![](https://alqaednews.com/wp-content/uploads/2024/06/لقطة-الشاشة-2024-06-08-204501-718x470.png)
حوار: أمينة علي
تألقت الفنانة ياسمين سمير في العديد من الأعمال الفنية، وتُوجت بطلة لأكثر من مسرحية وتقف على خشبة المسرح القومي ويعد من أعرق المسارح المصرية، ثم توالت أعمالها الفنية وحققت نجاحاً باهراً خلال تعاونها مع الفنان أمير عيد في مسلسل “دواعي السفر” المكون من 10 حلقات وهو من تأليف السيناريست محمد ناير.
والتقى موقع “القائد نيوز” بالفنانة ياسمين سمير في حوار خاص لتكشف عن تفاصيل وكواليس مسلسل “دواعي سفر”.
في البداية.. كلمينا عن مسلسل دواعي السفر؟
مسلسل “دواعي السفر” هو حالة تمس فئات كتير وأعمار كتير وبتمس جانب الوحدة، احنا ممكن يبقا حوالينا ناس كتير بس حاسين بالوحدة، المسلسل بيناقش موضوع إحساس الوحدة عند كل واحد باختلاف السن ومن كل الفئات والطبقات.
من الذي رشحك لدور مي؟
اللي رشحني للدور أستاذ رضا العزاوي المخرج المنفذ ولما رشحني لأستاذ محمد ناير المخرج رحب جدًا لأن أنا اشتغلت قبل كدا عمل من كتابته كان “المواطن إكس”، وأنا كنت مبسوطة أوي إني شغاله في مسلسل زي دا.
ما الذي جذبك لشخصية مي؟
دور مي بالنسبة ليا دور واضح وصريح هي بنت بتحب مديرتها في الشغل وبتحب شغلها أوي، من النوع اللي لما بتحب حد بشكل صادق بتخاف عليه جداً بتنصحه بالطرق اللي تقدر عليها لو لقت اللي بتحبه مش واخد الأكشن إنه حياته تبقا أحسن هي بتاخد الأكشن دا من غير ما تقوله بدافع إنها بتحب الشخصية دي.
من وجهة نظرك ما المختلف في شخصية مي عن الشخصيات التي قدمتيها من قبل؟
شخصية مي دوغري، وأغلب الشخصيات اللي قدمتها إما بيبقا فيها طابع كوميدي أو شخصية دافينه بتظهر عكس اللي جواها ودا بيبقا صعب في التمثيل أكتر، لكن شخصية مي بتظهر اللي جواها لكل الناس مبيهمهاش وبتعمل اللي هي عايزاه، والشخصيات دي مبتبقاش متعبة في التمثيل بس بتبقا ليها لذة لإنها بتعمل السهل الممتنع.
لماذا تم التركيز على قضايا الإكتئاب والوحدة؟
التركيز على القضايا دي اعتقد إنها من أعظم الحاجات في المسلسل، لان في الفترة الأخيرة سمعنا عن شباب كتير بتنتحر رغم إن حياتهم كويسة طيب ليه بينتحروا؟ هما ممكن يكونوا جوا أسرتهم ومع صحابهم بس بيبقوا حاسين بالوحدة والإكتئاب وفجأة بنلاقيهم انتحروا فجأة بيسيبونا ويمشوا!، فكان مهم جداً يكون في مسلسل بيناقش الموضوع دا عشان الناس دي تحس إن في ناس حاسة بيهم وهما مش لوحدهم ودي من أعظم المسدجات اللي الدراما ممكن توصلها.
ما الصعوبات التي واجهتك في المسلسل؟
كنا بنصور والدنيا برد جداً واحنا بنصور بلبس خريفي، ودي كانت أصعب حاجة وكنا بنقعد عدد ساعات كتير أوي، بس اللى كان بيهون إننا مبسوطين بالمسلسل واحنا كنا حابين بعض أوي.
ما هو أكثر مشهد أثر فيكي؟
أصعب مشهد اللي كنت بواجه فيه دكتورة هدى، لأن شيفاها بتستسلم وبتضيع حلمنا وبتستلم لجوزها وهترجعله وتعمل اللي هو عايزه وهضيع تعب السنين اللي قعدت تحارب عشانه، دا من أقوى المشاهد بيني وبين نادين.
ما الصفات المشتركة بينك وبين شخصية مي في المسلسل؟
إن أنا دوغري أوي برضه، واللي في قلبي على لساني ومبعرفش أجامل، لما بشوف حد فيه مشكلة ومش هنقدر نتواصل مع بعض مش هبقى موجودة ومش هعرف اتعامل معاه.
هل اتعرضتي للإكتئاب أو الوحدة من قبل؟
مفيش إنسان ممرش بإكتئاب أو وحدة ميبقاش إنسان طبيعي، أوقات كتير نبقا وسط ناس كتير بس حاسين بالوحدة، بنحس إن محدش فهمنا محدش عارف يتواصل معانا بالاحساس، كتير بنحس بالوحدة بس الحمدلله موصلتش لمرحلة إني أبقا عايزة انتحر.
ياسمين كان عندها خوف قبل عرض المسلسل ما رأيك في نجاح التجربة؟
مبيبقاش عندي خوف أوي من عرض حاجة لأن احنا بنبقا عاملين اللي علينا سواء نجح أو فشل دي حاجة بتاعة ربنا، بيبقا عندي خوف لو أنا مقصرة،لكن أنا دايماً ببذل كل مجهود عشان يطلع بأفضل صورة، ياما حاجات مكنش مكتوبلها أي مقومات نجاح وكسرت الدنيا وقلبت السينما وطلعت نجوم ونزلت نجوم.
هل توقعتي هذا النجاح؟
توقعت النجاح لأن كل حاجة موجودة في المسلسل، القضية مهمة جداً الورق حلو الإنتاج هايل التصوير حلو الممثلين أكتر من جامدين، كلنا تعبنا وكل حاجة موجودة في المسلسل.
كيف ستحافظين على استمراريتك ونجاحك في ظل المنافسات الشرسة التي تشهدها الساحة الفنية؟
الاستمرارية من أصعب الحاجات ودي مشكلة جيلي كله، إن احنا ندخل من نجاح لأنجح دي أصعب حاجة بالنسبة للكل بنحاول نعمل كده في ظل الشغل المتاح وكتر الممثلين اللي كتير منهم كويسين.
ما هي أقرب الأعمال إلى قلبك؟
في أعمال كتير زي أول حاجة عملتها “أزمة سكر” كنت صغيرة أوي والناس عرفتني بيه وبحب كل اختياراتي الأخيرة زي “اللوكاندة” مع أستاذ أشرف عبدالباقي ودي سبب شهرتي حالياً، وبحب مسلسل ابن أصول، العيلة دي، وبحب شخصيتي في مسلسل الضاحك الباكي حسيت الناس تقبلت الشخصية أوي بغض النظر عن انتقادات المسلسل.
مساحة إعلانية