حوار: ياسر خالد
تمتلك الفنانة رانيا منصور موهبةً حقيقةً، إلى جانب قدرتها على تقديم أنواع عديدة من الشخصيات سواء الطيبة أو الشريرة، الكوميدية أو التراجيدية، وأيضًا على الانتقال بين مختلف الشخصيات بسلاسة وسهولة.
ومؤخرًا شاركت رانيا منصور في مسلسل “الوصفة السحرية” الذي قدمت من خلاله شخصية هالة الشناوي وحقق نجاحًا كبيرًا عند عرضه وردود أفعال إيجابيةً من جانب الجمهور.
وقد تواصل موقع “القائد نيوز” مع الفنانة رانيا منصور وكان لنا معها هذا الحوار الممتع والشيق حول دورها في “الوصفة السحرية”، فإلى نص الحوار…
هالة كانت شخصيةً لذيذةً.. حدثيني عن ذلك.
هي الشخصية لذيذة فعلًا دمها خفيف، عايزة تعمل فلوس، فمن وجهة نظرها إنها تتجوز واحد غني تعمل من وراه فلوس، وبعدين اتعرفت على الستات دول فابتدت يبقى فيه حياة لذيذة ما بينهم.
وبعدين انتحلت شخصية إنها مؤلفة كتابة وبتقولهم وصفات يتعاملوا بيها مع العلاقات بتاعتهم في الجواز، فشخصية لذيذة دمها خفيف.
لم تكن هالة شريرةً ولا طيبةً بل كانت خليطًا من كل الصفات.. كيف ترين ذلك؟
لأ مش شريرة ولا طيبة، شخصية لذيذة شخصية عادية طبيعية بتصيب وبتخطئ وليها تفكيرها.
لكي تقدمي شخصيةً.. هل يجب أن تجدي شيئًا تحبين من خلاله الشخصية تبررين لها من خلاله تصرفاتها؟
أكيد طبعًا لازم أحب الشخصية، أول ما بقرأ دور بحس إذا كنت أقدر أؤديه ولا لأ مش حاباه مش حلو مش هعرف أعمل فيه حاجة، ده اللي بيجذبني أكتر للدور لما بقرأه.
وما أكثر مبرر أوجدتِه لشخصية هالة؟
إنها شخصية حقيقية عارفة هي عايزة إيه، هي عايزة تعمل فلوس ومعتقدة إنها علشان تعمل فلوس لازم تتجوز راجل غني، فهي عارفة هي عايزة إيه، شخصية واضحة وصريحة مع نفسها.
وافقتِ على الدور رغم أنه ضيفة شرف وكان من الممكن ألا توافقي عليه، وتقولين أحب أن أقدم دورًا يكون ظاهرًا طوال الـ45 حلقةً.. فكيف فكرتِ في هذا الدور؟
أنا كلموني وهما كانوا بالفعل بدأوا تصوير المسلسل وصوروا حلقات، وهي الشخصية أصلًا بتظهر من الحلقة 15، فلما قرب تصوير المشاهد اللي بتظهر فيها الشخصية، فهما ابتدوا يفكروا مين هتعمل الدور.
هما دخلوا التصوير معتمدين على إنهم أول 15 حلقة الشخصية مش موجودة فيها، فكان عندهم مشاهد كتيرة تتصور.
وبعدين لما قربت اللوكيشن اللي الشخصية هتبقى موجودة فيه، فكلموني وقالولي الدور كذا كذا، فسأله مين الكاست؟ مين شركة الإنتاج؟، فحبيت تركيبة المسلسل وأحداثها وإن كلها ستات.
تركيبة المسلسل بالنسبالي كانت دمها خفيف ولذيذة، فقلت آه ليه لأ إني أكون موجودة في الدور، وحسيت إن المسلسل هينجح من تركيبة الستات دي.
وهو عادةً كمان أكتر ناس بيتفرجوا على المسلسلات الستات أكتر وربات البيوت، بيحبوا الحاجات اللي فيها دراما بتتكلم عن العلاقات وبتتكلم عن تفاصيل الستات، فهو ده اللي شجعني إني أعمل المسلسل وحسيت إن الشخصية دمها خفيف.
