حوار/ بسملة محمد
جذب الفنان المصري عصام السقا، الأضواء حوله، واستطاع أن يظهر موهبته بقوة التي أبهرت الجمهور وأشادوا بها، وذلك من أدواره الثقيلة الذي ظهر بها في الدراما الرمضانية لعام 2023.
حيث شارك عصام في أكثر من عمل درامي خلال رمضان، حقق من خلالهم نجاحاً جماهيرياً، وهم مسلسلي “جعفر العمدة و المداح أسطورة العشق”، كما شارك في تجربة الدوبلاج لكرتون “يحيى وكنوز”.
لذالك حرص موقع “القائد نيوز” أن يجري حوار خاص مع الفنان المتألق عصام السقا، والتي جاء كالآتي:
«عصام السقا: “نعيم و وداد لهم مصلحة من خطف إبن جعفر”»
* رأينا في جعفر العمدة أن “نعيم” طيب بشكل زايد عن اللزوم، هل عصام قابل مثال حي لهذا الشخصية ؟
طبعا قابلت هي اصلا بلدنا والدنيا كلها عموماً ماشيه بكرم ربنا للناس الطيبة دي الناس اللي بتعمل كل حاجه بصدق سواء بتحب أو بتشتغل الناس الطيبة دي نادرين في الزمن دا، لذلك بقا الصفات دي من دهب لما تلاقيها أتوفرت فحد.
* هل توقعات الجمهور بأن أولاد فتوح لهم علاقة بخطف ابن جعفر وهو صغير منطقية من وجهة نظر عصام؟
اه طبعا لأن افتراض سوء النية بيكون هو الدافع الاول سواء نعيم أو وداد ف الاتنين لهم مصلحه لأن لو هنحسبها بالشر يعني فلا جعفر مخلف ولا سيد بيخلف ودا اللي ممكن يخليهم يعملو كدا ولكن نعيم من طينة ووداد من طينة تانية.
* من الممكن أن نقول أن جعفر العمدة أضاف لعصام السقا أي في حياته الفنية؟
أضافلي كتير طبعاً خبرات ومذاكرة وجهد وحاجات كتير اتعلمتها وفهمتها وحسيت بيها، قد إيه بحر الفن دا واسع ملوش اخر وكمان هو نقله مهمه جدا بالنسبالي وحصلت فالوقت المناسب الحمدلله بفضل ربنا يعني وكرمه.
* بعد العمل مع محمد رمضان ما ردك على الانتقادات الموجهة له مثل أنه اتشهر بفلوسه ومش بيعرف يمثل ومتكبر؟
طبعا الإشاعات دي هتفضل موجوده طول الوقت يعني الصراحه، ومحمد كل اللي بيقولوا عنه كدا عارفين ومتأكدين أنه مش كدا خالص وأنه إنسان محترم وجدع وانسان جداً وبيحب صحابه وعمره ما اتكبر على حد ولكن هما بينالوا منه في غيابه ومهم، وهو اتشهر بموهبته و كلنا عارفين وبدأها من الصفر.
«عصام السقا: “القرآن هو اللي طمني وحماني في مشاهد المداح 3″»
* هل شعرت بالقلق أثناء تصوير مشاهدك في المداح 3 خاصة أنه مليئ بالرعب؟
طبعاً بس لوكيشن المداح كان جميل وحميمي وكان فيه روح حلوه جدا جدا، ولكن المسلسلات أو الافلام عموماً الرعب بتكون فيها مفارقات ومواقف كتير طبعاً، و ساعات كنت بحس بالقلق ساعات بس مجرد قراءة القرآن وبقول الورد بتاعي والأذكار كل يوم خلاص كدا ميكونش في أي قلق أو حاجه الحمدلله.
* ما ردك على كلام الجمهور بشأن المداح وأننا منتفرجش عليه عشان ممكن الكلام اللي فيه تحضر ارواح في بيوتنا لانه له علاقة بالجن والشعوذة؟
لا طبعا مفيش الكلام دا ولا له أساس خالص من الصحه ولا شعوذه ولا غيره كل اللي فالمسلسل حق ومذكور فالقرآن، إنما كان في حدود طبعا فالمشاهد لا يمكن نعديها واكيد الرقابة عمرها ماتسمح بأن يكون في حاجه فالمسلسل تأذي المشاهدين أو القائمين بالعمل.
«عصام السقا يتحدث عن تجربته في الدوبلاج كرتون يحيى وكنوز»
* عصام أشترك في كرتون يحيى وكنوز فماذا عن تجربته في الدوبلاج هل استمتع بها اكتر من التمثيل؟
الدوبلاج تجربة متقلش متعة وموهبة عن التمثيل .. مجال الصوتيات بحر تاني بفنونه ومجالاته وأقسامه وبجد كانت تجربة جميلة جداً اتعلمت فيها حاجات كتير اوي واتمنى انها تتكرر مرة تانية لأن القاعدة قدام المايك بصراحه لها متعة لا تقاوم.
«عصام السقا: “دوري في الإختيار 1 كان وش الخير عليا”»
* أي الدور اللي بتعتبره إنطلاقتك الفنية؟
كل ادواري بحسها فيها حاجه جميلة عن التانية وفيها نقطة تحول عن التانية بس كدور بحسه وش خير وقريب ليا بيكون “دور الشهيد هرم دراع المنسي اليمين في الإختيار 1″، لأنه حاجه متتوصفش وأنا قاعد مع اهله وناسه وبيورولي هدومه وازاي بطل زي دا سايب اثر جميل وبحسه مرحلة مهمة أوي فحياتي الفنيه غير باقي الأعمال طبعا اللي كلها واخده جزء من قلبي وبحس أن كل واحد فيهم نقطه تحول لوحده.
Visits: 37
مساحة إعلانية
مساحة إعلانية