حوار: ياسر خالد
طرحت المطربة الشابة حنين الشاطر مؤخرًا أغنيتها دندنة، والتي تعد أولى أعمالها الغنائية بعد فوزها بلقب برنامج اكتشاف المواهب إكس فاكتور لعام 2023.
وقد تواصل موقع القائد نيوز مع المطربة حنين الشاطر، التي كشفت لنا عن تفاصيل أغنيتها الأولى وكذلك عن تجربتها في إكس فاكتور، فإلى نص الحوار…
حدثيني عن شعورك بأول أغنية لكِ؟
مبسوطة جدًا إني بدأت أحقق حلمي في أغانيا، لأني من زمان جدًا كنت بتمنى يكون ليا أغانيا الخاصة، الناس تسمعها، تعمل عليها فيديوهات، تغنيها، يكونوا حافظينها كمان لأنه الأغنية باسمي أنا وتبقى أنا، فالحمد لله.
الأغنية هادئة ورقيقة جدًا.. حدثيني عن ذلك.
ولسه في أغاني كمان هتبقى رقيقة وهيبقى فيها إحساس جدًا، وأتمنى إحساسي يوصل للجمهور العظيم طبعًا.
وعاملة كل أنواع الأغاني وكل الأذواق كرومانسي، كدراما، كحاجة فرفوشة أوي، كحاجة صادمة برضو عشان أرضي جميع الأذواق.
نجاحكِ في إكس فاكتور.. هل أشعركِ بمسئولية وضغط عليكِ؟
طبعًا مسئولية بس الحماس كان بياخدني أكتر من إني أحس إني شايلة مسئولية، فطبيعي إنه كان مسئولية وضغط كبير جدًا، بس علشان أنا نفسي أوصل لهدف معين فبنسى كل ده، فكان خطوة كبيرة وعظيمة جدًا.
وما أكثر تعليق جاءكِ من لجنة التحكيم خلال البرنامج ومازلتِ تذكرينه حتى الآن؟
فيه تعليقات الصراحة الفنان راغب علامة والفنانة أنغام والفنان عبد الله الرويشد دايمًا دايمًا ماقصروش معايا في دعمهم ليا أو كلامهم أو تشجيعهم.
فالصراحة كل التعليقات بتاعتهم كانت حلوة جدًا، وأول ما الفنان راغب علامة إداني الكارت طبعًا دي حاجة جميلة أوي.
وما هي الأغاني التي تحبين أن تدندنينها؟
أنا بحب ماجدة الرومي، فيروز، أم كلثوم، وردة كل دول بحبهم جدًا.
كلهم من زمن الفن الجميل.. فألا تدندنين لأحد من الأجيال الحالية؟
لأ طبعًا، بحب شيرين، أصالة، تامر حسني، تامر عاشور، بهاء سلطان، كارمن سليمان والفنانة أنغام وغيرهم، ففيه كتير جدًا ما شاء الله وحلوين حلوين في الأجيال الحالية.
هل تفكرين في غناء المهرجانات أم ليس الآن؟
هي المهرجانات أنا عمري ما أغانيها، بس ده ستايل غنا ليه ناسه وده تحريف الأغنية المصرية، فكل أغنية وكل لون ليه ناسه، فدي مش أنا.
أليس هناك أغنية مهرجانات علقت بذهنك وظللتِ تدندينها؟
لأ الصراحة مش عارفة، كان فيه واحدة طالعة تريند اللي هي قماصة بصباصة، وأضافت ضاحكةً: بس مش عارفة هي مهرجان ولا إيه؟.
وما هو أصعب شيء في الغناء اختيارات الكلمات المناسبة أم اللحن المناسب أم شيء آخر؟
أصعب حاجة، مثلًا لو أنا حافظة أغنية لازم أغانيها بإحساس علشان أوصل إحساسي للناس، طبعًا ماحرفش أو أغير في اللحن، بس أحط إحساسي، أحط البصمة بتاعتي إن دي حنين.
وبالنسبة للتمثيل.. هل تفكرين في دخول مجال التمثيل أم أن هذه الخطوة ليست الآن؟
لأ طبعًا هتبقى خطوة جميلة جدًا، ولو متاحة وفيه فرصة قدامي مش هقول لأ طبعًا.
لماذا أحيانًا من ينجحون ويحدثون ضجةً في برامج اكتشاف المواهب، بالطبع ليس كلهم، يأتون بعد فترة ويختفون؟
مش عارفة الصراحة، بس المفروض مثلًا أنا دخلت برنامج أطلع منه ماختفيش، مانمش على نفسي، بالعكس أقعد أجري، أصل ده حلم وده هدف وإنجاز عظيم لازم أوصله.
فلازم أجري ورا هدفي ده، ولازم أحاول ماختفيش على أد ما أقدر أحاول إني أقعد أجري وأعمل أغاني، وأدخل في أي مجال بتاعي وأحاول أظهر نفسي فيه.
أتفضلين الأغاني السينجل أم أنكِ من الممكن أن تطرحي ألبومات؟
ممكن طبعًا أطرح ألبومات، بس أنا بحب الصراحة الأغاني السينجل، بس دي ليها ميزة ودي ليها ميزة، بس نفسي برضو إني أعمل ألبومات.
وماذا تودين أن تقولي للجمهور بعد أول أغنية لكِ دندنة؟
أشكرهم طبعًا وأتمنى طبعًا الأغاني كلها بتاعتي، أول أغنية أو اللي هينزلوا بإذن الله، ينالوا إعجابهم ويحبوهم.
ويعرفوا إن كل أغنية هنزلها دي لونها ويحسوا كل أغنية وكل لون، وأتمنى يحفظوهم علشان إن شاء الله أعمل حفلات ليا وأغني الأغاني.
وأحب أقول لجماهيري طبعًا بإذن الله كل أسبوع هنزلهم أغنية مختلفة.
مساحة إعلانية