عمر كمال عبد الواحد: “فضلت الانضمام للأهلي لأن حلم حياتي العودة إليه”

كتب : أحمد عطاالله

ظهر عمر كمال عبد الواحد لاعب الفريق الأول لكرة القدم بالنادي الأهلي، على قناة الأهلي، في ضيافة أسامة حسني.

وأكد خلال حديثه في هذه الحلقة إنه كان يفضل العودة للنادي الأهلي لأنه حلم حياته، وهو أحد أبنائه ولعب لفريق الأهلي في الناشئين.

وقال: “أول حد كلمني بعد الانتقال للنادي الأهلي كانت من أسرتي، وكهربا أول من استقبلني عند دخولي التتش، وحسيت إني واحد منهم مش غريب أو جديد على الفريق”.

وأضاف: “أول كلمة كولر قالهالي كتعبير عن سعادته بإكمال الصفقة، واتكلم معايا وقالي إني لازم أكون قد الضغوط اللي هواجهها مع الفريق، لأن الأهلي لايعرف سوى النجاح، ولازم أكون على قدر من المسئولية، وأكدلي إنه كان مصّر على انضمامي للفريق من سنتين”.

وأكمل: “لقب الجوكر تقيل عليا، أنا بحب أحمد فتحي جداً، وحمل كبير أحمل لقب الجوكر بعد لاعب كبير زي أحمد فتحي”.

واستطرد: “دايماً كنت بشوف الجمهور على الشاشات، لكن لما شوفت جمهور الأهلي في ماتش الترجي، اتأكدت إن الجمهور هو اللاعب رقم 12، وأي فريق هيواجه الأهلي هيخاف”.

وأضاف: “بدأ اسمي يلمع في الكرة المصرية، بعد هدفي في شباك النادي الأهلي في بطولة كأس مصر، عندما كنت لاعباً للأسيوطي، الهدف دا كان وش الخير عليا”.

وأتم: “‏الناس خالقة مشاكل بيني وبين كابتن حسام حسن، لو أنا مش بحبه مكنتش روحت للمصري معاه، وأنا في الشرطة هو أول واحد لاعبني باك رايت، وهو زعل مني لما لعبت وحش في أول ماتش، واستبعدني فترة وروحت إعارة الأسيوطي ورجعت، واجتمع بيا وحطني على قائمة انتظار، فترة واتدربت لوحدي، وبعدين شافني بتدرب، وقالي إنت عايز ايه قولتله أنا عايز ألعب معاك، ومكنش في مشاكل، وقالي مش عايزك تضايق، أنا بحترمه جداً وتحت أمره في أي وقت.”