بسنت النبراوي عن اختبار اللهجة الفلاحي
بسنت النبراوي
الناس عاملين اختبار اللهجة الفلاحي كنوع من أنواع الـfun
الناس كانوا فاكرين إن مافيش كهربا أو حياة مدنية في الشرقية
روبي أتقنت اللهجة الشرقاوية وهي الفنانة الوحيدة اللي اتكلمتها صح
أعرف أسوق حافية زي شخصية نعمة الأفوكاتو في المسلسل
مابحبش أسوق بكعب عامةً بفضل أكون لابسة حاجة فلات
فيه بنات بيحبوا يسوقوا حافيين لأن الكعب بيبقى رخم في السواقة
هوافق على أي حاجة يعرضها عليا عمرو ياسين لأني بحب الشغل معاه
انتشرت خلال الفترة الماضية عدد من الاختبارات للهجات مصرية مختلفة،
ومن بينها اختبار اللهجة الفلاحي الذي حقق رواجًا واسعًا بين رواد السوشيال ميديا،
بعدما لاقى تفاعلًا وإقبالًا من قِبَل الكثيرين على إجرائه.
وكانت الفنانة بسنت النبراوي قد قدمت عددًا من الفيديوهات باللهجة الشرقاوية التي تعد من اللهجات الفلاحي المميزة،
والتي حققت من خلالها بسنت نجاحًا كبيرًا ولاقت ردود أفعال إيجابيةً عليها من جانب رواد السوشيال ميديا.
وقد تواصل موقع القائد نيوز مع الفنانة بسنت النبراوي،
والتي كشفت في حوارها معنا عن رأيها في اختبار اللهجة الفلاحي وسر تميزها الشديد في اللهجة الشرقاوية،
فإلى نص الحوار…
ما رأيكِ باختبار اللهجة الفلاحي خاصةً وأنكِ قدمتِ فيديوهات متميزةً باللهجة الشرقاوية عبر السوشيال ميديا؟
هي الناس عاملينه كنوع من أنواع الـfun، وفيه ناس عاملاه برضو علشان يشوفوا أنت عارف لكنات تانية مختلفة،
ما هي اللكنة الفلاحي برضو لكنة من لكنات مصر زي لكنة الصعيد وبورسعيد وإسكندرية،
وفيه ناس عاملاه عشان يمكن يعرّفوا الناس باللكنات المختلفة اللي عندنا.
وهل قمتِ بتجربة إجراء الاختبار؟
شفته شفته، بس أنا عارفة كل الإجابات، مش محتاجة إني أعمله.
وهل لديكِ أصول شرقاوية جعلتكِ تتميزين في اللهجة الخاصة بهم؟
أنا عشت واتربيت في الشرقية طبعًا.
إذًا فكونكِ عشتِ هناك جعلكِ تستوعبين اللهجة جيدًا “شارباها” مثلما يقولون.. أليس كذلك؟
آه، بس مش كلنا كده، إحنا في الزقازيق بنتكلم عادي زي لكنتي معاك دلوقتي،
لكن فيه قرى بتتكلم عندنا بلكنات مختلفة،
وأنا علشان احتكيت بناس منهم استوعبت اللكنة،
لأن كان فيه ناس منهم بتساعد جدي في المزرعة في الأرض.
وكمان جدي كان تاجر أخشاب فكان فيه ناس بيشتغلوا معاه في التجارة بتاعته كانوا كده،
والناس اللي كانت بتساعد جدتي وماما وخالاتي في البيت احتكيت بناس منهم كتير.
وهل من الممكن أن تقدمي أعمالًا باللهجة الشرقاوية وقدمتِ بالفعل أعمالًا من قبل بها؟
ماعملتهاش، بس احتاجوني في إني أقولهم على طريقة اللكنة، تصحيح اللكنة.
وهل يمكن أن تخبرينا ما هو ذلك العمل؟
كان في الآنسة فرح، طلبوا مني أقولهم على طريقة كام جملة كده علشان يستخدموها.
