“عودة من جديد” ريهام سعيد تعود للإعلام مرة أخرى بعد اعتزالها

غابت الإعلامية ريهام سعيد، عن جمهورها ومحبينها، لمدة عام الذي قررت فيه الاعتزال، وفوجئ الجمهور من عودة ريهام مرة أخرى على ساحة الإعلام خلال الفترة القادمة.

حيث كتبت ريهام منشورا عبر حسابها الرسمي على “الفيسبوك”: “بعد تفكير عميق وبعد مرور سنة كاملة من قرار الاعتزال أعلن عودتي للإعلام بأذن الله وما توفيقي إلا بالله أرجو الدعاء”.

وفي يوليو عام 2021، أعلنت ريهام سعيد، اعتزال الإعلام كمقدمة برامج والتركيز خلال المرحلة القادمة على أعمالها الفنية كممثلة، وذلك بعدما تعرَّضت لمشكلات كثيرة بسبب برامجها، وصدرت أحكام قضائية عديدة ضدها بعد أن تم إيقاف برنامجها “صبايا الخير” أكثر من مرة.

وأعربت عن إحساسها بالظلم بعد مسيرتها المهنية، حيث قالت عبر حسابها على “الفيسبوك”، “أقسم بالله كل حرف هكتبه صادق ومن قلبي، أنا حاسة إني هموت قريب عشان كده هبعد عن السوشيال ميديا عشان أقعد مع أولادي أكتر وقت ممكن خصوصا ابني الصغير، يمكن سحر يمكن اكتئاب ويمكن حقيقي، غالبا إحساس الظلم كان بيقتلني بالبطئ، في يوم من الأيام الدنيا قامت عليّ عشان تعلب أما المعراج وإنكارها عادي، تامر أمين يغلط في الصعايدة قاصد أو مش قاصد يتوقف 3 شهور لكن أنا أعمل أكبر حملة للسمنة وأعالج آلاف وعمليات ببلاش ويفتروا عليّ ويقولوا إني قلت إن ريحتهم وحشة وأتوقف سنة، كفاية إننا عالجنا أعداد مهولة من الشباب من المخدرات ورحت أماكن خطر جدا عشان أوعي الناس بدل ما أتكرم ألاقي نفسي نايمة في أوضه متر في متر مع تاجرة مخدرات. البرنامج يتوقف، أطفال تموت ومدرسة ذوي الاحتياجات الخاصة اللي فاتحينها تتقفل وتطلع ريهام أفاقة وكدابة”.

وأضافت ريهام سعيد: “لو فضلت أحكي هاحكي كتير بس أنا موجوعة ومش قادرة أحكي أنتو ظالمين بتمشوا بكلمة من غير ماتشوفوا ولا تفهموا. عندي كلام كتير أقوله على كمية مواقف فيها ظلم رهيب، لو مت أنا مش مسامحة، مش مسامحة أي حد قال عليّ كلمة واحدة مش حقيقية أو على السمع، مش مسامحة أي صحفي كتب عني كلمة ظلم، مش مسامحة أي واحد كتب كومنت موت بيها أطفال القلب”.

تابعت: “كفاية إن أي حاجه الإعلام بيتكلم فيها دلوقتي أنا متكلمة فيها من 10 سنين، هانزل قبري مش مسامحة ولا هاسامح، مش مسامحة اللي بتسحرلي كل شوية، مش مسامحة أي حد ساهم في خراب بيتي وضياع مجهود سنين، ومش مسامحة أي حد أنا معرفوش ضدي وبيحاربني وأنا مش عارفة.. المهم إني أجهز للقاء ربنا عوض بالصيام وأصلي كتير وأتصدق وأدعي، ادعولي أنتوا كمان ربنا يغفر لي، ريهام بتجيب مشاكل طب وراحت فين المشاكل لما قعدت في البيت؟ ما هو اللي فيه طبع مابيغيروش والله، عشان اللي كانوا بيعملوا المشاكل اتهدوا لما اعتزلت؟ عشان أنا مش على الشاشة مليش قيمة ومفيش مصلحة أد ايه الناس وحشة”.

وأختتمت: “كلمت ناس كتير يساعدوني أحقق حلمي وأمثل، مش عايزة أقولكوا الرد، وناس ياما وقفت جنبهم. كل دور أعمله المخرج يقول لي إنه هايكسر الدنيا بس هي ماشية بالشطارة؟ أنا عايزة أقولكوا إلى اللقاء يمكن لمًا أخف لو عيانة يمكن لما أتعالج من السحر لو مسحورة يمكن في الجنة بإذن الله لو مت، ما تظلموش حد لأن أنا بعد ما تعبت أوي أوي ظلمتوني أيوه حتى لو ليّ أعداء أنتوا ساعدتوهم، ما توجعوش حد تاني، إحساس الظلم مميت، إحنا كنا البرنامج رقم واحد في المشاهدة في الوطن العربي 10 سنين والسابع على العالم وتعبنا أوي أوي أوي أوي. قدر الله وما شاء فعل، حقي عندك يا رب. في الآخر السيرة أهم من السمعة لأن السمعة دي الحاجات اللي بتسمعها ومشفتهاش وهي مش حقيقة لكن السيرة دي اللي موجودة في كل بيت فيكي يا مصر، دي سيرة معاملتك للناس والحاجات اللي ربنا جعلني سبب إني أعملها وهو ده المهم. بعد ما أموت ماتقولوش دي بتمثل إنها ماتت زي ما كل مرة كنت بعيا فيها الصحفيين كانوا بيطلعوني كدابة حسبي الله ونعم الوكيل”.

Views: 2