ممثل شاب طموح، قدم العديد من الأدوار الناجحة، خلال السنوات الستة الماضية، واستطاع أن يثبت وجوده على الساحة التمثيلية بقوة.
من أبرز أعماله “اللهم إني صائم” عام 2017، “الطاووس” عام 2021، “فاتن أمل حربي، بابلو” و”دوبامين” عام 2022 و”الكتيبة 101″ عام 2023.
وهو يخوض أولى تجاربه السينمائية، من خلال فيلم “خمس جولات” مع عدد الممثلين الشباب، والذي انطلق عرضه موخرًا بالسينمات.
إنه الممثل الشاب محمد سامي، الذي كان ل موقع “القائد نيوز” معه هذا الحوار الممتع والشيق حول تجربته في “خمس جولات” ودوره فيه، فإلى نص الحوار..
* حدثنا عن تجربة فيلم “خمس جولات”.
الفيلم ده فيلم مصري رياضي، بيتكلم عن الـmma، يعتبر أول فيلم مصري بيتكلم عن الرياضة دي، فيلم بطولة شبابية، آدم الشرقاوي، نور النبوي، داليا شوقي، معاهم ماجد المصري، مصطفى درويش الله يرحمه، أرسينك، عايدة الأيوبي وأنا.
* وما هو دورك في الفيلم؟
أنا دوري في الفيلم شخصية اسمها فهمي، فهمي ده كان مدرب mma عايش في أمريكا، وبعدين رجع مصر وبيعمل بطولات في إسكندرية، بيجيب شباب ويعمل بطولات، ويحاول إن هو يكسب من وراهم فلوس، وهو في الفيلم طالع صديق مصطفى درويش الله يرحمه وماجد المصري، والفيلم إنتاج شركة علام مهندس يحيى علام، إخراج أستاذ مازن أشرف، كتابة أستاذ محمد عبد المعطي، والفكرة فكرة يحيى علام ومازن أشرف.
* كيف كانت كواليس الفيلم؟
كواليس العمل كلها كانت شبابية، كلنا شباب مع بعض، الكواليس كانت لطيفة جدًا، أستاذ ماجد المصري كان دايمًا عاملنا دعم “support”، وبيذاكر معانا وبيشجعنا وبيدينا نصايح.
مصطفى درويش الله يرحمه طبعًا اتعاملنا معاه، واتعرفنا عليه عن قرب، وكان شخصية كويسة جدًا، شخصية طيبة وشخصية جميلة وجدع وراجل وصاحب صاحبه، وكلنا طبعًا افتقدناه، وكلنا كنا محتاجين إن هو يكون موجود معانا في الأيام دي وفي وقت عرض الفيلم.
* ماذا كان شعورك عندما تم ترشيحك للفيلم؟
طبعًا أنا لما اترشحت كنت متحمس جدًا، لأن أنا متحمس للنوعية دي من الأفلام، الأفلام الرياضية، لأنها ليها تأثير على التوجه المجتمعي للشباب إنها تحفزهم على ممارسة الرياضة،
كمان هي من ناحية الصناعة هي أفلام ناجحة جدًا، زي هوليوود عندنا سيلفستر ستالون لما عمل روكي، وبعد كده استثمر وعملوا منه سلسلة أفلام كريد، وكانت أفلام ناجحة جدًا على مستوى الصناعة، فأنا أتمنى إن الفترة الجاية يكون فيه أفلام كتير من النوعية الرياضية دي، علشان تحفز الشباب للاتجاه للرياضة، علشان تزود الوعي المجتمعي ناحية الرياضة، وعشان كمان هي بتعمل طفرة في الصناعة، وأفلام ناجحة جدًا من ناحية الصناعة.
Views: 20
مساحة إعلانية
مساحة إعلانية