فيديوهاتك باللهجة كانت تريند وكان يظهر منها أنكِ كنتِ تحبين ما تقدمينه.. حدثيني عن ذلك.
أنا كنت بعمله بمنتهى التلقائية، حتى الموضوع جه بالصدفة
إني لما حبيت أعمل الفيديو بتاع الشرقية ده أنا عملته، علشان الناس كانوا فاكرين إن الشرقية دي حاجة مافيش كهربا،
والله فيه ناس متخيلة كده بجد إن مافيش حياة مدنية هناك.
وكانوا دايمًا كل ما يشوفوني يقولولي “آه أنتم عندكم بتقولوا الفرخة مش إلها وراك”،
قلتلهم “آه”، وقلتلهم “فإحنا إيه السبب أو الداعي إننا كل ما هنشوف حد هنقوله الفرخة مش إلها وراك؟”،
فمن هنا جت فكرة الفيديو، فالناس حبوا اللكنة جدًا وحبوني وبقوا يطلبوا مني أتكلم بالطريقة دي كتير.
وهل شاهدتِ دور رضا الذي قدمته الفنانة روبي في سجن النسا وكانت تتحدث خلاله بهذه اللهجة؟
أيوه، بصراحة أتقنت اللكنة، اللكنة دي لكنة كفر صقر بيتكلموا بيها، أتقنتها جدًا جدًا بصراحة.
يبدو أنكِ كنتِ سعيدةً وأنتِ تشاهدين الدور وشعرتِ أن هناك أحد أعطى الشرقية حقها.. أليس كذلك؟
جدًا واتكلم في الموضوع بمصداقية، يعني هي الفنانة الوحيدة بصراحة بصراحة اللي شفتها بتتكلم شرقاوي صح، عجبني الدور أوي.
شاركتِ في رمضان الماضي بمسلسل نعمة الأفوكاتو.. فهل تستطيعين قيادة السيارة حافية القدمين مثلما كانت تفعل نعمة في المسلسل؟
آه، أعرف أسوق حافية عادي جدًا، أنا عامةً مابحبش أسوق بكعب بسوق بحاجة فلات.
كثير من الفتيات يقدن سيارتهن حفاة.. فما رأيكِ في أن الأمر أصبح ملحوظًا بعد نعمة الأفوكاتو؟
هي مش فكرة ملحوظة، قصة إن فيه بنات بتعمل الموضوع ده من زمان،
هما بيحبوا يسوقوا حافيين علشان الموضوع بيبقى أسهل ليهم، بيعرفوا بيتحركوا شوية.
إحنا كبنات مش بنعرف نسوق بالكعب أوي بيبقى رخم في السواقة بصراحة،
فأسهل إن البنات تسوق بحاجة فلات، أو لو اضطرت خلاص بتقلع الكعب وبتسوق حافية.
وألا تفتقدين العمل مع الكاتب عمرو ياسين خاصةً أنهما قدمتما أعمالًا جميلةً معًا؟
جدًا جدًا جدًا جدًا، إحنا عملنا اللي مالوش كبير سوا والنضارة البيضا هو اللي كان كاتبه.
يشارك الكاتب عمرو ياسين في رمضان القادم بمسلسل مع الفنانة ياسمين عبد العزيز وقد قدمتم عملًا مميزًا للغاية من خلال مسلسل اللي مالوش كبير.. فألم ترشيحكِ لذلك العمل؟
لأ بصراحة لأ، يعني حتى لسه ماحدش كلمني في حاجة.
لكن هل سمعتِ شيئًا أو تم ترشيحكِ حتى ولو كان من بعيد للمسلسل؟
لأ لحد دلوقتي لأ.
لم تتعاونا أنتِ والكاتب عمرو ياسين في أعمال منذ النظارة البيضاء الذي تعاونتما فيه قبل ثلاث سنوات.. أليس كذلك؟
نعم، بس أكيد أي حاجة هيعرضها عليا أستاذ عمرو هوافق عليها،
لأني بصراحة من الناس اللي بتحب الشغل معاه جدًا، كقصص ككل حاجة هو جبار بصراحة.
مساحة إعلانية