حورية فرغلي تكشف تفاصيل حالتها الصحية بعد إزالة الرحم

كشفت الفنانة حورية فرغلي تفاصيل حالتها الصحية، بعد إزالة الرحم، وذلك في مداخلة هاتفية لها مع الإعلامية لميس الحديدي ببرنامج كلمة أخيرة.

وتحدثت حورية عن معاناتها قبل إجرائها جراحةً لإزالة الرحم، إذ أنها مرت بظروف صحية سيئة، بدأت تتعافى منها تدريجيًا بعد الجراحة.

وقالت حورية: “أنا عاوزة أقولك إنك رفيقة كفاح، لو تفتكري من 15 سنة، أنا شيلت سبع أورام، وطلعت معاكي في البرنامج وقعدنا نتكلم عن الموضوع ده”.

وأردفت: “وقلت لك إن الدكتور قالي أديكي 10 سنين، حاولي تتجوزي وتخلفي فيهم، وأنا بولدك أشيلك الرحم، عشان الأورام دي ممكن تقلب سرطانية، لو تفتكري”.

لتعلق لميس: “فاكرة، فاكرة كنا في هنا العاصمة في cbc، فاكرة كويس أوي”.

لترد حورية: “بالظبط بالظبط”، وتابعت: “أنا بقالي ست سنين نزيف مش طبيعي، كأنك دبحتي خروف، يعني كتير كتير كتير”.

وأكملت: “الهيموجلوبين عندي كان تلاتة، أنيميا غير طبيعية”، مشيرةً: “بابا لما شاف كده، بابا جراح، راح مكلم الأستاذ الكبير جعفر، وقاله هاتهالي”.

حورية فرغلي: بابا ضحك عليا قالي ساعة هيشيلوهولك بالمنظار وهتروحي

وأضافت: “بابا ضحك عليا، قالي انتي هتروحي نص ساعة بالمنظار، هيشيلوهولك بالمنظار وهتروحي”.

وواصلت حورية: “رحت المستشفى، عملولي التحاليل وعملولي الأشعة، قالولي انتي أكلتي؟، قلتلهم لأ، الساعة سبعة الصبح دلوقتي، أنا صحيت وجيتلكم علطول”.

واستكملت: “يا فلان افتح أوضة العمليات، رحت داخلة عمليات علطول”.

ثم أردفت: “الدكتور بيقولي تسع أورام، كل ورم 6×4 سنتي، والعملية بدل ما خدت ساعتين، خدت أربعة، لكن قالي لما حللنا الأورام دي، طلعت أورام حميدة”.

وتابعت حورية: “قالي أنا اضطريت أشلك الرحم بعنق الرحم بكل حاجة”.

مضيفةً بنبرة يكسوها الحزن: “فخلاص بقى كده أنا الحمد لله، أنا بس زعلانة إني عمري في حياتي ما هيبقى عندي طفل بس مش أكتر”.

حورية فرغلي: كان فيه دايمًا بصيص كده من الأمل إني أجيب طفل

وعن شعورها وهي تدخل غرفة العمليات، قالت حورية: “وأنا داخلة كنت بعيط، لأني رغم إني عارفة ومتأكدة إن فات ميعاد الولادة، فات ميعاد إني أجيب طفل، أنا عندي 46 سنة، بس كان فيه دايمًا أمل كده بصيص كده من الأمل”.

مردفةً: “فلما دخلت أوضة العمليات، خلاص بقى تيقنت إن ده مش هيحصل، بس الحمد لله، بابا بيقولي دلوقتي، آخر كام تصوير ليا، الناس كانت بتتكلم إني بيغم عليا، كان وشي علطول شاحب، مفياش حيل من كتر النزيف من كتر النزيف”.

ولفتت: “بس دلوقتي بابا بيقولي وشك هيورّد، وهيبقى عندك طاقة، وهتبقي حتى حالتك النفسية هتبقى كويسة، فالحمد لله الحمد لله عدت على خير”.

وأشارت: “بعد البرنامج اللي عملناه زمان، أنا رحت جمعية الأورمان للأطفال ذوي الاحتياجات الخاصة، وتكفلت ولدين، ومارضيوش آخدهم معايا البيت، عشان أنا مش متجوزة”.

متابعةً: “قالولي انتي ممكن تتكفلي بيهم، وهما عندنا، المهم اتكفلت بيهم، بقيت كل نهاية أسبوع أروحلهم، لكن ماتوا وهما عندهم ست سنين”.

وحول إمكانية تكفلها بأطفال مجددًا، قالت حورية: “انتي مش متخيلة أنا بعشق الأطفال إزاي يا لميس؟!، انتي مش متخيلة بعشق الأطفال إزاي!”.

مواصلةً: “أنا لما سألت، قالولي لازم تبقي متجوزة ومعاكي ورقة جواز”.

بقول الحمد لله في كل ثانية وراضية بأي حاجة ربنا يعملها معايا

وأتمت حورية فرغلي: “الحمد لله، أنا بقول الحمد لله في كل ثانية، ويمكن لو كنت خلفت، كنت أخلف ولد مش طبيعي، أو كنت خلفت ولد عاق، أنا بس راضية بأي حاجة ربنا يعملها معايا، أنا راضية الحمد لله، وبعدين أنا بعتبر كل البنات بناتي”.

آخر أعمال حورية فرغلي

يذكر أن آخر أعمال الفنانة حورية فرغلي مسلسل أيام بجزأيه الأول والثاني، والذي تم عرضه عبر منصة شاهد vip وشبكة قنوات mbc.

أبطال مسلسل أيام

والجدير بالذكر أن شارك في بطولة أيام رياض الحولي، شيري عادل، سلوى خطاب، أحمد صفوت، ندا موسى، محمود حجازي، رشدي الشامي وغيرهم، تأليف سماح الحريري وإخراج محمد أسامة.