هل شعرتِ أن المسلسل عوضكِ عن غيابكِ عن رمضان الماضي؟
ممكن، إحنا أصلًا كنا بندور قبل رمضان كمان، فممكن آه، يعني خلاص أنا كنت بصور وبعدين خلصت تصوير وكان سيزون رمضان وكان صعب جدًا إني أدخل تصوير في رمضان لأن الوقت ضيق أوي، وبعدين المسلسل اتعرض بعد رمضان فكان تمام حسيت إنه تمام.
قدمتِ فيديو كليب مع الفنان تامر حسني حقق نجاحًا كبيرًا وكان في غاية الرومانسية وبه مشاعر وأحاسيس لطيفة جدًا.. حدثيني عن هذا الكليب.
أنا قابلت تامر قبل كده وقلتله إني نفسي أشتغل معاه وإني طبعًا بحبه جدًا، فهو كان عامل الأغنية الحلوة دي وكان بيفكر إنه هو محتاج يصورها ويبقى فيها دراما، فلقيته بيكلمني وقالي تحبي نصور الأغنية دي مع بعض.
فطبعًا اتبسطت جدًا جدًا إنه اهتم، عادةً لما بتقابل حد مثلًا وتقوله نفسي أشتغل معاك ممكن يفتكر وممكن لأ، بس إنه فضى حاطط الموضوع في دماغه وأول ما ظهرت الأغنية، لقيته بيكلمني وبيقولي تعالي نصورها مع بعض، فكانت لذيذة منه.
وطبعًا أنا اتبسطت جدًا لما سمعت الأغنية، لقيتها حلوة ويطلع منها دراما لذيذة وحزينة، فطبعًا اتشجعت جدًا، وتامر أي حد يحب يشتغل معاه طبعًا، هو ميجا ستار فطبيعي إني أحب أشتغل معاه أكيد.
توانا ابنتكِ شاركت في مسلسل “كامل العدد +1” في رمضان الماضي.. أود أن أسألكِ “أنتي إزاي مامي؟ فأنتِ صغيرة على أن تكون أم؟
أجابت ضاحكةً: اتجوزت صغيرة.
كان هناك ناس كثيرون لا يصدقون أنكِ بالفعل والدة توانا وتفاجأوا أن لديكِ ابنة teenager.. حدثيني عن ذلك.
اللي حصل إني اتجوزت صغيرة وخلفت توانا، ودي حاجة حلوة أكيد بحمد ربنا عليها، وعايزة أقولك إن فيه ستات كتيرة جدًا بشوفهم في النادي بشوفهم في كل حتة شكلهم صغير جدًا وعندهم ولاد في سن توانا، فمش عارفة مش حاسة إنها حاجة غريبة، بشوف ستات في سني كتير وعندهم ولاد.
هل بالفعل هناك وصفة سحرية للزواج الناجح؟
لأ مافيش طبعًا وصفة سحرية تناسب كل الناس، أكيد اللي يناسبك مايناسبنيش، أهم حاجة إن الاتنين اللي قرروا إنهم يتجوزوا يبقوا متفاهمين على الوصفة الخاصة بيهم هما الاتنين.
لكن مافيش وصفة تمشي على كل الناس لأن مش كل حد زي التاني، أنت ممكن اللي يناسبك مايناسبنيش واللي يناسبني مايناسبكش.
فأهم حاجة الاتفاق يبقوا الاتنين متفقين على حاجات معينة، وأكيد طبعًا بيبقى فيه اختلافات، يعني ممكن يتفقوا وبعدين يرجعوا يختلفوا ده طبيعي بين الناس.
حتى أنا بختلف ساعات مع أختي بختلف ساعات مع بنتي اللي هما أقرب الناس ليا ده طبيعي طبعًا، بس لما بيكون فيه قاعدة الاتنين متفقين على حاجات معينة بيبقى أسهل الموضوع بكتير.
مساحة إعلانية