ريهام حجاج للمرة الأولى؟
أستاذة ريهام دي سكرة بجد، كنت خايفة في أول مشهد ليا معاها وكنت متوتره إني هقف قدامها، بس أول لما شفتها عسل أوي وبتدعمني ولو بتلخبط في مشاهد قدامها، كانت بتخليني أعيد وتقولي عيدي مرة واتنين عادي بجد.
وهي متواضعة جدًا وبتساعد الصغير قبل الكبير، وطيبة أوي ونجمة كبيرة أوي ومجتهدة أوي وبتبذل مجهود كبير أوي في الشخصية.
وفرحانة جدًا إني بمثل مع الأستاذة ريهام حجاج عشان هي ممثلتي المفضلة، من أيام مسلسل هبة رجل الغراب وأنا بموت فيها، وأتمنى أشتغل معاها تاني وتالت ورابع، عشان أنا بجد بحبها أوي والشغل معاها ممتع وبجد اتعلمت منها حجات كتيرة أوي.
من أكتر الفنانين الشباب في صدفة الذين أصبحتم أصدقاء من خلال المسلسل؟
الصراحة أنا بحب كل اللي في اللوكيشن، مش بس ممثلين لأ كله كلهم جمال أوي وكلنا واحد، وبجد أنا كنت بحس إن اللوكيشن بيتي التاني، مساعدين الإخراج ومساعدين الإنتاج كلهم بجد بحبهم جدًا، وهفتقدهم كلهم لما نخلص تصوير وأتمنى إني أشتغل معاهم تاني.
هل صدفة أصعب أم رمضان كريم العام الماضي؟
والله أنا شايفة إن مافيش حاجة صعبة على الممثل الشاطر، هو بيكون بس فيه توتر، وبالذات إني وقفت قدام نجمة كبيرة زي الأستاذة ريهام حجاج وإخراج عملاق الإخراج الأستاذ سامح عبد العزيز.
اللي بيشتغل مع الأستاذ سامح عبد العزيز بجد يا بخته وأنا بعتبره أبويا الروحي بجد، وهو دايمًا بيدعمني وبيخليني أعيد مرة واتنين وتلاتة وبيطلّع مني الصح.
وأنا سعيدة جدًا إني اشتغلت معاه مسلسلين، مسلسل رمضان كريم ومسلسل صدفة، وتأليف الأستاذ أيمن سلامة اللي بجد بيكتب قصص واقعية ومشاكل الطلاب اللي بجد حقيقية في كل المدارس، فيا بختي بجد إني اشتغلت معاهم.
ومسلسل رمضان كريم بردو كنت مبسوطة جدًا إني شاركت في مسلسل جميل أوي، وبيحسسك بأجواء رمضان والناس كلها كانوا بيحبوه ومتابعينه ودي حاجة جميلة أوي.
ومع نجوم كبار وإخراج العبقري الأستاذ سامح عبد العزيز وتأليف الأستاذ احمد عبد الله، اللي قدر يخلي المسلسل بطعم رمضان وأجوائه الجميلة، وقدر يخلي المشاهدين يضحكوا و يزعلوا وكل حاجة.
كيف ترين أن صدفة به عدد كبير من الفنانين الشباب وأن كلكم ظهرتك بقوة في المسلسل؟
أنا مبسوطة جدًا إن مسلسل صدفة إدى فرصة لينا، وبجد دي حاجة كل الشباب الموهوبة محتاجها وقدروا يخلوا كل واحد يطلع الشخصية صح.
ومديين لكل واحد فينا حقه في الدور، وبجد فرحانة جدًا، وأتمنى دايمًا إن كل مخرج ومؤلف يدي فرصة للشباب.
ما هي أعمالكِ القادمة؟
أعمالي اللي جاية مفاجأة بقى، حابة أفاجئ كل اللي بيحبوني بيها قريب، وبجد مبسوطة إن كل الناس بتكلمني عن المسلسل وعن دوري في دور سالي.
وفرحانة إن الدور كان علامة بالنسبة لي مع الناس، وبيعرفوني في الشارع، وكل الجمهور قالولي إحنا بجد صدقناكي وعملتي دورك بشكل جميل أوي.
وفي نفس الوقت ناس كتير أوي قالولي إيه التناكة والرخامة دي، عشان اللي عملته في الحلقه 7، وبقولهم ده تمثيل والله.
وما الرسالة التي تودي توجيهها للجمهور؟
يارب دايمًا الناس حاباني وبتدعمني، وحابة أشكر مامتي جدًا لأن هي أكتر حد وقف معايا في التصوير، ودايمًا داعماني وواقفة جانبي، وبتدربني علي الدور وبتقولي إيه الصح وإيه الغلط.
ربنا يخليهالي، وأحب أقولها شكرًا ياست الكل على كل اللي عملتي معايا، وربنا ميحرمنيش منك.
Views: 10
مساحة إعلانية
مساحة إعلانية