كتبت سهام صلاح
قام الفنان عمرو بتوجيه نصيحة لجمهوره ومتابعيه بمنشور قد كتبه عبر حسابه الشخصي على موقع التواصل الإجتماعي فيسبوك من توفير الرفاهيات والتبرع للأماكن التي في حاجة لذلك
وكتب قائلًا: بوست جد على غير العادة…
بصرف النظر عن الكومنتات اللي هتقول ياعم إنت فنان وإنت بتاخد ملايين وإنت مالك بالكلام ده وكل الحاجات اللي مش صح دي بس هقول برده.
وتابع: مؤخراً بسبب ظروف معظم الناس بمختلف طبقاتهم وإحتياجتهم وأنا منهم بدأ كل واحد فينا يفكر إزاي يوفر وإزاي يستغنى عن المصاريف اللي ممكن يستغنى عنها بس أنا إكتشفت أن أنا الشيطان بقى بيخليني أستنصح مش أوفر ..يعني بصرف عادي مصاريفي اليومية اللي مش كلها الصراحة أساسية أو ليها بديل بس بوفر في الخمسة جنيه اللي بدفعها للي بيحطلي بنزين أو بقلل التيبس اللي بسيبه في مطعم كلت فيه ب برقم مش شوية وإلخ من نوعية المصاريف دي.
وأضاف: ومع إني بكره السنتحة والفلوس الأتاوه اللي ملهاش لزمة دي وبتعصب من اللي بيرمي نفسه على بريريز العربية عشان يليطها بفوطته اللي مداقتش طعم الميه في حياتها وبقول دول ناس مش بيعملوا حاجة وبيقرطسونا بس لما فكرت ( ووارد جداً أكون بفكر غلط) قولت ياعم سيبهم يقرطسوك بمزاجك وخد أنت الثواب يعني ..وهو ممكن يكون بالنسبالك بيستليح بس في الآخر الأكيد إن هو محتاج الفلوس دي.
واستكمل: ولما بسمع حد بيقولي يا عم الناس دي بيعملوا فلوس قد كده بسخن ومش بديهم وبعدين بفكر كده بيعملوا كام يعني ؟ ألفين جنيه في الشهر تلات ألف خمس تلاف عشر تلاف !حتى أكتر من كده ؟ ماهو مش بياخدهم منك ويطلع يعمل كايت سيرفينج فى راس سدر ما هو هيجيب بيهم أكل وشرب و برده مهما زاد ده بقى رقم عادي والقرشين اللي هتدفعهم دول أكيد مش هيفرقوا معاك بس وارد يفرقوا معاه أو مع اللي بيصرف عليهم..
حد هيقولك طبعاً خلاص يا سيدي إنت كده بتشجع على الإستلاياح وروح إدفعهم لمستشفى ولا لدار ولا لأي حد مريض أو أي حاجة كده هقوله معاك بس أنا ك عمرو ومش بقول أنه أي حد يعمل كده أنا بقيت يومياً بصحى الصبح أفتح أبلكيشن فوري أختار أي جهة تبرعات وأحط أي رقم أتبرع بيه حتى لو عشره ولا عشرين جنيه وثبتها كا شيء أساسي في بداية يومي لحد ماخلاص بقت حاجة مش بنساها الحمد لله خالص وعامة يعني أنا نصحت بيها كام حد حواليا وكلمهم كلموني وقالولي دي سحر والله إحنا عملنا كده وربنا فتحلنا في كذا وكذا ..
وإختتم: مش شرط طبعاً يحصلك زيهم بس وارد جداً ربنا بسببها يمنع عنك حاجة وحشة كانت هتحصل وإنت متعرفش.
الخلاصة وفر شوية من رفاهياتك عشان غيرك يعرف يجيب شوية من أساسيات و شكراً.
يذكر أن يعرض حاليًا لـ عمرو وهبة مسلسل حكايات “جروب الدفعة” على قناة ON E، وشاركه العمل: ميدو عادل، يسمى داوود، ولاء الشريف، أحمد ماجد، شيري عادل، وعدد آخر من الفنانين، وتأليف ورشة مصنع حكايات هاني سرحان.
Views: 0
مساحة إعلانية
مساحة إعلانية