رامي جمال يتحدث عن مشكلته في الإنجاب وعلاقته بتامر عاشور بالجزء الثاني من حواره مع أسما إبراهيم

واصل المطرب رامي جمال حواره مع الإعلامية أسما إبراهيم في الجزء الثاني من حلقته ببرنامج حبر سري، والمذاع عبر قناة القاهرة والناس.

وتحدث رامي عن العديد من الأمور، التي تخص حياته الفنية والشخصية.

وفي السطور التالية نستعرض أبرز التصريحات، التي أدلى رامي جمال خلال الجزء الثاني من حلقته بـ حبر سري.

أزمة رامي جمال مع ميريام فارس

فعن أزمته مع المغنية اللبنانية ميريام فارس، قال رامي: “ماخدتش منها الفلوس، اللي عليها ليا، بس هي مانزلتش الأغنية، بس مارجعتليش ملكية الأغنية”، موضحًا: “يعني إحنا المفروض إننا مثلًا، بتيجي تقولي لرامي أنا هاخد الأغنية دي، فبتدفعيله الفلوس، فبتقوليله عايزة حق الملكية، فاللي حصل إني عملت حق الملكية، قبلما آخد بقيت الفلوس”.

وأضاف: “اتفاجئت الأغنية خلصت واتوزعت، وصرفت فلوس أنا من جيبي لتنفيذها، ومابتردش”، لافتًا: “آخر مرة كلمتها كان قبل البوست ده بخمس أو ست شهور، أنا مابكلمش حد أكتر من مرة أو مرتين، لأنه في الآخر، أنا آسف اللي هي خدته مني مش حاجة تخليني أجري وراها طول العمر، هو في الآخر أغنية غالية على قلبي وحاجة بحبها، بس ما أنا بتعلم”.

وحول تصريحات ميريام فارس الأخيرة، علق رامي: “زمان كنت بحبها، قدمت أغنيتين تلاتة زمان وهي صغيرة، كانت شكل جديد وأنا قلت عندنا حد يعمل أغاني ستايل ويبقى شكله شبه الأجانب شكلًا، صوتها لطيف بس مش الصوت الرهيب، فنجاحها في الفترة دي، أعتقد أن 90% منه كان بسبب مصر، لأن ماكنش فيه قنوات أغاني غير في مصر”.

وأضاف: “ففكرة إني أشوف أي فنان، مش هي لوحدها، بينسى الخير، اللي شافه من البلد دي وناسها، أنساه براحتك، تغلط مش هنسيبك، لأنه في الآخر أنت بتتكلم عن بلدي، فحسب بالعظمة وأنت قاعد في بيتك في حمامك حس بالعظمة، حس بالعظمة لما تبقى أنت خلاص بتعرف تنجح علطول، لكن ماحسش بالعظمة، فأقل أدبي”.

وأكمل رامي: “وأنا بتكلم عن الشعب المصري، وأنا بتكلم عن مصر، خليكي عارفة إن أكبر منك بكتير أوي، وقتما بنعوزهم بييجوا، إحنا جبنا أكبر أسامي في الدنيا، إحنا J Lo وبيونسيه والناس كلها جت، محدش ماجاش عندنا، فأكيد مش هي اللي كبيرة على مصر، ده مفيش كلام، وأنا عاوز أقولها لو زعلانة إنك مابتتجابيش بقالك فترة، برضو ماترديش كده، لأنه في الآخر الشعب ده حر في إنه يجيبك أو لأ، وفي الآخر برضو بقولها الفلوس هدية مني”.

رامي جمال يكشف عن أن لديه مشكلة في القدرة على الإنجاب

وكشف رامي عن أنه لديه من مشكلة في الإنجاب، لكنه راضي، لأنه يعتبر أبناء أخيه أحمد بمثابة أبنائه، وأن كل ما كان يخشاه أن يؤثر ذلك الأمر على زوجته، قائلًا: “اللي يخصني في الموضوع ده ناريمان”، مؤكدًا أنه راضيًا بما كتبه له الله، موضحًا أنه يتمنى دائمًا عندما ينقص منه شيء، أن يكون شيئًا يقدر على تحمله وأن يكون ليس صعبًا.

علاقة رامي جمال بتامر عاشور

كما تحدث عن رفيق دربه المطرب والملحن تامر عاشور: “إحنا ناس أخدت شقة سوا، كلت من إيد مامته أد ما كلت من إيد مامتي، كان جانبي في السيكشن في الكلية، أول حد وهو عنده 17 سنة، وأنا نفس الكلام، كان هو بيشتغل في مكان، وأنا في الكلية كنت مش عارف هو بيشتغل بيعمل إيه ولا بياخد كام؟، قلتله أنا عاوز أشتغل علشان بصرف على نفسي، فخدني في المكان ده وقسم معايا رقم مابيتقسمش، كان 30 جنيه، قدر يقسم 30 جنيه، إحنا كنا ساعتها صغيرين، طموحنا في الآخر إن إيجار البيت يبقى موجود، وإننا نعمل اللي بنحبه برضو، هو في الآخر تامر نفسيته حلوة، تامر بالنسبة لي عامل زي أحمد أخويا ومحمد أخويا، أنا خطوة خطوة لتامر، لازم أبعت وأباركله وبحبه وأفرحله من قلبي”.

وأشار: “فيه ناس بتقولي أنت مابتغيرش، أقولهم أغير من إيه وأغير ليه؟، آحنا في يوم من الأيام كنا بنحلم بحاجة سوا، هو سبق وهو أول واحد وصلها، لأنه غنى قبلي، غنى قبلي بأربع سنين، ودي كانت حاجة ممتعة بالنسبالي جدًا، لأن وصول حد بحبه لبداية الطريق، إذا كان وهو قسم الـ30 جنيه، فكان في دماغي إنه لو وصل أكتر، هيعرف يقربلي المشوار”.

وأتم الفنان رامي جمال: “ففي الآخر الشغف إننا بنحب الأغاني الدراما شوية، إحنا عاملين أنا وتامر مع بعض لحد دلوقتي حفلتين هنا في مصر”، وعن غضبه من مقارنة الجمهور له بالفنان تامر عاشور، رد: “ليه؟ ده بيقارني بفنان شاطر جدًا، ده بيداري بأخ أنا وهو لينا ذوق في المزيكا شبه بعض أوي، رامي جمال هو اللي عامل أنا مش بتاعت الكلام ده، اللي هي أغنية فرفوشة جدًا، وأغنية إليسا وسعد الأخرانية، وهو اللي بيحب يغني أغاني الدراما، هي أقرب أنا بحب الأغاني الدراما، وعندي اوعديني وسقف مش دراما، بس الأغاني الدراما علشان بتبقى يا حالات كانت تخصك أو كانت تخص الناس، اللي حواليكي، فتبقى الأقرب لقلبي، أرجعلك لتامر بقى، أي خطوة تامر بياخدها ممتعة بالنسبالي، ويارب أشوفه أنجح مما هو نفسه فيه”.

Views: 13