حلت الفنانة منة عرفة ضيفة على برنامج “free time” والذي تقدمه الإعلامية يارا أحمد والإعلامية نسمهار الصغير والذي يعرض كل جمعة من كل أسبوع على شاشة قناة هي.
وكشفت منة عرفة عن رأيها في المساكنة، وقالت: المساكنة ارفضها وحرام دينيًا ولكن مفيدة اجتماعيًا لإن الناس بتقدر تعرف بعض كويس أوي من خلال المساكنة في ناس بتفضل تحب بعض بالسنين ومع أول سنة جواز بيطلقوا بسبب إنهم ماعرفوش طباع بعض.
وتابعت: وأكتر حاجة بتخليكي تعرفي الناس هي السفر لما تسافري مع حد هتقدري تعرفي طباعه واخلاقه في حاجات لازم الشخص يعيش معاكي علشان يعرفه وأنا بفضل إن فترة الخطوبة تطول ونقعد مع بعض طول اليوم في البيت ونحقق المساكنة بطريقة شرعية.
كما تحدثت عن برامج المقالب التي يقدمها رامز جلال وعن حبها له، قائلة: بحب رامز جلال أوي وبحب أطلع معاه في المقالب ومكنتش أعرف بالمقلب وبعدها ضربته جامد ولكن صالحني وضحك عليا وخلاص عادي.
كما عبرت منة عرفة عن حبها للفنانة مايان السيد وردت على المقارنة بينهما، وقالت: أنا بحب مايان السيد أوي وهي شاطرة وموهوبة وعنيدة ومثابرة وبقينا أصحاب بعد المسلسل ومابشغلش بالي بالمقارنة بيني وبينها لأن كل واحد دوره بيكون متفصل عليه وكلنا بنساعد وبنكمل بعض في العمل.
وأوضحت: أنا مكنتش أعرف مايان قبل مسلسل الا أنا وأنا إبتديت أشتغل معاها كان نفس الحب اللي مابين شخصيات المسلسل مروة وخديجة كان حاصل بيني وبين مايان ولو مكنش حقيقي موجود مش هيظهر للناس على الشاشة.
كما تحدثت عن تعاونها مع الفنانة سهير رمزي في مسلسل “أم البنات”، وقالت: أنا بعشق الفنانة سهير رمزي وتعتبر أيقونة للتمثيل والجمال وقمر ومتواضعه وحضنها أمهاتي أوي وهي كمان بتحبني موت.
واستكملت: وأكتر موقف ماقدرش أنساه كان عندي مشكلة وقت تصوير “أم البنات” وقعدت تتكلم معايا كأنها ماما وماسكة إيدي وساعدتني ونصحتني وأنا محظوظة إني اشتغلت معاها وطلعت بنتها.
وأعربت منة عرفة عن استياءها من الإشاعات خاصة وفاتها وزواجها، وقالت: أن أنا موت دي أكتر إشاعة زعلتني لأن أهلي وأصحابي بيقلقوا عليا وبيتخضوا.
وأضافت: إشاعة إني أتجوزت كمان ضايقتني لإن أكيد لو أتجوزت هعلن ده لجمهوري وآخر صورة نزلتها والناس افتكرتها إني في ديت كنت مع ماما ومفيش حب في حياتي الفترة دي.
برنامج “free time” تقدمه الاعلامية نسمهار الصغير والاعلامية يارا أحمد على شاشة قناة هي يوم الجمعة في الساعة الخامسة مساءً وتستضيف من خلاله عددًا من نجوم الفن وتناقش أهم القضايا المطروحة بين الجمهور.
مساحة إعلانية