تصريحات وحوارات خاصةفن

خاص| لينا صوفيا بن حمان لـ القائد نيوز: “بعمل شخصية نادية في حسن المصري”

فنانة شابة فرنسية مغربية مصرية، لمعت في أكثر من عمل في السينما والدراما، منذ طفولتها وحتى الآن.

دخلت عالم الفن في عام 2016 من بوابة السينما، عندما قدمت أول أدوارها بها، وهي طفلة، من خلال فيلم هيبتا.

توالت بعدها أعمالها، وفي كل عمل أثبتت أنها تمتلك موهبةً حقيقيةً، لتحقق من خلال أدوارها في هذه الأعمال نجاحًا كبيرًا.

إلا أنها غابت لمدة سبع سنين عن السينما، حيث شاركت خلال هذه السنين في مجموعة مميزة من الأعمال الدرامية الناجحة.

وفي رمضان الماضي، تألقت بشدة من خلال مسلسل كامل العدد، الذي تم عرضه عبر منصة شاهد vip، وحقق نجاحًا كبيرًا.

لتعود بعد نجاحها فيها إلى السينما مجددًا، من خلال فيلم حسن المصري مع الفنان أحمد حاتم، وهو من إخراج سمير حبشي وإنتاج أفلام مصر العالمية ونيوسينشري.

وهو الفيلم الذي كانت أغلب مشاهده في لبنان، حيث ظلت شهرًا كاملًا هناك، من أجل تصوير دورها في العمل.

إنها الفنانة الشابة لينا صوفيا بن حمان، التي كان لـ موقع القائد نيوز معها هذا الحوار الممتع والشيق عن دورها في حسن المصري، فإلى نص الحوار…

ما اسم الشخصية اللي تلعبينها في حسن المصري؟

اسم الشخصية اللي بعملها في حسن المصري نادية.

ما هو إحساسكِ وأنتِ تقفين أمام الفنان أحمد حاتم؟

إحساسي وأنا واقفة قدام أحمد حاتم هو تقريبًا نفس الإحساس، اللي الشخصية كانت حاسّة بيه.

علشان علاقتنا، إحنا الشخصيات بتاعتنا مختلفة عن الفيلم، بس العلاقة اللي ما بينا شبه بعض جدًا في الفيلم وفي الحقيقة.
فنفس الإحساس اللي نادية حست بيه، فإن شاء الله تبقوا تشوفوا إيه الإحساس ده.

ما أصعب شيء في دوركِ في الفيلم؟

الفيلم ده فيه أنواع كتيرة الدراما، هو أكشن في نفس الوقت رومانسي، وفي نفس الوقت فيه تراچيدي وفيه ساسبنس، وفيه كوميدي شوية.
فهو الحتة الصعبة، مش هقدر أقول إنها صعبة، ولكن أقدر أقول إنها كانت جديدة عليا، كانت الحتة الأكشن، علشان أنا عمري ما عملت أكشن في حياتي.

فالفيلم إن شاء الله يعجبكم، وأنا كان فيه حاجات كنت خايفة أعملها، بس عملتها برضو، فطبعًا الحتة الأكشن كانت جديدة عليا.

ما هو شعوركِ بعد رجوعكِ للسينما بعد غياب سبع سنين منذ آخر فيلم لكِ هيبتا؟

طبعًا إحساس ممتع جدًا إني من سبع سنين عملت فيلم سينما قوي جدًا، وفيه ممثلين أقويا جدًا.
وبرجع بعد سبع سنين برضو في فيلم قوي جدًا، وإن شاء الله يعجب الناس جدًا، وفيه ممثلين جامدين جدًا
.

زي ما فيه شركة إنتاج قوية جدًا، شركة الإنتاج بتاعت أ.يوسف شاهين، إحنا مانقدرش نتكلم عن الموضوع ده.
وطبعًا إخراج قوي جدًا، وحتى الصورة قوية أوي، والقصة، فأنا فخورة أوي بالموضوع ده والحمد لله.

سمعت أنكِ تشاركين في بطولة فيلم فرنسي مغربي.. هل لازال هذا المشروع قائمًا؟

أنا صورت فيلم story في شهر 2 2022، مع مخرج فرنساوي مغربي أمريكاني.

وهو نزل في السينما في شهر 10 2022، ودلوقتي هو في توزيعه.
وأنا طبعًا فخورة جدًا إني شاركت في الفيلم ده، عشان أول مرة أمثل في المغرب.
وأنا فخورة جدًا إني قدرت أمثل في بلدي، وقدرت أقرب من بلدي كتير في التجربة دي.
والفيلم أول مرة بالفرنساوي، فكانت برضو تجربة جديدة وحلوة.
والفيلم نزل في السينمات في المغرب في شهر 10 2022، وهو دلوقتي في مرحلة التوزيع في الخارج، فالحمد لله على كل حاجة.

