الفنانة بثينة رشوان بنت الفنان مصطفى رشوان أستاذة السينما المصرية التي قدمت مسيرة فنية حافلة ما بين الدراما التليفزيونية والسينما والمسرح، فمن الأعمال التلفزيونية هوانم جاردن سيتي وعظمة يا ست ومن الأعمال المسرحية بهلول في إسطنبول وزقاق المدق لقبت الفنانة الجميلة بثينة رشوان بملكة الدراما التليفزيونية تم إكتشافها من قبل الأستاذ رضوان الكاشف، وبدأت عالم الفن والتمثيل من خلال الإعلانات ثم قامت بالمشاركة في عدة أعمال فنية.
الفنانة بثينة رشوان في ضيافة القائد نيوز
وجاء نص الحوار كالتالي:
–كيف تم ترشيحك في دور مسرحية زقاق المدق؟
في البداية دخلت مكان الفنانة نهال عنبر لأن المسرحية تم عرضها في الإسكندرية في الموسم الأول للعرض بعد كده كلمني مخرج العمل المسرحي دكتور عادل عبده وهو أخ وزميل وسبب موافقتي على العمل هو دكتور عادل عبده لأنه مخرج كبير بيحب شغله وبيكون شغل ممتاز جدا فلما كلمني وافقت.
-رد فعل الجمهور من دورك بكونك أم في العمل؟
دوري تغير شوية عشان يبقى مظبوط ومعقول للجمهور وهو من كوني أم حميدة إلى صديقة حميدة عشان عامل السن قريب بينا جدا كمان عملت روح حلوة للدور اللي هي الدلوعة بنت البلد الجدعة.
–ما هي استعدادات حضرتك لتقمص الشخصية بشكل كويس؟
أخدت خمس أيام فقط عشان أذاكر الشخصية بس أنا بحب المسرح بحسه أنه بيتي لأن لما بقف على خشبة المسرح بحس إن في عالم تاني خالص.
–أول أعمال حضرتك الفنية في المسرح؟
القطاع العام للمسرح كانت مسرحية أهل الهوى ومسرحية يا إحنا يا هما وكمان الرقص على القمر أما عن القطاع الخاص كان بهلول في إسطنبول.
-هل هناك فرق في تقديم الأعمال الفنية على خشبة المسرح أو السينما أو الدراما التليفزيونية؟
طبعا في فرق كبير، على خشبة المسرح منك للجمهور النجاح وقتي ورد فعل الجمهور بيكون في الحال فكل حاجة بتختلف، السينما ليها شكل الدراما التليفزيونية وليها شكل، المسرح ليه شكل خاص به لأن منك للجمهور ادائك أعلى إحساسك أفضل مفيش بقى توقف أو تسجيل أو تقطيع الممثل بيكون عنده حضور ذهني قوي ومركز لأن في ممثل ميعرفش يستلم منك كيو بمعنى لازم يستلم قافلة الجملة عشان لو جملة تغيرت يحصل دروب والدنيا تقع بعد كده.
–سر إختفاء حضرتك أو قلة الأعمال الفنية لحضرتك سببها إيه؟
ده بسبب إن المجال أختلف يعني تحسي إنك إنتي بقيتي غريبة شوية كمان سوق العمل أصبح متاح لكل الناس سواء كان بيفهم وعنده الموهبة الفنية أو لا وكمان شويه تأثير من السوشيال ميديا كمان تفكير المخرجين الشباب بقى مختلف عنا ومفيش تجانس بينا وبين الشباب اللي على الساحة الفنية بشكل كبير، وكمان المجاملات الفنية بقت على حساب الفن والفنانين الموهوبين عكس الفن زمان تقدر تعمل الدور بشكل كويس ومناسب هتعمله غير كده لا.
–الإشاعات جزء من الفنان هل إشاعة كونك بنت الفنان رشوان توفيق كانت بتضايقك وليست بنت الفنان مصطفى رشوان الملقب بأمير السينما المصرية؟
طبعا مكنتش بتضايقني لأن الفنان رشوان توفيق أبونا كلنا لإنه تعلمت منه زي ما تعلمت من والدي الله يرحمه ممكن يضايقني لو أثر عليا بحاجه سلبية.
–عمل فني كان ناقله في حياتك وكان محطه مهمه؟
لا والله كل أعمالي كويسة ومبسوطة منها زي هوانم جاردن سيتي وعظمة يا ست، أولاد السيدة، السيرة الهلالية، آدم و جميلة، والإمام الغزالي، حمزة وبناته الخمسة.
–فنانة مصرية حضرتك تقدم لها الحب والاحترام؟
بحب جدا الفنانة نبيلة عبيد بحب أدائها وروحها وإحساسها ممثلة جميلة أوي.
–هل في شخصية فنية قدمتها وكانت قريبة من حضرتك على أرض الواقع؟
قريبة مني بشكل كبير لا مفيش لكن من تفاصيل الحياة اللي بنعيشها ممكن أحس ببعض حاجات فقط قريبة مني ومن شخصيتي لكن حاجة قريبة من شخصيتي الحقيقة لا.
-فنان من زمن الفن الجميل كان نفسك تمثلي معاه؟
طبعا الفنان الكبير رشدي أباظة شخصية فنية جميلة.
–تفاصيل إسم حضرتك وتغييره من بوسي إلى بثينة؟
اسمي بوسي لما دخلت عالم الفن والتمثيل قالولي غيريه عشان ميبقاش مشابه أو يحصل لخطبة مع إسم الفنانة بوسي فقولنا نغيره لإسم نورهان لكن حسيت بعيد أوي عن بوسي فخليته بثينة رشوان.
-هل هناك أعمال فنية قادمة ؟
إن شاء الله في أعمال فنية قادمة بس مش هقدر أعلن عنها دلوقتي هتبقى مفاجأة.
Visits: 14
مساحة إعلانية
مساحة إعلانية