فن

محمود حجازي يكشف عن الصعوبات في مسلسل حدوتة منسية

كشف الفنان محمود حجازي عن تفاصيل مشاركته في أحدث أعماله الدرامية مسلسل “حدوتة منسية” والذي يعرض حاليًا عبر قناة CBC، والذي حقق نجاحًا كبيرًا وتصدر تريند مواقع التواصل الاجتماعي.


​​​​​​
وتحدث محمود حجازي في تصريحات صحفية وكشغ عن سبب قبوله لدور نوح، وقال: “اللي شجعني أن أنا أقبل دور نوح في حدوتة منسية إنه هو دور مختلف وأول ماقرأت المسلسل أنا اتعاطفت جدًا مع نوح، مع شخص ميعرفش أهله ودايمًا حاسس إنه هو غريب وإن هو مش مرغوب منه في وسط أخواته، مضيفًا: “فهو شخصية مليانة أحداث ومليانة مواقف وحبيت جدًا أن أنا أمثلها في وسط طاقم عمل كبير والمسلسل ده أنا بحبه جدًا”.

وتابع: “اللي جذبني لسيناريو حدوتة منسية إن في تنوع واختلاف في كل خط موجود، المشاهد يحب يعرف نهاية الحلقات وايه اللي يحصل، وقصة لذيذة جدًا وشدتني كممثل بالذات دوري نوح”.

وأوضح محمود حجازي الصعوبات التي واجهته أثناء تصوير بعض المشاهد، قائلًا: “الصعوبات اللي واجهتني مشهد الغرق المشهد اللي كان بينقذ فيه الولد ونط من المركب بجد والأحداث دي عاملناها بجد وعملتها من غير دوبلير، فكان مشهد صعب أوي وكنت شايل همه وعدت على خير ودي كانت من أصعب المشاهد وفيه مشهد تاني في نهاية المسلسل”.

وكشف حجازي عن طبيعة علاقته بالفنانة ريهام حجاج، وقال: “أنا بتربطني علاقة طيبة ومحترمة بريهام حجاج، إشتغلت معاها مسلسين كأي ممثلة وده أول عمل للشركة عندها كإنتاج أنا كنت بمثل فيه”، مشيرًا “الموضوع بالنسبالي خدته إن ريهام أكيد داخلة عندها هدف وعايزة تقدمه وهي مهتمة جدًا إنها تقدم فن مختلف، ومهتمة جدًا إنها تدي المواهب الحقيقيين فرص بجد وإن هي تعمل شركة قوية وبتقدم عمل كبير لنجوم كبار وتأثر في الدراما وكل ده هدفها وكان واضح أما إتقابلنا وإتكلمنا وباركتلها وأنا مبسوط جدًا إن أول تجربة لشركتها أنا كنت جزء منها”.

وعبر محمود حجازي عن رأيه في السفر للخارج في ظل الأوضاع الراهنة، مؤكدًا: “لا مش هو ده الهدف، هو الأوضاع اللي إحنا تخلي الشخص إنه يركز وميضيعش وقتها وتقوم تشتغل سواء كنت هنا أو كنت برا أو كنت في أي حتة أو كنت مع أهلك أو بعيد عن أهلك”، مشددًا: “الأوضاع دي محتاجة راجل يكون قدها ويقدر يتحمل المسؤولية، سواء هنا أو برا المهم إن تكون جاهز والمهم إن إنت تكون بتشتغل على نفسك”.

كما وجه رسالة للشباب المتغربين، قائلًا: “كل واحد سايب أهله ومتغرب أقوله ربنا معاك وإنه أكيد بيمر بمشاعر صعبة جدًا وإنه بيفتقد القاعدة معاهم بتفتقد الكلام معاهم، بيفتقد الشوارع اللي كان بيمشي فيها وكل تفاصيل مر بيها أكيد بيفتقدها واللي بيصبره إنه هيشوفهم مرة تانية وربنا معاهم ويرجعوا بالسلامة، واشتغل وكون نفسك صح وإعمل اللي إنت بتحبه وبلدك مستنياك وبلدك عمرها ماهتنساك”.

وكشف أيضًا عن تفاصيل دوره في مسلسل سر إلهي، وقال: “دوري في مسلسل سر إلهي بعمل دور صعب أوي عنيف جدًا بياخد الأمور بمشاكل علطول وهو إنسان دايمًا بيعمل مشاكل وهيبقى سبب في أذى ناس كتير وسبب في مشاكل كتير في المسلسل”.

Visits: 4

مساحة إعلانية

مساحة إعلانية

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

مساحة إعلانية

زر الذهاب إلى الأعلى

أنت تستخدم إضافة Adblock

بنعتذر عن المضايقة، لكنك بتستخدم إضافة adblock اللي بتمنعك من تصفح الموقع في الوقت الحالي، برجاء اغلاقها واعادة المحاولة