ماذا كان شعوركِ عندما قابلتِ الفنانة دينا الشربيني في كامل العدد بعد أن التقيتما من قبل في هيبتا؟

أنا طبعًا fan كبيرة أوي لـ دينا الشربيني، فدايمًا كنت بتفرج على أعمالها وبحبها جدًا.

وقابلتها في 2019، هي كانت بتصور فيلم مع أ.كريم عبد العزيز، وعرفتني وفرحت أوي.
وبعدين لما جينا نعمل پروفة الترابيزة قبل كامل العدد، هي ماعرفتنيش بس لما شافت مامتي عرفتني علطول.

وفرحت وحضنتني وقالتلي إني وحشتها وقالتلي إني كبرت، وأنا طبعًا بحبها أزي وكل مرة بقابلها بحبها أكتر من المرة اللي قبلها.

هل لينا بن حمان تفضل أن تشارك في الأعمال التي لها طابع عائلي لايت عن غيرها من أنواع الدراما؟

أنا مابفضلش أي حاجة، أنا بحب طبعًا الكوميدي واللايت، بس في نفس الوقت بحب الدراما.
أنا شايفة إنه طالما عمل بيناقش قضايا فخلاص.

إذا كان بقى كوميدي، بطريقة كوميدية، بطريقة دراما أو بطريقة أكشن، أنا بحب كل حاجة وبحب الأدوار المختلفة عن شخصيتي.
فأنا ماعنديش type مفضل، بس أهم حاجة بالنسبالي إن العمل يكون بيناقش حاجة أو بيعلم حاجة، وطبعًا مخرجه يكون حد قوي.

حدثيني عن تجربتكِ في بالحجم العائلي.

طبعًا بالحجم العائلي بطولة د.يحيى الفخراني، دي حاجة كبيرة أوي أوي وطبعًا إخراج أ.هالة خليل.

يعني أنا ماقدرش أحمد ربنا أكتر من كده إني شاركت في العمل ده، وطبعًا الأجواء كانت تحفة، إحنا قعدنا أربع شهور بنصور في مرسى علم، فكنا فعلًا عيلة.

هذا الجزء من الحوار تجيب عنه أ.هبة فرّاج، والدة الفنانة لينا صوفيا بن حمان.

هل يكون لكِ دور في اختيار لينا لأدوارها؟

قبلما يكون في أوديشن أو أي حاجة، أنا بسأل مين المخرج ومين الكاتب.

وأنا أتصور عشان كده الحمد لله اختيارات لينا دايمًا كويسة.
من هيبتا وكوكو شانيل مع أ.هادي الباجوري، بعد كده هذا المساء مع أ.تامر محسن طبعًا، وطبعًا بالحجم العائلي مع أ.هالة خليل.
بعد كده مع أ.مصطفى أبو سيف قواعد الطلاق ال45، أ.أمير رمسيس النزوة، وطبعًا أ.خالدالحلفاوي وأ.سمير حبشي.
فأنا بالنسبة لي المخرج عنوان للاختيارات، فalready عشان نروح أوديشن بنشوف مين المخرج.
لو المخرج مشجعنا، طبعًا بنكون بندعي ما إحنا روحنا أوديشنز تانية مع مخرجين كتير بنحبها، بنتمنى نشتغل مع مخرجين كتير تانيين، ولكن الأساس طبعًا المخرج وطبعًا الأبطال.

هل تقرأين معها الأدوار وتعطينها رأيكِ إذا كان الدور مناسبًا لها أم لا؟

أكيد وهي صغيرة كنت بقرأ معاها الأدوار طبعًا، وهو already الدور بيبقى مناسب.

لأن لما بيكون فيه مخرج كويس بيعرض دور كويس، وبيكون دور مناسب جدًا دي حاجة.
والحاجة التانية هي دلوقتي كبرت الحمد لله شوية، فهي بقت بتفهم، وممكن تكون بتفهم أكتر مني، فإحنا ممكن نتناقش أو نتكلم.
ولكن هي عندها الـ acting coach بتاعها، أستاذ الـ acting د.فريد النقراشي، فهو طبعًا بيناقشها، بيتكلموا وبيعملوا شخصية، وبنحاول نشتغل على أسس سليمة.

Views: 208

مساحة إعلانية

مساحة إعلانية

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

مساحة إعلانية

زر الذهاب إلى الأعلى

أنت تستخدم إضافة Adblock

بنعتذر عن المضايقة، لكنك بتستخدم إضافة adblock اللي بتمنعك من تصفح الموقع في الوقت الحالي، برجاء اغلاقها واعادة المحاولة