رياضة

رضا عبد العال: “موسيماني ضيع على الأهلي بطولات، والتحكيم شماعة لتعليق خسارة الدوري عليها” 

موسيماني السبب في ضياع الدوري من الأهلي، ومفيش لاعب هيسيب جنة الأهلي ويروح نادي تاني علشان الفلوس” رضا عبدالعال في حوار خاص للقائد نيوز..

رضا عبد العال نجم الأهلي والزمالك الأسبق من مواليد 15 مارس 1965، ويعد رضا عبد العال واحداً من مشاهير الكرة المصرية، وذلك بسبب مهاراته التي حيرت الجميع إلى جانب إثارته الدائمة للجدل، بسبب آرائه الجريئة في جميع أفراد منظومة كرة القدم المصرية.

يمتاز بدماغه العالية وحبب الكثير في كرة القدم، فمع السنوات التي مرت على تواجد رضا عبد العال بقت السيرة العطرة له باقية بسبب دماثة خلقه وقلبه الطيب وخفة دمه وبطولاته التي ستظل خالدة في ذاكرة كل محبيه..

وإليكم نص الحوار

من المتسبب في ضياع الدوري من الأهلي؟ وهل الزمالك الأحق بالدوري في هذا الموسم؟

السبب في ضياع الدوري من الأهلي السنة دي هو مجلس إدارة النادي الأهلي وطبعا الزمالك أحق لأنه مسك في الفرصة لما الأهلي بدأ يضيع نقاط ويبتعد عن المنافسة بالتعادلات والهزائم المتتالية.

هل موسيماني السبب في خسارة الدوري للنادي الأهلي؟  

موسيماني له نصيب كبير في ضياع الدوري السنة دي والسنة اللي فاتت وضياع إفريقيا وكأس السوبر.

رأيك في المدير الفني للأهلي سواريش؟

سواريش ميتحاسبش لانه جاي وميعرفش الفرق المصرية ولا اللاعيبه المصرية، بس مجلس الإدارة كان عايز حد يشيل الليلة لأن الجماهير طالبت بوجود مدرب أجنبي فعلشان يقول للناس أنا جبت مدرب وكده ومش مقصر، نرجع كده فلاش باك ونسأل فايلر مشي ليه؟ موسيماني مشي ليه؟ نجوم الفريق عبدالله السعيد ورمضان صبحي ابن النادي اللي متربي جوة النادي مشي ليه؟ أكيد محدش هيسيب النادي الأهلي الجنة ويروح نادي تاني علشان الفلوس أكيد في حاجة تانية محدش يعرفها غيرهم ومجلس الإدارة وهيجوا يوم من الأيام يقولوها.

هل فعلا التحكيم والفار ظلموا الأهلي ولا دا كلام بيتردد وخلاص؟

التحكيم شماعة لتعليق الخسارة عليها، السنة اللي فاتت قالك دوري الاحتواء والتحكيم والسنة دي أصل الڤار واللاعبين مجهدة وتعبانة والسبب في مجلس إدارة النادي الأهلي لما كابتن محمود الخطيب وإصراره على إستكمال دوري كورونا من وقتها والفريق والمنتخب اللاعيبة بتبقى تعبانه بسبب ضغط المباريات فدي حجة وشماعة.

إذا كان الاهلي في اختيار مدير فني جديد ترشح مين؟ 

لا مقدرش أرشح حد ولا أتكلم هييجوا يقولوا ياعم أنت بتتكلم ليه دلوقتي فالأختيار للعباقرة اللي موجودة داخل النادي وبعدين إحنا نتكلم ونقول رأينا.

هل شايف إن فيريرا غير في أداء الزمالك بعد عودته مرة تانية للفريق؟

فيريرا عمل حسم وضبط ومشى لعيبة مكنتش بتدرب مشى لعيبة مكانتش عايزة الزمالك خلى في منافسة بين اللاعيبة وفي الأول والأخر ترتيب ربنا وبعد كده يجي مجلس الإدارة واللاعيبة والجهاز الفني وقبل كل دا الجمهور اللي كان بيموت نفسه في الإستاد في أخر 10 مباريات.

هل شايف إن حد عوض وجود عبدالله السعيد في الأهلي بعد رحيله؟ 

الموضوع مش عوض ولا معوضش عبدالله لما مشي الأهلي خد أتنين أفريقيا ودوريات ووصل كأس عالم وخد برونزية مرتين متتاليتين مفيش لاعيب بيقصر، الخطيب نفسه جه أحسن لاعب ولما اعتزل الأهلي أخد بطولات برضو وبعدين جه أفشة وجاب القاضية بس السؤال هنا مشي ليه؟.

-رمضان صبحي يتعرض للهجوم أكثر من باقي زملائه بعد رحيله عن النادي الأهلي.. هل دا بسبب حركاته ولا بسبب أنه ساب الأهلي علشان فلوس؟

أقرا أيضا : إبراهيم نور الدين يقود الطاقم التحكيمي لمبارة الزمالك والإتحاد السكندري

كلهم بيتعرضوا للشتيمة من أول نزولهم للتسخين عبدالله وشريف وأحمد فتحي ورمضان بس أكتر رمضان علشان فعلا ليه حركات بتستفز الجمهور إنما كله بيتشتم ومحدش بيسلم من اللسان.

Visits: 1

مساحة إعلانية

مساحة إعلانية

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

مساحة إعلانية

زر الذهاب إلى الأعلى

أنت تستخدم إضافة Adblock

بنعتذر عن المضايقة، لكنك بتستخدم إضافة adblock اللي بتمنعك من تصفح الموقع في الوقت الحالي، برجاء اغلاقها واعادة المحاولة