أجري الحوار : عمر آدم ، إعداد صحفي : أميرة أحمد
محمد حازم، الشهير ب ” مو حازم ” حدثت له إعاقة في قدمه و لكن كانت بمثابة حافز وداعم له لتغيير مسيرة حياته العملية و الفنية و السير بسرعة الصاروخ في عالم اليوتيوب و السوشيال ميديا.
إتعملت إيه من مشاركتك في كرة القدم لذوي الهمم ؟
اتعلمت إن مفيش حاجه إسمها مستحيل في صعب لكن مش مستحيل، إتعملت إنك تقدر تحقق الصعب اللي في ناس كتير أطلقت عليه مستحيل بالإرادة و العزيمة و الإصرار و التحدي و أنا إتحديت العالم و حققت الصعب و نجحت.
ليه اخترت المحتوى بتاعك على السوشيال ميديا إنه يكون عن جبر الخواطر موخراً ؟
لأن شفت إن في ناس كتير بدأت إنها تتنمر وتستهتر في هزارهم بذوي الإحتياجات الخاصة و دا كان دافع ليا إن أقدم محتوى أفهم فيه الناس إن جبر الخواطر مش مجرد كلمه ده شعور و إحساس يسمى الإنسانية اللي إنعدمت عند ناس كتير منهم الفنانين و المخرجين اللي بيستخدموا عبارات سخرية و تنمر على ذوي الإحتياجات الخاصة فكان لازم أقدم المحتوى دا و أنشر الوعي إن ذوي الإحتياجات الخاصة بشر و بيحسو و من حقهم يعيشوا في سلام و يخرجوا للمجتمع و كان لازم أعمل كدا عشان إحنا مش مصدر للسخرية و التنمر.
شعورك إيه دلوقتي بعد النجاح الكبير الذي حققته في الآونة الأخيرة و وصولك لمليون متابع على التيك توك و اليوتيوب ؟
شعور مقدرش أوصفه بس فرحتك لما بتشوف ناس بتحبك و تتصور معاك و أطفال كتير متابعاك و بيفرحوا لفرحك و بيزعلوا لزعلك دي حاجة كبيرة جداً متتوصفش و دا بيكون حافز ليا إن أستمر و أشتغل أكتر على نفسي و أقدم أحلى حاجة عندي و أنجح أكتر لأن نظرات الأطفال ليك اللي كلها حب بتخليك أسعد الناس.
ليه مركبتش طرف صناعي لحد دلوقتي ؟
ركبت طرف صناعي بعد الحادثة بس كان عندي مشكلة في البتر بسبب دخولي للعمليات في وقت متأخر بعد خمس ساعات من الحادثة فكان لازم يتم البتر في أسرع وقت بسبب نزيف كتير في الدم و الحمد لله على كل حال ف بعد الحادث بأربع شهور ركبت أول طرف و بعد ما ركبت أول طرف صناعي بعدها بشهر كنت رايح للإمتحان و موتوسيكل خبطني و إتكسرت و الحمد لله بعد الشفاء من الكسر ركبت الطرف الصناعي لمدة سنتين و إتكسر ف مبقتش عارف أستخدمه و معملتش طرف صناعي تاني.
إيه اللي ناوي تعمله بعد النجاح العظيم الذي وصلتله ؟
النجاح العظيم دا بفضل ربنا ثم بعد كده بفضل المتابعين اللي بيحبوني و أنا بحبهم جداً و ناوي استمر و أشتغل أكتر عشان أفرحهم و أزود من عدد متابعيني و من حبهم ليا و دي مجرد البداية و أحلامي و طموحاتي أكبر مني كدا بكتير و بيكم هوصل يا أحلى متابعين بحبكم.
تقول إيه لكل اللي مروا بنفس تجربتك بفقدان أحد أجزاء جسمه ؟
أحب اقولهم متخافوش من نظرات المجتمع إنتو أحسن من أي حد و دا حب من ربنا ليكم و إختبار لصبركم مفيش حاجة صعبة ولا مستحيلة خلي عندك ارادة و عزيمة و تحدي ؛ إتحدى الناس إتحدى المجتمع أثبت نفسك و أظهر و متخفش ربنا معانا.
مساحة إعلانية